বন্ধন বেংকৰ পৃষ্ঠপোষকতাত ছয়গাঁৱত বিশ্ব পৰিৱেশ দিৱস উদযাপন৷ বিশ্ব পৰিৱেশ দিৱসৰ সৈতে সংগতি ৰাখি বিভিন্ন কাৰ্যসূচী ৰূপায়ণ৷ গোলকীয় উষ্ণতা বৃদ্ধি ৰোধ কৰাৰ লক্ষ্যৰে ছয়গাঁৱত বিশ্ব পৰিৱেশ দিৱস উদযাপন সৰ্বভাৰতীয় বিত্তীয় প্ৰতিষ্ঠান বন্ধন বেংকৰ৷ অসম বিজ্ঞান সমিতি, ছয়গাঁও শাখাৰ উদ্যোগত আৰু বন্ধন বেংকৰ ছয়গাঁও শাখাৰ পৃষ্ঠপোষকতাত ছয়গাঁও চৰকাৰী মজলীয়া বিদ্যালয়ৰ সহযোগত ছয়গাওঁ চৰকাৰী মজলীয়া বিদ্যালয় প্ৰাংগনত দিনজোৰা বিভিন্ন কাৰ্যসূচীৰে উদযাপন কৰা হয় বিশ্ব পৰিৱেশ দিৱস৷

সেই উপলক্ষে বিদ্যালয় চৌহদত গছপুলি ৰোপণ কৰে বন্ধন বেংকৰ মঙলদৈ ক্লাষ্টাৰ হেড অনুপজ্যোতি শৰ্ম আৰু সমাজসেৱক তথা ছয়গাঁও নাগৰিক সমাজৰ উপ সভাপতি পিয়াৰ আলীয়ে৷ আনহাতে বন্ধন বেংকৰ কাৰ্যালয়ৰ সন্মুখত গছপুলি ৰোপণ কৰে বন্ধন বেংকৰ ছয়গাঁও শাখাৰ শাখা প্ৰবন্ধক অংকুৰ চৌধুৰীয়ে৷ ইয়াৰ পিছতে বিদ্যালয় প্ৰাংগনত ছাত্ৰ-ছাত্ৰী সকলৰ মাজত চিত্ৰাংকন আৰু বক্তৃতা প্ৰতিযোগিতা অনুষ্ঠিত কৰা হয়৷য’ত ছয়গাঁৱৰ কেইবাখনো বিদ্যালয়ৰ ছাত্ৰ-ছাত্ৰীয়ে অংশগ্ৰহণ কৰে৷ শেষত উভয় প্ৰতিযোগিতাত বিজয়ী ছাত্ৰ-ছাত্ৰীসকলক পুৰস্কাৰ হিচাপে কিতাপৰ টোপোলাৰ লগতে মানপত্ৰ প্ৰদান কৰা হয়।

সৰুপেটাস্থিত বি এইচ বি মহাবিদ্যালয়ৰ ইক’ ক্লাব আৰু আৰু গৱেষণা উদ্ভাৱন আৰু সম্প্ৰসাৰণ কোষৰ সহযোগত দিনজোৰা কাৰ্যসূচীৰে বুধবাৰে বিশ্ব পৰিৱেশ দিৱস উদ্‌যাপন কৰা হয়৷ এই বছৰৰ বিশ্ব পৰিৱেশ দিৱসৰ মূল বিষয়বস্তু “ভূমি পুনৰুদ্ধাৰ, মৰুভূমিকৰণ ৰোধ আৰু খৰাং স্থিতিস্থাপকতা গঢ়ি তোলাৰ লগত সংগতি ৰাখি ছাত্ৰ-ছাত্ৰীসকলৰ মাজত সজাগতা সৃষ্টিৰ উদ্দেশ্যে এখন বক্তৃতা অনুষ্ঠানৰ আয়োজন কৰা হয়৷ বিশ্ব পৰিৱেশ দিৱস উপলক্ষে মহাবিদ্যালয়ৰ ৪ নং সভাকক্ষত অনুষ্ঠিত এই সভাত সমল ব্যক্তি হিচাপে উপস্থিত থাকে মহাবিদ্যালয়খনৰ বাণিজ্য বিভাগৰ অধ্যাপক মানসজ্যোতি দাস৷ ভাষণ প্ৰসংগত তেখেতে বৰ্তমান সময়ত সমগ্ৰ বিশ্বত পৰিৱেশ বিনষ্ট হোৱাৰ বিভিন্ন কাৰক সম্পৰ্কে বিশ্লেষণ আগবঢ়ায়৷

লগতে তেওঁ মাটি সংৰক্ষণৰ বিভিন্ন প্ৰক্ৰিয়া, পৰিৱেশৰ ভাৰসাম্য ৰক্ষাত জলবায়ুৰ বিভিন্ন উপাদান, প্ৰাকৃতিক দুৰ্যোগ, ভূমিস্খলন ইত্যাদি সম্পৰ্কেও আলোচনা কৰি পৰিৱেশ সজাগতা সম্পৰ্কীয় এটি ভিডিঅ’ ছাত্ৰ-ছাত্ৰীসকলক দেখুৱায়৷ বি এইচ বি মহাবিদ্যালয়ৰ গৱেষণা উদ্ভাৱন আৰু সম্প্ৰসাৰণ কোষৰ সমন্বয়ক ড॰ পূৰৱী তালুকদাৰে উদ্দেশ্য ব্যাখ্যা কৰা অনুষ্ঠানটোত ৰাজনীতি বিজ্ঞান বিভাগৰ মুৰব্বী অধ্যাপক ড॰ দিপ্তী কলিতাই সভাপতিত্ব কৰি সভাপতিৰ আসনৰ পৰা বিশ্ব পৰিৱেশ দিৱস উদ্‌যাপনৰ প্ৰাসংগিকতা সম্পৰ্কে বক্তৃতা প্ৰদান কৰে৷ অসমীয়া বিভাগৰ মুৰব্বী অধ্যাপক ড॰ কল্পনা বৈশ্যৰ লগতে গ্ৰন্থাগাৰিক ডেইজী কলিতাই শিক্ষকসকলৰ মাজৰ পৰা পৰিৱেশ সুৰক্ষা সম্পৰ্কে চমুকৈ কিছু কথা ছাত্ৰ-ছাত্ৰীসকলক অৱগত কৰে৷ অধ্যাপক প্ৰীতি দেৱীৰ শলাগৰ শৰাইৰে সামৰণি পৰা এই বক্তৃতা অনুষ্ঠানটোত মহাবিদ্যালয়খনৰ ভালেসংখ্যক অধ্যাপকৰ লগতে উচ্চতৰ মাধ্যমিক শ্ৰেণীৰ প্ৰায় এশৰো অধিক ছাত্ৰ-ছাত্ৰীয়ে অংশগ্ৰহণ কৰে৷ বিশ্ব পৰিৱেশ দিৱসৰ দিনটোত অৰ্থনীতি বিজ্ঞান বিভাগৰ মুৰব্বী অধ্যাপক প্ৰবোধ কলিতাৰ ব্যক্তিগত উদ্যোগত আৰু ইক’ ক্লাৱৰ সমন্বয়ক ড॰ অপূৰ্ৱ কুমাৰ বড়োৰ তত্ত্বাৱধানত অধ্যাপক আৰু ছাত্ৰ-ছাত্ৰীসকলৰ অংশগ্ৰহণেৰে পৃথকে পৃথকে বৃক্ষৰোপণৰ কাৰ্যসূচীও সম্পাদন কৰা হয়৷