সাম্প্ৰতিক সময়ছোৱাত বাংলাদেশত সংখ্যালঘু হিন্দুৰ বিৰুদ্ধে হিংসাজনিত ঘটনা উদ্বেগজনকভাৱে বৃদ্ধি পাইছে। এই পৰিস্থিতিৰ মাজতেই যোৱা ২৪ ঘণ্টাৰ ভিতৰত দুজনকৈ হিন্দু লোক নৃশংস হত্যাৰ বলি হোৱা ঘটনাই দেশখনত তীব্ৰ চাঞ্চল্য সৃষ্টি কৰিছে।

প্ৰাপ্ত তথ্য অনুসৰি, শ্বেখ হাছিনা চৰকাৰৰ পতনৰ পাছৰে পৰা বাংলাদেশত সংখ্যালঘুৰ ওপৰত আক্ৰমণৰ ঘটনা অধিক বৃদ্ধি পাইছে। মাত্ৰ যোৱা ১৮ দিনৰ ভিতৰতে দেশখনত ছয়জন হিন্দু লোকক হত্যা কৰা হৈছে বুলি খবৰ পোহৰলৈ আহিছে।

সোমবাৰে (৫ জানুৱাৰী) নিশা নাৰ্চিংদি জিলাত গেলামালৰ দোকানৰ মালিক ৪০ বছৰীয়া শৰৎ চক্ৰৱৰ্তী মণিক অচিনাক্ত দুৰ্বৃত্তই চোকা অস্ত্ৰৰে আক্ৰমণ কৰি হত্যা কৰে। স্থানীয় লোকৰ মতে, দোকানত থকাৰ সময়তেই দুৰ্বৃত্তই মণিৰ ওপৰত আক্ৰমণ চলায়। গুৰুতৰভাৱে আহত অৱস্থাত তেওঁক ততাতৈয়াকৈ হাস্পতাললৈ লৈ যোৱা হয় যদিও পথতেই তেওঁৰ মৃত্যু হয়।

শৰৎ চক্ৰৱৰ্তীৰ পত্নী এগৰাকী গৃহিনী আৰু তেওঁলোকৰ এটি ১২ বছৰীয়া পুত্ৰ সন্তান আছে। জানিব পৰা মতে, পূৰ্বে তেওঁ দক্ষিণ কোৰিয়াত কৰ্মৰত আছিল যদিও কিছু বছৰ পূৰ্বে বাংলাদেশলৈ ঘূৰি আহি গেলামালৰ এখন দোকান চলাই আহিছিল। পৰিয়ালৰ লোকৰ ভাষ্য অনুসাৰে, মণিৰ কাৰো সৈতে কোনো শত্রুতা বা ব্যক্তিগত বিবাদ নাছিল আৰু তেওঁ সকলোৰে সৈতে সুসম্পৰ্ক বজাই ৰাখিছিল। তথাপিও তেওঁ এই নৃশংস হত্যাকাণ্ডৰ বলি হ’বলগা হয়।

উল্লেখযোগ্য যে, যোৱা ২৪ ঘণ্টাৰ ভিতৰতে বাংলাদেশত সংঘটিত এইটো দ্বিতীয়টো হিন্দু হত্যাকাণ্ড। ইয়াৰ কিছু সময় পূৰ্বে মণিৰামপুৰত হিন্দু সাংবাদিক তথা ‘বি ডি খবৰ’ৰ কাৰ্যবাহী সম্পাদক ৪৫ বছৰীয়া ৰানা প্ৰতাপ বৈৰাগীক দুৰ্বৃত্তই গুলীয়াই হত্যা কৰে। আৰক্ষীৰ মতে, সোমবাৰে সন্ধিয়া প্ৰায় ৬ বজাত এই আক্ৰমণ সংঘটিত হয়। প্ৰথমে ৰানাৰ মূৰত তিনিটাকৈ গুলী মৰা হয় আৰু তাৰ পাছত ডিঙি কাটি নৃশংসভাৱে হত্যা কৰা হয়।

ঘটনাৰ খবৰ পোৱাৰ লগে লগে আৰক্ষী ঘটনাস্থলীত উপস্থিত হৈ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। লগতে ঘটনাস্থলীৰ পৰা সাতটা খালী কাৰ্টিজ উদ্ধাৰ কৰা হৈছে। প্ৰাথমিক তদন্ত অনুসৰি, ৰানা প্ৰতাপ বৈৰাগী কাৰখানাত কাম কৰি থকা অৱস্থাত আক্ৰমণকাৰী মটৰ চাইকেলেৰে আহি তেওঁক বাহিৰলৈ মাতি নি এই হত্যাকাণ্ড সংঘটিত কৰে।

একেটা দিনতে সংঘটিত এই দুটা নৃশংস হত্যাই বাংলাদেশৰ আইন-শৃংখলা পৰিস্থিতি আৰু সংখ্যালঘু হিন্দু সমাজৰ সুৰক্ষাক লৈ গুৰুতৰ প্ৰশ্ন উত্থাপন কৰিছে।

আগন্তুক অসম বিধানসভা নিৰ্বাচন কাষ চাপি অহাৰ লগে লগে ৰাজ্যৰ ৰাজনৈতিক পৰিৱেশ উত্তপ্ত হৈ উঠিছে। এই পৰিস্থিতিৰ মাজতেই শাসকীয় বিজেপি দলৰ বিৰুদ্ধে এক গুৰুতৰ অভিযোগ উত্থাপন কৰিছে ৰাইজৰ দলৰ সভাপতি তথা শিৱসাগৰৰ বিধায়ক অখিল গগৈয়ে।

সোমবাৰে নিশা ফেচবুক লাইভযোগে অখিল গগৈয়ে অভিযোগ কৰে যে আগন্তুক বিধানসভা নিৰ্বাচনত জয়লাভ নিশ্চিত কৰাৰ উদ্দেশ্যে বিজেপিৰ জ্যেষ্ঠ নেতাসকলে ভোটাৰ তালিকাৰ বিশেষ সংশোধনী প্ৰক্ৰিয়াত হেৰফেৰ কৰাৰ ষড়যন্ত্ৰ ৰচিছে। এনে ষড়যন্ত্ৰৰে বিজেপিয়ে সংবিধানক ভৰিৰে মোহাৰি গণতন্ত্ৰ ধ্বংস কৰাৰ চেষ্টা চলাইছে বুলিও তেওঁ দাবী কৰে।

অখিল গগৈৰ অভিযোগ মতে, যোৱা ৪ জানুৱাৰীৰ নিশা প্ৰায় ৮ বজাত তেওঁ বিজেপিৰ এক ভিডিঅ’ কনফাৰেন্স প্ৰত্যক্ষ কৰে। উক্ত কনফাৰেন্সত ৰাজ্যিক বিজেপিৰ সভাপতি দিলীপ শইকীয়াৰ লগতে কেইবাগৰাকীও কেবিনেট মন্ত্ৰী, বিধায়ক আৰু অন্যান্য নেতাসকল উপস্থিত আছিল বুলি তেওঁ দাবী কৰে।

তেওঁৰ বক্তব্য অনুসাৰে, সেই ভিডিঅ’ কনফাৰেন্সতেই বিজেপি সভাপতি দিলীপ শইকীয়াই কেবিনেট মন্ত্ৰী অশোক সিংঘালক ৬০টা বিধানসভা সমষ্টিৰ যোগ্য ভোটাৰৰ নাম কৰ্তন কৰাৰ দায়িত্ব দিছিল। লগতে বিজেপিক ভোট নিদিয়া লোকসকলৰ নামৰ তালিকা অহা ১২ জানুৱাৰীৰ ভিতৰত জমা দিবলৈ বিজেপিৰ বিধায়ক আৰু মণ্ডল সভাপতিসকলক নিৰ্দেশ দিয়া হৈছিল বুলিও অখিল গগৈয়ে অভিযোগ তোলে।

বিজেপিক ভোট নিদিয়া নাগৰিকৰ নাম ভোটাৰ তালিকাৰ পৰা কাটি দিয়াৰ লক্ষ্যৰে এই সমগ্ৰ প্ৰক্ৰিয়া চলোৱা হৈছে বুলি দাবী কৰি অখিল গগৈয়ে মুখ্যমন্ত্ৰী ড° হিমন্ত বিশ্ব শৰ্মাক ৪ জানুৱাৰীৰ উক্ত ভিডিঅ’ কনফাৰেন্সৰ ৰেকৰ্ডিং ৰাজহুৱা কৰিবলৈ প্ৰত্যাহ্বান জনায়।

তেওঁ লগতে কয়, যদি তেওঁৰ অভিযোগ মিছা প্ৰমাণিত হয়, তেন্তে তেওঁ নাৰ্কো-এনালাইছিছ টেষ্টৰ সন্মুখীন হ’বলৈও সাজু। এই ঘটনাক তেওঁ গণতন্ত্ৰৰ ওপৰত প্ৰত্যক্ষ আক্ৰমণ বুলি অভিহিত কৰি সমগ্ৰ বিষয়টোৰ ওপৰত উচ্চ পৰ্যায়ৰ ন্যায়িক তদন্তৰ দাবী জনায়।

অৱশ্যে, অখিল গগৈৰ এই গুৰুতৰ অভিযোগ সন্দৰ্ভত এইপৰ্যন্ত বিজেপি নেতৃত্বই কোনো আনুষ্ঠানিক প্ৰতিক্ৰিয়া প্ৰকাশ কৰা নাই। আগন্তুক দিনত মুখ্যমন্ত্ৰী বা বিজেপি নেতৃত্বই এই অভিযোগৰ প্ৰতি কেনে প্ৰতিক্ৰিয়া আগবঢ়ায়, সেয়া লক্ষণীয় হ’ব।

আগন্তুক অসম বিধানসভা নিৰ্বাচনক কেন্দ্ৰ কৰি ৰাজ্যৰ ৰাজনীতিত উত্তাপ বৃদ্ধি পোৱাৰ মাজতে কংগ্ৰেছৰ বিৰুদ্ধে পুনৰ তীব্ৰ অভিযোগ উত্থাপন কৰিছে মুখ্যমন্ত্ৰী ড° হিমন্ত বিশ্ব শৰ্মাই। টিকটৰ নামত কংগ্ৰেছ নেতাসকলে ব্যাপক ধন সংগ্ৰহ চলাই থকা বুলি অভিযোগ কৰি মুখ্যমন্ত্ৰীয়ে কয়— “কংগ্ৰেছৰ নেতাসকলে বিয়া পাতিবলৈও টিকট দিম বুলি টকা লৈছে।”

সোমবাৰে এক অনুষ্ঠানত অংশগ্ৰহণৰ পিছত সাংবাদিকৰ আগত মুখ্যমন্ত্ৰীয়ে কয় যে, কংগ্ৰেছে ৩-৫ কোটি টকাকৈ টিকটৰ নামত ধন সংগ্ৰহ কৰিছে আৰু ইতিমধ্যে ২২-২৩টা সমষ্টিত টিকটৰ বিনিময়ত এডভান্স লৈছে। তেওঁ কটাক্ষ কৰি কয়, “মিঞা সমাজে কংগ্ৰেছক ভোটো দিয়ে, টকাও দিয়ে; কিন্তু উচ্ছেদ হ’লে কংগ্ৰেছ সহায় নকৰে।”

শিৱসাগৰত অখিল গগৈ প্ৰসংগত মন্তব্য

ৰাইজৰ দলৰ সভাপতি অখিল গগৈয়ে শিৱসাগৰত পুনৰ নিৰ্বাচন খেলাৰ প্ৰত্যাহ্বান জনোৱা সন্দৰ্ভত মুখ্যমন্ত্ৰীয়ে কয়, “অখিল গগৈক হৰুৱাবলৈ আমাৰ দলত বহু কাৰ্যকৰ্তা আছে। আমাৰ দলৰ ৫-৬ জনেই যথেষ্ট।”

নিজে শিৱসাগৰত নিৰ্বাচন নেখেলাৰ কথা স্পষ্ট কৰি তেওঁ কয়, “মই তাত পাঁচ বছৰে কাম কৰা নাই। মই নিৰ্বাচন খেলিলে মানুহক ঠগোৱা হ’ব।”

ৰাজ্যজুৰি বিজেপিৰ দেৱাল লিখন কাৰ্যসূচী

আনহাতে, আগন্তুক নিৰ্বাচনৰ বাবে সম্পূৰ্ণৰূপে সাজু বুলি দাবী কৰি সোমবাৰৰ পৰা সমগ্ৰ ৰাজ্যজুৰি বিজেপিৰ দেৱাল লিখন কাৰ্যসূচী আৰম্ভ হয়। গুৱাহাটীৰ খানাপাৰাত ৰাজ্যিক বিজেপিৰ সভাপতি দিলীপ শইকীয়াৰ উপস্থিতিত মুখ্যমন্ত্ৰী ড° হিমন্ত বিশ্ব শৰ্মাই এই কাৰ্যসূচীৰ শুভাৰম্ভ কৰে।

দেৱাল লিখনত অংশগ্ৰহণ কৰি মুখ্যমন্ত্ৰীয়ে কয়, “নিৰ্বাচনৰ বাবে বিজেপি সম্পূৰ্ণ সাজু। ৱালৰ গৰাকীৰ অনুমতি লৈ দেৱাল লিখনৰ জৰিয়তে গণসংযোগ স্থাপন কৰা হৈছে।”
‘অসমৰ সুৰক্ষা, বিজেপিৰ প্ৰতিজ্ঞা’ আৰু ‘বিকশিত অসম, জয় আই অসম’ আদি শ্লোগানৰ জৰিয়তে ৰাইজলৈ বাৰ্তা প্ৰেৰণ কৰা হৈছে বুলি তেওঁ উল্লেখ কৰে।

টিকট প্ৰত্যাশী আৰু আসন বুজাবুজি

বিজেপিত টিকট প্ৰত্যাশীৰ ভিৰ নাই বুলি দাবী কৰি মুখ্যমন্ত্ৰীয়ে কয়, “অসমৰ আধাতকৈ বেছি সমষ্টিত বিজেপিৰ এজনেই প্ৰাৰ্থী আছে। ৫০টা সমষ্টিত আজিয়েই প্ৰাৰ্থী ঘোষণা কৰিব পাৰি।”

অগপৰে সৈতে আসন বুজাবুজি সন্দৰ্ভত তেওঁ কয়, “অনানুষ্ঠানিক আলোচনা চলি আছে। নিৰ্বাচনৰ তাৰিখ ধাৰ্য হ’লে তাৰ আগতেই টিকট আৰু আসনৰ ভাগ-বাটোৱাৰা চূড়ান্ত হ’ব।”

নিৰ্বাচনৰ পূৰ্বে মুখ্যমন্ত্ৰীৰ এই মন্তব্যই ৰাজ্যৰ ৰাজনীতিত নতুন চৰ্চাৰ সৃষ্টি কৰিছে।

অসম বিধানসভা নিৰ্বাচনলৈ মাজত মাত্ৰ কেইটামান মাহ বাকী থাকোঁতেই ৰাজ্যত তীব্ৰ হৈছে নিৰ্বাচনী তৎপৰতা। এনে পৰিস্থিতিৰ মাজতে চাহ শ্ৰমিকসকলৰ বাবে এক গুৰুত্বপূৰ্ণ ঘোষণা কৰিছে অসমৰ মুখ্যমন্ত্ৰী ড° হিমন্ত বিশ্ব শৰ্মাই।

অসম চাহ উদ্যোগৰ ২০০ বছৰীয়া ঐতিহ্যৰ প্ৰতি সন্মান জনাই ৰাজ্য চৰকাৰৰ উদ্যোগত ‘এটি কলি দুটি পাত’ শীৰ্ষক বিশেষ কাৰ্যসূচীৰ অধীনত চাহ বাগিচাৰ শ্ৰমিক-কৰ্মচাৰীসকললৈ এককালীন ৫ হাজাৰ টকাৰ আৰ্থিক সাহায্য প্ৰদান কৰাৰ কথা ঘোষণা কৰে মুখ্যমন্ত্ৰীয়ে।

ছ’চিয়েল মিডিয়াযোগে এই ঘোষণা কৰি মুখ্যমন্ত্ৰী হিমন্ত বিশ্ব শৰ্মাই উল্লেখ কৰে যে, অসম চাহৰ ২০০ বছৰীয়া ঐতিহ্য সংৰক্ষণ আৰু চাহ জনগোষ্ঠীৰ অৱদানক স্বীকৃতি জনোৱাৰ লক্ষ্যৰে চৰকাৰে ইতিমধ্যে কেইবাটাও ঐতিহাসিক পদক্ষেপ গ্ৰহণ কৰিছে। সেই প্ৰচেষ্টাক আৰু এখোজ আগুৱাই নিবলৈ এইবাৰ চাহ বাগিচাৰ সকলো শ্ৰমিক-কৰ্মচাৰীলৈ ৫ হাজাৰ টকাকৈ এককালীন সাহায্য আগবঢ়োৱা হ’ব।

মুখ্যমন্ত্ৰীয়ে লিখিছে,
“অসম চাহৰ ২০০ বছৰীয়া ঐতিহ্যৰ প্ৰতি সন্মান যাচি আমাৰ চৰকাৰে কেইবাটাও গুৰুত্বপূৰ্ণ পদক্ষেপ গ্ৰহণ কৰিছে। সেই প্ৰয়াসৰ অংশ হিচাপে ‘এটি কলি দুটি পাত’ শীৰ্ষক কাৰ্যসূচীৰ জৰিয়তে চাহ বাগিচাৰ সকলো শ্ৰমিক-কৰ্মচাৰীলৈ ৫,০০০ টকাকৈ এককালীন সাহায্য আগবঢ়োৱা হ’ব।”

এই ঘোষণাৰ ফলত সমগ্ৰ ৰাজ্যৰ হাজাৰ হাজাৰ চাহ বাগিচাৰ শ্ৰমিক উপকৃত হ’ব বুলি আশা কৰা হৈছে। মুখ্যমন্ত্ৰীৰ মতে, এই আঁচনিৰ জৰিয়তে ৬ লাখৰো অধিক চাহ শ্ৰমিক লাভান্বিত হ’ব। ইয়াৰ লগতে চাহ জনগোষ্ঠীৰ অৰ্থনৈতিক সকাহৰ লগতে অসমৰ অৰ্থনীতি আৰু সাংস্কৃতিক পৰিচয়লৈ তেওঁলোকৰ গুৰুত্বপূৰ্ণ অৱদানকো স্বীকৃতি দিয়া হ’ব।

শীঘ্ৰেই এই সন্দৰ্ভত চাহ জনগোষ্ঠীৰ ৰাইজক বিতং তথ্য জনোৱা হ’ব বুলিও মুখ্যমন্ত্ৰীয়ে উল্লেখ কৰে। নিৰ্বাচনৰ পূৰ্বে এই ঘোষণা বিশেষ তাৎপৰ্যপূৰ্ণ বুলি ৰাজনৈতিক মহলত চৰ্চা আৰম্ভ হৈছে।

অতনু ভূঞাৰ পৰিচালনাৰ বহুচৰ্চিত ছবি ‘খাকী’ৰ প্ৰথমখন প’ষ্টাৰ আনুষ্ঠানিকভাৱে ৫ জানুৱাৰী সোমবাৰে জ্যোতি চিত্ৰবনৰ এটি প্ৰেক্ষাগৃহত মুকলি কৰা হয় । এখন ৰাজনৈতিক থ্ৰীলাৰ ৰূপে নিৰ্মিত এই ছবিখনৰ প’ষ্টাৰখন মুকলিৰ লগে লগেই চৰ্চা লাভ কৰিছে। এবিচিডিৰ বেনাৰত খাকীৰ প্ৰযোজনা কণিকা ভূঞা আৰু অৱয়ব ভূঞাৰ ৷
পষ্টাৰখন আনুষ্ঠানিকভাৱে মুকলি কৰে জ্যেষ্ঠ সাংস্কৃতিক সাংবাদিক উৎপল মেনাই৷

ছবিখনৰ প্ৰথমখন পোষ্টাৰ মুকলি অনুষ্ঠানত উপস্থিত থকা সাংবাদিকসকলক সম্বোধন কৰি ছবিখনৰ প্ৰযোজনা সংস্থা এবিচিডিৰ তৰফৰ পৰা জনোৱা হয় যে ‘খাকী’ মুক্তি দিয়া হ’ব অহা ২৭ ফেব্ৰুৱাৰীত ।

বৰ্তমান মুম্বাইত ‘খাকী’ৰ অন্তিম পৰ্যায়ৰ কাম চলি আছে । বৰ্তমান ছবিৰ DI অৰ্থাৎ ডিজিটেল ইণ্টাৰমিডিয়েটৰ কাম চলি আছে মুম্বাইৰ বিখ্যাত প্ৰসাদ লেবৰেটৰীত। পৰিচালক অতনু ভূঞাই জনোৱা মতে প্ৰথমবাৰৰ বাবে অসমীয়া ছবিৰ কালাৰ কাৰেকচনত অতি উচ্চমানৰ প্ৰযুক্তি ব্যৱহাৰ কৰা হৈছে । মুম্বাইৰ প্ৰসাদ লেবৰেটৰীত ডিআইৰ কাম কৰিছে বিখ্যাত পৰিচালক কিৰণ কোটাই । ‘ৱেডনেচ ডে’, ‘দ্য মাদ্ৰাছ কাফে’ আদি ছবিৰ ডিআইৰ সৈতে জড়িত আছিল কিৰণ কোটা । ইয়াৰ উপৰিও বলীডউৰ বহু ছবিৰ কাম কৰিছে ‘খাকী’ৰ সৈতে জড়িত কিৰণ কোটাই ।
ছবিৰ আৱহ সংগীত আৰু অন্যান্য আনুসংগিক কামো চলি আছে মুম্বাইত । ছবিৰ আৱহ সংগীতৰ দায়িত্বত আছে ফিল্মফেয়াৰ বঁটা প্ৰাপক বলীউডৰ জনপ্ৰিয় সংগীত পৰিচালক ডেনিয়েল বি জৰ্জ । ডেনিয়েলে ইয়াৰ পূৰ্বে বলীউডৰ জনপ্ৰিয় ছবি ‘আন্ধা ধূন’, ‘মেৰী খ্ৰীষ্টমাছ’, ‘জনী গাড্ডাৰ’ আদি ছবিৰ আৱহ সংগীতৰ কাম কৰিছিল ।

বৰ্তমান মুম্বাইত ডেনিয়েলৰ তত্বাৱধানত পূৰ্ণগতিত চলি আছে ‘খাকী’ৰ আৱহ সংগীতৰ কাম । আৱহ সংগীতৰ উপৰি ছবিৰ সংগীত পৰিচালনা কৰিছে ডেনিয়েলে নিজে । ছবিখনৰ গীতত কণ্ঠদান কৰিছে অনুজা ভূঞা, ৰূপম ভূঞা আৰু জয় বৰুৱাই । পৰিচালক অতনু ভূঞাই জানিবলৈ দিয়া মতে মুম্বাইত দেৱজিৎ চাংমাই আৰু অমৃত প্ৰীতমৰ তত্বাৱধানত খাকীৰ শব্দৰ কাম চলি আছে। ছবিখনক লৈ ইতিমধ্যেই চৰ্চা আৰম্ভ হৈছে৷প’ষ্টাৰ মুকলি অনুষ্ঠানত ছবিখনৰ অভিনয় শিল্পী তথা কলা কুশলীসকলো উপস্থিত থাকে৷