মিচিং জনজাতিসকলৰ বৃহত্তম গোত্ৰ তাকাম পেঃগু অপৃন কেবাঙৰ কেন্দ্ৰীয় সমিতিৰ বিশেষ কাৰ্যনিৰ্বাহক সভা দেওবাৰে গোগামুখত অনুষ্ঠিত হৈ যায়৷ তাকাম পেঃগু অপৃনৰ গোগামুখ জিলা সমিতিৰ উদ্যোগত আৰু কেন্দ্ৰীয় সমিতিৰ সহযোগত গোগামুখ বালিকা বিদ্যালয়ৰ প্ৰেক্ষাগৃহত এদিনিয়া বিস্তৃত কাৰ্যসূচীৰেে অনুষ্ঠিত হোৱা উক্ত সভাখনৰ সভাপতিত্ব কৰে তাকাম পেঃগু অপৃন কেবাঙৰ সভাপতি দিনেশ পেগুৱে৷ উদ্দেশ্য ব্যখ্যা কৰে সম্পাদক তথা শিক্ষক  দিলীপ পেগুৱে৷ সভাখনত  পেঃগু অপৃনৰ স্থায়ী লগ’ উন্মোচন কৰে লক্ষীকান্ত পেগুৱে৷ দুপৰীয়া ১২ বজাত জয়ৰাম পেগুৱে ৰচিত পুৰণি কাব্যগ্ৰন্থৰ পুনঃ মুদ্ৰণ উন্মোচন কৰে সাহিত্যিক, সমাজ সংগঠক, অৱসৰপ্ৰাপ্ত অভিযন্তা খগেন পেগুৱে৷

উল্লেখনী যে, তাকাম পেঃগু অপৃন কেবাঙৰ গোগামুখ জিলা সমিতিৰ সম্পাদক ড° দেৱজিৎ পেগু, উদীয়মান লেখক তথা শিক্ষক আৰু জয়ৰাম পেঃগুৰ পৰিয়ালৰ আশাশুধীয়া প্ৰচেষ্টাত গ্ৰন্থখন পুনঃ মুদ্ৰণ কৰা হৈছে৷একেদৰে পেঃগু অপৃন কেবাঙৰ পুনঃ সংশোধিত সংবিধানখন উন্মোচন কৰে পেঃগু অপৃন কেবাঙৰ মুখ্য উপদেষ্টা তথা চিলাপথাৰ মহাবিদ্যালয়ৰ অবসৰপ্ৰাপ্ত অধ্যক্ষ দেবিৰাম পেগুৱে৷ ইয়াৰ পূৰ্বে পুৱা আদৰণি ভাষণ দিয়ে তাকাম পেঃগু অপৃৃন কেবাঙৰ গোগামুখ জিলা সমিতিৰ সভাপতি ভানুৰাম পেগুৱে৷ সভাত উপস্থিত থাকে তাকাম পেঃগু অপৃনৰ কেন্দ্ৰীয় সমিতিৰ উপসভাপতি হেমন্ত পেঃগু, সহকাৰী সম্পাদক ভগীৰথ পেংগু, সংবিধান সমিতিৰ সদস্য নেহৰুু পেঃগু, সাংস্কৃতিক সম্পাদক দীপ কুমাৰ পেঃগু. আইনী উপদেষ্টা যতীন পেঃগু, কাৰ্যালয় সম্পাদক টেপুৰাম পেঃগু, কেন্দ্ৰীয় সদস্য গংগাপ্ৰসাদ পেঃগু আদিয়ে৷

অৰুণোদন পুথিভঁৰাল, অৰুণোদয় মহিলা সমিতি আৰু স্থানীয় সমূহ এৰাগাঁৱবাসী ৰাইজৰ সহযোগত “গ্ৰীষ্মকালীন বন্ধ” উপলক্ষে এদিনীয়া সাংস্কৃতিক কাৰ্য্যসূচী শনিবাৰে ইয়াৰ নিজস্ব প্রেক্ষাগৃহত অনুষ্ঠিত কৰা হয়৷ পুৱা ৭-৩০ বজাত পতাকা উত্তোলন আৰু তাৰ পাছতে অনুষ্ঠানৰ চৌহদত বৃক্ষ ৰোপণ কৰা হয়। বিয়লি ৪ বজাৰ লগে লগে স্থানীয় বৈষ্ণৱপ্ৰাণ আইমাতৃ সকলৰ দ্বাৰা ভাওঁনা মঞ্চায়নৰ প্রাক মূৰ্হূত্বত এভাগি নাম প্রসঙ্গৰ আয়োজন কৰা হয়। ইয়াৰ পাছতে স্থানীয় কেইবাগৰাকী ব্যক্তিৰ লগতে মাননীয় বিধায়ক মহোদয় শ্রীযুত ৰূপজ্যোতি কুৰ্মীক সম্বর্দ্ধনা জ্ঞাপন কৰা হয়। সম্বর্দ্ধনা গ্ৰহণ কৰি শুভেচ্ছামূলক বার্তাত বিধায়ক মহোদয়ে কয় যে মইনা পাৰিজাতৰ দ্বাৰা আয়োজিত এই কার্য্যসূচীভাগি অতি প্রশংসনীয় হৈছে৷ এইখিনিতে তেখেতে তেখেতৰ মাতৃদেৱী স্বৰ্গীয় ৰূপম কুৰ্মীয়ে এই আন্ত:গঠনিৰ ক্ষেত্ৰত আগবঢ়োরা পুঁজিৰ সম্পর্কত সমিতিৰ তৰফৰ পৰা জানিব পাৰি আনন্দ প্ৰকাশ কৰি আগন্তক বৰ্ষত তিনি লাখ টকা তেখেতৰ বিধায়ক পুঁজিৰ পৰা আগবঢ়াব বুলি ঘোষণা কৰে।

অনুষ্ঠান সামৰণিৰ লগে লগে মূল নাটকৰ পূৰ্বে অৰুণোদয় মইনা সকলৰ ‘মাখন চোৰ’ নৃত্য, উত্তৰণ কলাকৃষ্টি কেন্দ্র আৰু শ্ৰীমন্ত শঙ্কৰদেৱ সংঘ সাংস্কৃতিক বিদ্যালয়ৰ প্রশিক্ষাৰ্থী ছাত্রী সকলে আগবঢ়োরা গুৰুজনাৰ মহান সৃষ্টি বিজড়িত নৃত্যই মূল নাটকত সোণত সোৱগা চৰাইছিল। উত্তৰণ কলা কৃষ্টি কেন্দ্ৰৰ ছাত্র সকলৰ পূৰ্ব ৰঙ্গ ‘গায়ন বায়নে’ মূল নাটকক আদৰি আনিছিল৷ “ধ্ৰুৱ চৰিত্র” ভাওনাত মইনা শিল্পী সকলৰ অভিনয় অতি সুন্দৰ হৈছিল। প্রৱল গৰমকো নেওচি দর্শকসকলে পিচ নিশা ২-৩০ বজালৈকে নাট উপভোগ কৰি শিল্পী সকলৰ ভূয়সী প্রশংসা কৰাৰ ওপৰিও তেওঁলোকৰ উজ্জ্বল ভবিষ্যত কামনা কৰে। নাট উপভোগ কৰিবলৈ অহা প্রতিজন দৰ্শকে অৰুণোদয়ৰ এই কাৰ্য্যসূচীৰ শলাগ লয়।

সদৌ অসম দবা সন্থাৰ উদ্যোগত শোনিতপুৰ জিলা দবা সন্থাৰ সহযোগত, শোনিতপুৰ দবা একাদেমীৰ ব্যৱস্থাপনাত তেজপুৰৰ দৰং মহাবিদ্যালয় প্ৰেক্ষাগৃহত ৪৭ সংখ্যক সদৌ অসম আন্তঃ জিলা দবা প্ৰতিযোগিতা দেওবাৰৰ পৰা তিনি দিনীয়া বিস্তৃত কাৰ্যসূচীৰে আৰম্ভ হৈছে।তিনিটা শাখাত বিভক্ত কৰা প্ৰতিযোগিতা ক্ৰমে ৭বছৰ, ১১বছৰ আৰু ১৫ বছৰৰ অনুদ্ধৰ লৰা-ছোৱালীৰ মাজত আনুষ্ঠিত কৰা হৈছে।উদ্যোক্তাসকলে জানিবলৈ দিছে যে, এইবাৰৰ প্ৰতিযোগিতাত অসমৰ বিভিন্ন জিলাৰ পৰা অহা অভিলেখ সংখ্যক ৪২২ গৰাকী প্ৰতিযোগীয়ে অংশ গ্ৰহণ কৰিছে আৰু অনিচ্ছা স্বত্বেও বহুতক যোগদানৰ পৰা বিৰত ৰাখিব লগীয়া হোৱাত মাৰ্জনা বিচাৰিছে। প্ৰতিযোগিতাৰ আৰম্ভণিতে অনুষ্ঠিত উদ্বোধনি সভাত পৌৰোহিত্য কৰে শোনিতপুৰ জিলা দবা সন্থাৰ সভাপতি গিৰিশ বৰাই। দৰং মহাবিদ্যালয়ৰ অধ্যক্ষ ড° পলাশমনি শইকীয়াই মুখ্য অতিথি হিচাপে অংশ গ্ৰহণ কৰি দবা খেলে খেলুৱৈ সকলৰ মস্তিস্কৰ বিকাসত সহায় কৰাৰ ওপৰত আলোকপাত কৰি খেলুৱৈ সকলক উৎসাহ আৰু প্ৰেৰণা যোগাই বক্তব্য ৰাখে।

বিশিষ্ট অতিথি হিচাপে অংশ গ্ৰহণ কৰে সদৌ অসম দবা সন্থাৰ যুটীয়া সম্পাদক তথা নিউজ লাইভ’ৰ লক্ষীমপুৰৰ সাংবাদিক জিতু মনি পেওগ, সদৌ অসম দবা সন্থাৰ জনেল সম্পাদক প্ৰদীপ ডেকা আৰু বিশিষ্ট ব্যৱসায়ী কৃষ্ণভ শইকীয়াই। জ্যোৰ্তিময় বৰাই আত ধৰা অনুষ্ঠানৰ আৰম্ভণিতে সৃষ্টিমূলক এটি নৃত্যানুষ্ঠানেৰে শুভাৰম্ভ কৰা হয়। প্ৰতিযোগিতাৰ প্ৰতিটো শাখাত নিৰ্বাচিত চাৰিগৰাকী খেলুৱৈয়ে সৰ্বভাৰতীয় পয্যায়ত অসমক প্ৰতিনিধিত্ব কৰিব বুলি উদ্যোক্তা সকলে জনাইছে।

গ্ৰীষ্ম বন্ধৰ লগত সংগতি ৰাখি নিখিল ভাৰত এছ চি আৰু এছ টি ৰেলৱে এচোছিয়েশ্যৰ এন এফ ৰেলৱে মণ্ডলৰ উদ্যোগত দেওবাৰে ৰেল নগৰী মালিগাঁৱৰ নামবাৰীস্থিত উত্তৰ পূৱ সীমান্ত ৰেলৱেৰ ক্ৰীড়া সংস্থাৰ চুইমিং পুলত কামৰূপ জিলা ভিত্তিত সাতোৰ প্ৰতিযোগিতা অনুষ্ঠিত হয়।৬ টা গ্ৰুপত চাৰিটা ভিন্ন শাখাত অনুষ্ঠিত প্ৰতিযোগিতাখনত ৩ ৰ পৰা ১৮ বছৰ বয়সৰ ১৬০ জন ছাত্ৰ-ছাত্ৰীয়ে ভাগ লয়।পুৱা প্ৰতিযোগিতাখন উদ্ধোধন কৰে গুৱাহাটী পৌৰ নিগমৰ ৯ ৱাৰ্ডৰ পাৰিষদ অৰ্চনা দাসে। এই উপলক্ষে অনুষ্ঠিত চমু অনুষ্ঠানত এচোছি়েয়েশ্যনৰ উত্তৰ পূব মণ্ডলৰ সভাপতি ৰিংকুমণি বৈশ্য, সাধাৰণ সম্পাদক তাৰিণী চৰণ দাস, এচোছিয়েশ্যনৰ মহিলা শাখাৰ উপ সভানেত্ৰী সীমা খান, কৰ্মকৰ্তা ভাৰতী মাৰাককে ধৰি কেবাজনো বিষয়ববীয়া উপস্থিত থাকে।আনহাতে দিনৰ ১০ বজাৰ পৰা বিয়লি প্ৰায় ৫ বজালৈ অনুষ্ঠিত প্ৰতিযোগিতাখনত সামগ্ৰিকভাৱে শ্ৰেষ্ঠ দলৰ সন্মান লাভ কৰি নিধি দাস সোঁৱৰণী বেষ্ট স্কুল ট্ৰফী লাভ কৰে গুৱাহাটীৰ ডি পি এছ স্কুলে আৰু ৰানাৰছ আপৰ সন্মান লাভ কৰি পিংকু বড়ো সোঁৱৰণী ট্ৰফী লাভ কৰে শিলপুখুৰীৰ মহৰ্ষি স্কুলে।

আনহাতে প্ৰতিযোগিতা পৰিচালনা কৰে ক্ৰমে – ৰঞ্জন খান, অভিষেক চৌধুৰী, উমা কান্ত সিং, অংকন দাস, শচীন দাস, বি কৃষ্ণা, পৱিত্ৰ দাসকে ধৰি সাতোৰ খেলৰ লগত জড়িত মুঠ ১৫ জন ক্ৰীড়াবিদে। প্ৰতিযোগিতাৰ অন্তত অনুষ্ঠিত সামৰণি অনুষ্ঠানত প্ৰতিযোগিতাৰ বিজয়ী সকলক মানপত্ৰ আৰু বঁটা সমুহ বিতৰণ কৰা হয়। উল্লেখ্য যে ইয়াৰ পূৰ্বে গ্ৰীষ্ম বন্ধৰ লগত সংগতি ৰাখি শিশু ছাত্ৰ – ছাত্ৰী সকলৰ মাজত থকা সুপ্ত প্ৰতিভা সমুহ বিকশিত কৰাৰ লক্ষ্যৰে এচোছি়েয়েশ্যনৰ মহিলা শাখাৰ উদ্যোগত ১১ জুলাইৰ পৰা ১৩ জুলাইলৈ মালিগাঁৱ গোশালাৰ ছিনিয়ৰ ৰেলৱে ইনষ্টিটিউটত শিশু ছাত্ৰ – ছাত্ৰীৰ মাজত থকা সুপ্ত প্ৰতিভা সমুহ বিকশিত কৰাৰ লক্ষ্যৰে গ্ৰীষ্মকালীন কৰ্মশালা অনুষ্ঠিত কৰা হৈছিল।