দুঃসাহসিক ক্ৰিড়ানুৰাগী যুৱভ্ৰমণকাৰীসকলৰ বাবে থাইলেণ্ড অন্যতম জনপ্ৰিয় গন্তব্যস্থান। প্ৰতি বছৰে থাইলেণ্ডলৈ বিশ্বৰ বিভিন্ন দেশৰ পৰা পৰ্যটকৰ সমাগম ঘটে। বহু ভাৰতীয়ও বিভিন্ন সময়ত কিছু সময় কটাবলৈ থাইলেণ্ডলৈ যোৱা দেখিবলৈ পোৱা যায়। কিন্তু দুঃসাহসিক কৰ্মৰ প্ৰতি আসক্ত যুৱক-যুৱতীসকলে কেতিয়াবা অজানিতে মৰ্মান্তিক দুৰ্ঘটনাত পতিত হয়। বহু লোকৰ মৃত্যু পৰ্যন্ত হয়। এনে দুৰ্ঘটনাৰ খবৰে ছচিয়েল মিডিয়াত ব্যাপক চৰ্চা লাভ কৰা দেখা যায়। [Elephant attack]
তেনে এক ঘটনাৰ খবৰে এতিয়া চছিয়েল মিডিয়াত তোল পাৰ লগাইছে। এটা হাতীক গা ধোৱাবলৈ যাওঁতেই অঘটন। প্ৰেমিকৰ সৈতে থাইলেণ্ড ভ্ৰমণ কৰিবলৈ গৈ মৃত্যুক আকোৱালি ল’লে এগৰাকী ২২ বছৰীয়া যুৱতীয়ে। হাতীৰ দাঁতৰ প্ৰহাৰত ছিন্ন-বিচ্ছিন্ন হৈ পৰে যুৱতীগৰাকীৰ শৰীৰ। মহিলাগৰাকীৰ নাম ব্লাংকা অজুংগুৰেন গাৰ্চিয়া। খবৰ অনুসৰি স্পেইনৰ ভেলাডলিডৰ বাসিন্দা আছিল মৃত মহিলাগৰাকী। যোৱা শুকুৰবাৰে তেওঁ দক্ষিণ-পশ্চিম থাইলেণ্ডৰ ইয়াও য়াই দ্বীপৰ কোহ ইয়াও নামৰ এটা হাতী সংৰক্ষণ কেন্দ্ৰ পৰিদৰ্শন কৰিছিল। কৰ্তৃপক্ষৰ অনুমতি লৈ হাতীটোক গা ধুৱাবলৈ তালৈ গৈছিল। তেতিয়াই দুৰ্ঘটনাটো সংঘটিত হয়। তথ্য অনুসৰি গা ধোৱাবলৈ গৈ থাকোঁতে দঁতাল হাতীটোৱে হঠাতে ব্লাংকাক আক্ৰমণৰ লক্ষ্য কৰি লয়। হাতীৰ আক্ৰমণত গুৰুতৰভাৱে আহত হয় ব্লাংকা। ততাতৈয়াকৈ ব্লাংকাক চিকিৎসালয়লৈ লৈ যোৱা হয় যদিও চিকিৎসকে তেওঁক মৃত বুলি ঘোষণা কৰে। দুখৰ বিষয় এইয়ে যে এই সমগ্ৰ ঘটনা ব্লাংকাৰ প্ৰেমিকৰ চকুৰ সন্মুখতে সমঘটিত হ’ল। কিন্তু ব্লাংকাৰ প্ৰেমিকে একোকে কৰিব নোৱাৰিলে। প্ৰেমিকাৰ প্ৰাণ ৰক্ষা কৰিব নোৱাৰি শোকত ভাঙি পৰে প্ৰেমিক। উল্লেখযোগ্য যে ব্লাংকা আছিল স্পেইনৰ পেম্পল’নাৰ নাভাৰা বিশ্ববিদ্যালয়ৰ পঞ্চম বৰ্ষৰ ছাত্ৰী। তেওঁ আইন আৰু আন্তঃৰাষ্ট্ৰীয় সম্পৰ্ক বিষয়ত অধ্যয়ন কৰি আছিল। ব্লাংকাৰ মৃত্যুত শোক প্ৰকাশ কৰি বিশ্ববিদ্যালয়খনেও এক বিবৃতি প্ৰকাশ কৰে।
