নিশা গোলকগঞ্জৰ হালাকুৰা বজাৰত বিধংসী অগ্নিকাণ্ড সংঘটিত হয়। নিমিষতে ভস্মীভূত হয় ১২ টা কৈ ব্যৱসায়ী প্ৰতিষ্ঠান। প্ৰায় ২০ লক্ষাধিক টকাৰ সামগ্ৰী জুইত ভস্মীভূত হয়। ৰাইজে অগ্নি নিৰ্বাপাক বাহিনীক যোগাযোগ কৰে।
কিন্তু দুই ঘণ্টা পিছত ঘটনাস্থলীত উপস্থিত হয় অগ্নি নিৰ্বাপাক বাহিনী। ফলত সম্পূৰ্ণ ভাবে জাহ যায় ১২ টা কৈ ব্যৱসায়ী প্ৰতিষ্ঠান।
যোৰহাট আৰু গোলাঘাট ক্ৰাইম ব্রান্স তিতাবৰ মহকুমা আৰক্ষীয়ে এক গোপন সূত্ৰৰ পম খেদি এটা ড্রাগছ সৰবৰাহকাৰী লগতে বৃহৎ পৰিমাণৰ ব্ৰাউন চুগাৰ জব্দ কৰিবলৈ সক্ষম হয়। গোলাঘাট, যোৰহাট ক্ৰাইম ব্রান্স তিতাবৰ মহকুমা আৰক্ষীয়ে ড্ৰাগছৰ বিৰুদ্ধে চলোৱা এক অভিযানত সন্ধিয়া মৰিয়নিৰ নিউসোণোৱালত বৃহৎ পৰিমাণৰ ব্ৰাউন চুগাৰ সহ এটা সৰবৰাহকাৰীক কৰায়ত্ত কৰিবলৈ সক্ষম হয়। মৰিয়নিৰ নিউসোণোৱাল খণ্ড বন কাৰ্যালয়ৰ সন্মুখতে আৰক্ষীৰ তালাচীত জব্দ হয় এই বৃহৎ পৰিমাণৰ ড্ৰাগছখিনি৷ তিতাবৰ মহকুমা আৰক্ষী বিষয়া আৰু গোলাঘাট আৰক্ষীয়ে গোপন সূত্ৰৰ খবৰৰ ভিত্তিত মৰিয়নিত ড্ৰাগছৰ বিৰুদ্ধে অভিযান চলাইছিল।
এই অভিযানত ড্ৰাগছ সহ এটা সৰবৰাহকাৰী আটক কৰিবলৈ সক্ষম হয়। ধৃত সৰবৰাহকাৰীটো তিতাবৰ চুঙীৰ বাবুল দাস বুলি চিনাক্ত কৰা হৈছে৷ AS03 D 6514 নম্বৰৰ চেন্ট্ৰ গাড়ীখনেৰে কহিমাৰ পৰা অৰুণাচললৈ বুলি ড্ৰাগছ খিনি কঢ়িয়াই আনিছিল বুলি স্বীকাৰ কৰিছে ধৃত বাবুল দাসে। ৩০ টা চাবোনৰ বাকচত লুকুৱাই অনা অৱস্থাত ৩৫৮.৩৬ গ্ৰাম ব্ৰাউন চুগাৰ জব্দ কৰা হয়। আৰক্ষীয়ে অনুমান কৰা মতে ব্ৰাউন চুগাৰখিনিৰ মূল্য প্ৰায় ডেৰ কোটি টকা হ’ব।
কহিমাৰ পৰা মৰিয়নি নিউসোনোবাল খণ্ড বন বিষয়া কাৰ্য্যালয়ৰ পৰা কিছু নিলগত থকা চোটাফলা গেট পাৰ হৈ অৰুণাচললৈ যোৱাৰ বাবে পৰিকল্পনা কৰা অনুমান কৰা হৈছে। আৰক্ষীৰ পৰা হাত সাৰিবলৈ এই পথটোক সুগম পথ হিচাপে বাচি লৈছিল ড্রাগছ সৰবৰাহকাৰীটোৱে। আৰক্ষীয়ে কোটি টকাৰ অধিক ড্রাগছ সহ এটা সৰবৰাহকাৰীক আটক কৰিবলৈ সক্ষম হোৱাটো আৰক্ষীৰ এক বৃহৎ সাফল্য।
