প্ৰেছ ক্লাব(Sangeeta Barooah Pisharoty) অফ ইণ্ডিয়াৰ সভাপতি পদত জয়ী অসম জীয়ৰী সংগীতা বৰুৱা পিছাৰটি।
প্ৰেছ ক্লাৱ অৱ ইণ্ডিয়াৰ প্ৰথম মহিলা সভাপতি হিচাপে নিৰ্বাচিত সংগীতা।
প্ৰেছ ক্লাৱ অৱ ইণ্ডিয়াৰ ৬৭ বছৰীয়া ইতিহাসত পোন প্ৰথমবাৰৰ বাবে সভাপতি হিচাপে নিৰ্বাচিত এগৰাকী মহিলা প্ৰাৰ্থী।
সভাপতি হিচাপে নিৰ্বাচিত হোৱা সংগীতা বৰুৱা হৈছে প্ৰথমগৰাকী উত্তৰ পূৱৰ সাংবাদিক।
অসমবাসীৰ বাবে এয়া ভাল খবৰ।
দেওবাৰে অষ্ট্ৰেলিয়াৰ ছিডনীত বিশ্ব কঁপোৱা আক্ৰমণ।(Ahmed Al Ahmed)
ইছলামিক সন্ত্রাসবাদীৰ আক্ৰমণত এই পর্যন্ত ১২জন নিহত।
এই ঘটনাৰ মাজতে চৰ্চা আহিছে এজন ব্যক্তি।
অকলেই সন্ত্ৰাসবাদী বিৰুদ্ধে যুঁজি HERO হ’ল আহমেদ আল আহমেদ নামৰ ব্যক্তিজন।
সন্ত্রাসবাদীৰ বন্দুক কাঢ়িলে আহমদ আল আহমদে।
নিজৰ জীৱন কথা নাভাবি জঁপিয়াই পৰিছিল সন্ত্রাসবাদীৰ ওপৰত।
দুটাকৈ গুলী লাগিল আহমদৰ শৰীৰত।
ফল-মূলৰ বেপাৰী আহমেদ আল আহমেদ বৰ্তমান বিশ্বজুৰি চৰ্চিত।
অষ্ট্ৰেলিয়াৰ ছিডনী চহৰত এই ভয়ংকৰ সন্ত্ৰাসবাদী আক্ৰমণ সংঘটিত হৈছিল।
বণ্ডি বিচত অনুষ্ঠিত হৈ থকা ইহুদী হানুকাহ উৎসৱৰ সময়তে এই ঘটনা ঘটে।
প্ৰাথমিক তথ্য অনুসৰি, এই আক্ৰমণত অন্তত ১০ জন লোকৰ মৃত্যু হৈছে আৰু প্ৰায় ৬০ জন লোক আহত হৈছে।
ঘটনাৰ পিছতে দুজন লোকক আৰক্ষীয়ে জিম্মাত লৈছে বুলি জানিব পৰা গৈছে।
জুবিন(Zubeen Garg)গাৰ্গৰ মৃত্যুত জড়িত অভিযুক্তৰ ফাঁচী বিচাৰিছে এজন যুৱকে।
ৰাজপথত ফাঁচী হোৱাটো বিচাৰে জুবিনৰ মৃত্যুত জড়িত অভিযুক্তৰ।
জুবিন গাৰ্গৰ প্ৰতি থকা অকৃত্ৰিম ভালপোৱাৰ নিদৰ্শন নাচিম আলীৰ।
‘দৰিদ্ৰ মানুহৰ বাবে এখন সোঁ-হাত নাইকিয়া হৈ গ’ল’।
দুয়োখন ভৰি হেৰুৱাই সহায়ৰ বাবে কাষ চাপিছিল জুবিন গাৰ্গৰ।
জুবিন গাৰ্গে কি দৰে সহায় কৰিছিল নাচিম আলীক, ক’লে সকলো কথা।
ট্ৰাইচাইকেলেৰে নাজিৰাৰ পৰা জুবিন ক্ষেত্ৰলৈ কষ্টকৰ যাত্ৰা নাচিম আলীৰ।
এক ৰে’ল দুৰ্ঘটনাত দুয়োখন ভৰি হেৰুওৱা নাছিম আলিয়ে জুবিন গাৰ্গৰ সহায়ত লাভ কৰিছিল নতুন জীৱন।
এতিয়া জুবিন গাৰ্গৰ ৰহস্যজনক মৃত্যুৰ সৈতে জড়িত অভিযুক্তসকলৰ উচিত শাস্তিৰো দাবী তুলিলে নাছিম আলিয়ে।
প্ৰবীণ সাংবাদিক(Prafulla Govinda Baruah) তথা আছাম ট্ৰিবিউন গোষ্ঠীৰ স্বত্বাধিকাৰী, পৰিচালন সঞ্চালক, সম্পাদক প্ৰফুল্ল গোবিন্দ বৰুৱাৰ দেহাৱসান।
বিশিষ্ট সাংবাদিকগৰাকীৰ মৃত্যুৰ সময়ত বয়স আছিল ৯৪ বছৰ।
চিকিৎসাধীন অৱস্থাত মহানগৰীৰ এখন ব্যক্তিগত হাস্পতালত শেষ নিশ্বাস ত্যাগ কৰে প্ৰবীণ সাংবাদিকগৰাকীয়ে।
‘দ্য আছাম ট্ৰিবিউন’ কাকতৰ পৰিচালন সঞ্চালক আছিল প্ৰয়াত সাংবাদিকগৰাকী।
প্ৰয়াত সাংবাদিকগৰাকীৰ মৃত্যুত শোকস্তব্ধ অসমৰ সংবাদ জগত।
প্ৰবীণ সাংবাদিক প্ৰফুল্ল গোবিন্দ বৰুৱাৰ মৃত্যুত শোকপ্ৰকাশ মুখ্যমন্ত্ৰী হিমন্ত বিশ্ব শৰ্মাৰ লগতে কেন্দ্ৰীয় মন্ত্ৰী সৰ্বানন্দ সোণোৱালৰ।
ৰাজ্যৰ উদীয়মান শিল্পীসকলক উৎসাহিত কৰাৰ উদ্দেশ্যে বিশিষ্ট সাহিত্যিক ড° ৰীতা চৌধুৰীয়ে ‘জুবিন গাৰ্গ পুঁজি’ গঠনৰ ঘোষণা কৰে। পাণবজাৰৰ নেহৰু পাৰ্কত আয়োজিত এক সংবাদমেলত ‘ব্ৰহ্মপুত্ৰ সাহিত্য উৎসৱ–২০২৬’ সন্দৰ্ভত বক্তব্য ৰাখি এই গুৰুত্বপূৰ্ণ ঘোষণা কৰে সাহিত্যিকগৰাকীয়ে।
সংবাদমেলত ড° ৰীতা চৌধুৰীয়ে জনায় যে ‘ব্ৰহ্মপুত্ৰ সাহিত্য উৎসৱ–২০২৬’ আগন্তুক ৬ৰ পৰা ৮ ফেব্ৰুৱাৰীলৈ শিৱসাগৰত অনুষ্ঠিত হ’ব। লগতে উৎসৱৰ বিভিন্ন সাহিত্য বঁটা আৰু বঁটাপ্ৰাপকসকলৰ নামো ঘোষণা কৰে তেওঁ।
ঘোষণা অনুসৰি, শিশু-সাহিত্য শিতানত ‘ৰূপা চৌধুৰী সাহিত্য বঁটা’ আগবঢ়োৱা হ’ব দিব্যলতা দত্তলৈ। কবিতাৰ ক্ষেত্ৰত সৃজনশীল সাহিত্য বঁটা লাভ কৰিব বিকিয়ান বাইলুঙে। অনুবাদ শিতানত বঁটা আগবঢ়োৱা হ’ব দিনকৰ কুমাৰলৈ। যুৱ শিতানত ‘মলিনা চৌধুৰী সাহিত্য বঁটা’ লাভ কৰিব পৰিস্মিতা বৰদলৈয়ে। লগতে জীৱনজোৰা সাহিত্য সাধনাৰ স্বীকৃতিস্বৰূপে অৰূপ কুমাৰ দত্তলৈ আগবঢ়োৱা হ’ব ‘ৰংমন বঁটা’।
ড° ৰীতা চৌধুৰীয়ে জানিবলৈ দিয়ে যে উদীয়মান শিল্পীসকলৰ সহায়ৰ উদ্দেশ্যে গঠন কৰা ‘জুবিন গাৰ্গ পুঁজি’ ইউটিউবৰ পৰা পোৱা ধন ২০ বছৰৰ বাবে ফিক্সড ডিপ’জিটত জমা কৰি তাৰ পৰা লাভ হোৱা সুতেৰে আগবঢ়োৱা হ’ব। উল্লেখযোগ্য যে, জুবিন গাৰ্গৰ সৈতে হোৱা তেওঁৰ শেষ সাক্ষাৎকাৰৰ জৰিয়তে ইউটিউবৰ পৰা ২,৯০৯ ডলাৰ, অৰ্থাৎ ২,৬৩,৪৬৮.৪২ টকা লাভ কৰিছিল ড° ৰীতা চৌধুৰীয়ে।
জুবিন গাৰ্গ সম্পৰ্কে বক্তব্য ৰাখি ড° ৰীতা চৌধুৰীয়ে কয়, “জুবিনে অসমক বহু ডাঙৰ ধাৰণা দি থৈ গৈছে। নিজে জীয়াই থকাৰ লগতে আনকো জীয়াই থকাৰ প্ৰেৰণা দি গৈছে। জুবিনবিহীন এই সময়ত তেওঁৰ অনুৰাগীসকলৰ মাজত দেখা দিয়া শূন্যতা পূৰণৰ বাবে আমি আমাৰ মঞ্চৰ পৰা কাম কৰিব বিচাৰোঁ।”
ইফালে, জুবিন গাৰ্গৰ মৃত্যুৰ সৈতে জড়িত চাৰ্জশ্বীট দাখিল সন্দৰ্ভত প্ৰশ্নৰ উত্তৰত ড° ৰীতা চৌধুৰীয়ে কয়, “বিষয়টো বৰ্তমান বিচাৰাধীন। সেয়ে এই সন্দৰ্ভত মই কোনো মন্তব্য কৰিব নিবিচাৰোঁ। মই মোৰ কলমৰ মাজেৰে যিখিনি কৰিব পাৰোঁ, সেয়া কৰি যাম। জুবিন গাৰ্গৰ সকলো কৰ্মক একেলগ কৰি আমি এটা তৰা সাজিব বিচাৰোঁ। মই SITৰ চাৰ্জশ্বীটখন দেখা নাই, কিন্তু সকলোৱে বিচাৰে জুবিনে ন্যায় পাওক।”
তেজপুৰত গ্ৰেপ্তাৰ প্ৰাক্তন ভাৰতীয় বায়ুসেনা বাহিনীৰ অৱসৰপ্ৰাপ্ত বিষয়া । বায়ুসেনাৰ এগৰাকী ৱাৰেণ্ট বিষয়া হিচাবে অৱসৰ গ্ৰহণ কৰি শত্ৰু ৰাষ্ট্ৰক তেওঁ যোগান ধৰিছিল প্ৰতিৰক্ষা বিভাগৰ তথ্য । অৱশেষত আৰক্ষীৰ জালত পৰিল বিষয়াগৰাকী । এক নিৰ্ভৰযোগ্য তথ্য়ৰ ভিত্তিত ভাৰতীয় বায়ুসেনাৰ এজন অৱসৰপ্ৰাপ্ত জুনিয়ৰ ৱাৰেণ্ট বিষয়া তেজপুৰৰ কুলেন্দ্ৰ শৰ্মাক পাকিস্তানী চোৰাংচোৱা অভিযানকাৰীৰ সৈতে সম্পৰ্ক থকাৰ অভিযোগত গ্ৰেপ্তাৰ কৰা হৈছে ।
এই তথ্য় সদৰী কৰিছে শোণিতপুৰৰ উপ-আৰক্ষী অধীক্ষক হৰিচৰণ ভূমিজে ৷ উপ-আৰক্ষী অধীক্ষকগৰাকীয়ে এই সন্দৰ্ভত কয়, “প্ৰাথমিক তদন্তৰ পৰা দেখা গৈছে যে অভিযুক্তই ছ’চিয়েল মিডিয়াৰ জৰিয়তে স্পৰ্শকাতৰ নথি-পত্ৰ আৰু তথ্য শ্বেয়াৰ কৰিছিল । তেওঁ মোবাইলৰ জৰিয়তে পাকিস্তানী চোৰাংচোৱাৰ লগত তথ্য আদান-প্ৰদান কৰিছিল । কিমান দিনৰ পৰা এই তথ্য আদান-প্ৰদান কৰিছিল সেই বিষয়ে বৰ্তমানলৈকে জানিব পৰা হোৱা নাই ।”
আৰক্ষীয়ে তেওঁৰ লেপটপ আৰু মোবাইল জব্দ কৰে য’ত এনে সম্পৰ্ক সংযোগ কৰা কিছুমান তথ্য লাভ কৰিছে আৰক্ষীয়ে ৷ শোণিতপুৰৰ উপ-আৰক্ষী অধীক্ষকগৰাকীয়ে কয় যে সামগ্ৰীসমূহ ফৰেনছিক পৰীক্ষালৈ প্ৰেৰণ কৰাৰ ব্যৱস্থা কৰা হৈছে । কিছুমান তথ্য ডিলিট কৰা হৈছে বুলিও আৰক্ষী বিষয়াগৰাকীয়ে কয় । শোণিতপুৰ আৰক্ষীয়ে এই সন্দৰ্ভত তেজপুৰ সদৰ থানাত ভাৰতীয় ন্যায় সংহিতাৰ 147, 148, 152, 238, 61(2) ধাৰাত ৭৮৫/২৫ নম্বৰত তেওঁৰ বিৰুদ্ধে এক গোচৰ ৰুজু কৰি তেওঁক গ্ৰেপ্তাৰ কৰিছে বুলি স্পষ্ট কৰি দিয়ে ।
এই সন্দৰ্ভত অধিক তদন্ত চলি আছে আৰু শনিবাৰে তেওঁক আদালতত হাজিৰ কৰোৱা হ’ব ৷ ধৃত কুলেন্দ্ৰ শৰ্মা তেজপুৰ শালনিবাৰীস্থিত ভাৰতীয় বায়ুসেনাত ৱাৰেণ্ট বিষয়া হিচাবে কৰ্মৰত আছিল । তেওঁ বিগত ২০০২ চনত অৱসৰ গ্ৰহণ কৰে । পৰৱৰ্তী সময়ত তেওঁ পুনৰ তেজপুৰ বিশ্ববিদ্যালয়ৰ ইলেকট্ৰ’নিক বিভাগত কৰ্মৰত হৈ অৱসৰ গ্ৰহণ কৰে বুলি উপ-আৰক্ষী অধীক্ষকগৰাকীয়ে জানিবলৈ দিয়ে । তেওঁৰ ঘৰ তেজপুৰ পতিয়া চুবুৰীত । উপ-আৰক্ষী অধীক্ষক ভূমিজে লগতে কয় ,”পাকিস্তানৰ লগত পোনপটীয়া সংযোগ আছে বুলি কোৱা নাই; কিন্তু চোৰাংচোৱাৰ লগত মোবাইলৰ হোৱাটছএপৰ জৰিয়তে তথ্য প্ৰদান কৰাৰ সংযোগ লাভ কৰা হৈছে আৰু অধিক তথ্য পোহৰলৈ আহিব ।”
আনহাতে তিনিদিন পূৰ্ব তেজপুৰৰ এগৰাকী মহিলাক হাৱালাৰ জৰিয়তে পাকিস্তানৰ লগত সম্পৰ্কৰ অভিযোগত গ্ৰেপ্তাৰ হৈছিল । এই ঘটনাৰ লগত যোগসূত্ৰৰ বিষয়ে একো পোৱা নাই বুলি উল্লেখ কৰি উপ-আৰক্ষী অধীক্ষকগৰাকীয়ে কয়,”মহিলাগৰাকীৰ লগত বৰ্তমান কোনো লিংক পোৱা নাই, সেই বিষয়েও অধিক তদন্ত কৰা হ’ব ।”
ভাৰত সেৱাশ্ৰম সংঘৰ তিনিচুকীয়া শাখাৰ বিশেষ অনুষ্ঠানত কেন্দ্ৰীয় মন্ত্ৰী সৰ্বানন্দ সোণোৱাল ৷ তিনিচুকীয়া জিলা সাংবাদিক সন্থাৰ সোণালী জয়ন্তীৰ সামৰণি অনুষ্ঠানত অংশগ্ৰহণ সোণোৱালৰ৷ “এখন প্ৰকৃত ৰামৰাজ্য স্থাপনৰ বাবে প্ৰতিগৰাকী হিন্দু সন্তান দায়বদ্ধ হোৱা উচিত, আমি নিজকে হিন্দু হিচাপে গৌৰৱ কৰা উচিত”- সোণোৱাল৷ “প্ৰশংসাত নিশ্চয়তা নাই কিন্তু সমালোচনাত আন্তৰিকতা থাকে”- সোণোৱাল৷ আজি তিনিচুকীয়া আৰু ডুমডুমা চহৰত অনুষ্ঠিত দুটি পৃথক অনুষ্ঠানত অংশগ্ৰহণ কৰে কেন্দ্ৰীয় বন্দৰ, জাহাজ আৰু জলপথ বিভাগৰ মন্ত্ৰী সৰ্বানন্দ সোণোৱালে ৷
প্ৰথমটি অনুষ্ঠানত ভাৰত সেৱাশ্ৰম সংঘৰ তিনিচুকীয়া শাখাত যুগাচার্য শ্রীমৎ স্বামী প্রণৱানন্দজী মহাৰাজৰ নৱনির্মিত শ্ৰীশ্ৰী গুৰু মন্দিৰ, শ্রীশ্রী শিৱ মন্দিৰ আৰু শ্রীশ্রী কৃষ্ণ মন্দিৰৰ লগতে ছাত্রাবাসৰ শুভ উদ্বোধনীত অংশগ্ৰহণ কৰে কেন্দ্ৰীয় মন্ত্ৰীজনে ৷
বৰ্ণাঢ্য আধ্যাত্মিক-সাংস্কৃতিক কাৰ্যসূচীৰে মুখৰিত, সনাতন সংস্কৃতিৰ বিশালতা আৰু মহত্ত্বক প্ৰতিফলিত কৰা এই অনুষ্ঠানৰ আধ্যাত্মিক পৰিৱেশত সোণোৱালক সংগ দিয়ে সংঘৰ সন্মানীয় বিষয়ববীয়াসকল, মাননীয় বিধায়ক শ্ৰী বলিন চেতিয়া, হাউছিং ব’ৰ্ডৰ অধ্যক্ষ পুলক গোহাঁই, বিশিষ্ট সমাজকৰ্মী কুশকান্ত বড়া, তিনিচুকীয়া পৌৰসভাৰ পৌৰপতি পুলক চেতিয়া, তিনিচুকীয়া উন্নয়ন প্ৰাধিকৰণৰ অধ্যক্ষ কাজল গোহাঁই, ডিব্ৰুগড় উন্নয়ন প্ৰাধিকৰণৰ অধ্যক্ষ অসীম হাজৰিকা, মৰাণ স্বায়ত্তশাসিত পৰিষদৰ মুখ্য কাৰ্যবাহী সদস্য অৰুণজ্যোতি মৰাণ প্ৰমুখ্যে শংকৰ দাস আৰু গণ্য-মান্য ব্যক্তিসকলে৷
ভাৰতৰ বিভিন্ন স্থানৰ পৰা আহি সমবেত হোৱা স্বামী আৰু ভক্তপ্ৰাণ ৰাইজক সম্বোধন কৰি সোণোৱালে প্ৰাচীন হিন্দু সভ্যতাই যুগ যুগ ধৰি পৃথিৱীৰ মানৱ সমাজক প্ৰদান কৰি অহা জ্ঞানৰ পোহৰ, আধ্যাত্মিক চেতনাশক্তিক আমাৰ আটাইৰে বাবে এক গৌৰৱৰ বিষয় হোৱা উচিত বুলি মন্তব্য প্ৰকাশ কৰে৷ তেখেতে কয় – “আমি ভাৰতমাতাৰ সন্তান হিচাপে প্ৰতিগৰাকীয়ে এক সেৱা আৰু সমৰ্পণৰ ভাৱেৰে শ্ৰদ্ধা সহকাৰে ভাৰত মাতৃক সেৱা আগবঢ়োৱাৰ এটি সুযোগ লাভ কৰিছোঁ৷ তাৰ লগতে আহি পৰিছে এটি দায়িত্ব- প্ৰকৃতি আৰু জীৱকুলক সুৰক্ষিত ৰখাৰ৷ আধ্যাত্মিকতা, সহিষ্ণুতা, ধৈৰ্য্য আৰু মানৱতা সন্দৰ্ভত হিন্দুধৰ্মই আমাক যিখিনি চেতনাশক্তি প্ৰদান কৰিছে তাৰ সদব্যৱহাৰ কৰি এখন প্ৰকৃত ৰামৰাজ্য স্থাপনৰ বাবে ভাৰতবৰ্ষৰ প্ৰতিগৰাকী হিন্দু সন্তানে বিশেষভাৱে দায়বদ্ধ তথা প্ৰতিজ্ঞাবদ্ধ হব লাগিব, ৰাষ্ট্ৰধৰ্ম পালন কৰিব লাগিব৷ মাননীয় প্ৰধানমন্ত্ৰী নৰেন্দ্ৰ মোডী ডাঙৰীয়াই ৫০০ বছৰ পুৰণি এটি সপোনক দিঠকত পৰিণত কৰি, ৰাম মন্দিৰ স্থাপনৰ জৰিয়তে প্ৰতিগৰাকী হিন্দুক গৌৰৱান্বিত কৰি তুলিছে৷ হিন্দু সভ্যতাৰ শক্তিয়েই হৈছে মহাশক্তি, হিন্দু সভ্যতাৰ বিচাৰধাৰাই হৈছে মহা বিচাৰধাৰা৷ এই মহাজ্ঞানী, মহা ভাৰতত জন্ম লাভ কৰাৰ বাবে আমি ঈশ্বৰৰ ওচৰত কৃতজ্ঞ হব লাগিব৷
অতীজৰে পৰা ভাৰতবৰ্ষই পৃথিৱীৰ প্ৰতিটো জটিল সমস্যাৰ সমাধান দি আহিছে৷ স্বামী বিবেকানন্দই চিকাগোলৈ গৈ আটাইকে ভাতৃ আৰু ভগ্নী বুলি সম্বোধন কৰি যি ইতিবাচক দৃষ্টিভংগীৰ নিদৰ্শন দৰ্শাইছিল তাক আগবঢ়াই নিয়াৰ এটি নৈতিক দায়িত্ব আমাৰ আটাইৰে আছে৷ এই সন্দৰ্ভত ভাৰত সেৱাশ্ৰমে যিখিনি পদক্ষেপেৰে মানৱতা আৰু ভাতৃত্ববোধাৰ বাৰ্তা কঢ়িয়াই আনিছে তাৰ বাবে এই অনুষ্ঠানৰ লগত জড়িত প্ৰতিগৰাকী সদস্য ধন্যবাদৰ পাত্ৰ৷ আজিৰ এই শুভক্ষণত এই সুন্দৰ মন্দিৰ প্ৰাঙ্গণৰ আধ্যাত্মিক বাতাবৰণত উপস্থিত থাকি মই ধন্য হৈছোঁ৷ ভাৰত সেৱাশ্ৰমে নৱপ্ৰজন্মক সদায়েই হিন্দু ধৰ্মৰ মাহাত্ম্য, পবিত্ৰতা আৰু সহিষ্ণুতাৰ বাৰ্তাৰে উদ্বুদ্ধ কৰি আহিছে৷ আমি নিজকে হিন্দু হিচাপে গৌৰৱ কৰা উচিত৷ ভাল মনৰ অধিকাৰী হ’লেহে আমি ভাল চিন্তা কৰিব পাৰিম, ভাল কাম কৰিব পাৰিম, ভাল মানুহ হব পাৰিম আৰু এখন ভাল সমাজ গঢ়িব পাৰিম৷” ইয়াৰ লগতে ঐতিহাসিক বাণিজ্য নগৰী তিনিচুকীয়াৰ অসম তথা ভাৰতক শক্তিশালী তথা আত্মনিৰ্ভৰশীল কৰাৰ ক্ষেত্ৰতো এটি বিশেষ ভূমিকা আছে বুলি মন্তব্য কৰে সোণোৱালে৷
গণতন্ত্ৰৰ চতুৰ্থ স্তম্ভৰ ভেটি সুদৃঢ় কৰি সংবাদ মাধ্যমে সমাজৰ জাগ্ৰত প্ৰহৰীৰ ভূমিকা পালন কৰি আহিছে।
ডুমডুমাত অনুষ্ঠিত দ্বিতীয়টি অনুষ্ঠানত সোণোৱালে তিনিচুকীয়া জিলা সাংবাদিক সন্থাৰ সোণালী জয়ন্তীৰ সামৰণি অনুষ্ঠান তথা চতুৰ্বিংশতিতম দ্বি-বাৰ্ষিক অধিৱেশনত অংশগ্ৰহণ কৰে৷ তেখেতৰ লগতে সভাত উপস্থিত থাকে মাননীয় বিধায়ক শ্ৰী বলিন চেতিয়া, হাউছিং ব’ৰ্ডৰ অধ্যক্ষ পুলক গোহাঁই, তিনিচুকীয়া পৌৰসভাৰ পৌৰপতি পুলক চেতিয়া, মৰাণ স্বায়ত্তশাসিত পৰিষদৰ মুখ্য কাৰ্যবাহী সদস্য অৰুণজ্যোতি মৰাণ, তিনিচুকীয়া জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগ, জ্যেষ্ঠ সাংবাদিক অৰুণ বৰুৱা, অমূল্য খাটনিয়াৰ, ডুমডুমা মহাবিদ্যালয়ৰ অধ্যক্ষ ড° কমলেশ্বৰ কলিতা, ডুমডুমা প্ৰেছ ক্লাবৰ সভাপতি মনোজ দত্ত, সদৌ অসম মৰাণ ছাত্ৰ সন্থাৰ সম্পাদক জয়কান্ত মৰাণ, সদৌ অসম ভোজপুৰী সন্থাৰ সভাপতি কৈলাশ গুপ্তা, মৰাণ জাতীয় মহিলা পৰিষদৰ সাধাৰণ সম্পাদিকা ৰুণজুন মৰাণ, সোণোৱাল কছাৰী ছাত্ৰ সন্থাৰ সভাপতি দেবানন্দ চেলেঙকে আদি কৰি গণ্য-মান্য ব্যক্তিসকল।
সভাত নিজৰ বক্তব্য ৰাখি কেন্দ্ৰীয় মন্ত্ৰীজনে গুণগত সংবাদ সেৱাৰে আৰু গঠনমূলক দৃষ্টিভংগীৰে নিষ্ঠাৰে কাম কৰি সমাজ সচেতনতাৰ দিশত সক্ৰিয় ভূমিকা গ্ৰহণ কৰি যাবলৈ সংবাদ মহলক আহ্বান জনায় আৰু তিনিচুকীয়া জিলা সাংবাদিক সন্থাৰ নিৰন্তৰ প্ৰচেষ্টাৰ শলাগ লয়।
সোণোৱালে কয় – “ গণতন্ত্ৰৰ চতুৰ্থ স্তম্ভ হিচাপে জনসাধাৰণৰ মৌলিক অধিকাৰ সমূহৰ ৰক্ষণাবেক্ষণ দিয়াৰ বাবে জন্মলগ্নৰে পৰা সংবাদ মাধ্যমে এক গুৰুদায়িত্ব পালন কৰি আহিছে আৰু আগন্তুক দিনতো এই ধাৰাবাহিকতা ৰক্ষা কৰিব বুলি মই আশাবাদী৷ আজিৰ এই অনুষ্ঠানত উপস্থিত থাকি মই অনুভৱ কৰিছোঁ যে এখন সুন্দৰ সমাজ নিৰ্মাণ কৰাই আপোনাসৱৰ উদ্দেশ্য৷ আপোনালোকে সমাজখনক সংঘাতৰ পৰিৱৰ্তে সমন্বয়ৰ যোগেদি শক্তিশালী হবলৈ এটি বাৰ্তা দিয়ে৷ কেৱল ইয়াতেই নহয়, সমগ্ৰ বিশ্বতেই সংবাদ মাধ্যমে এক জাগ্ৰত প্ৰহৰীৰ ভূমিকা পালন কৰি আহিছে৷ এক গঠনমূলক সমালোচনাৰে সংবাদ মাধ্যমৰ উপস্থিতি অতি প্ৰয়োজনীয়৷ আমি যেতিয়া এটি সামাজিক দায়িত্ব লওঁ, আমাক চোৱাচিতা কৰিবলৈ কোনোবাৰ প্ৰয়োজন হয়৷ আমাৰ সামাজিক আচৰণ, বক্তব্য দায়িত্বশীল হোৱা উচিত৷ তাতে যদি কৰবাত আউল লাগে, আমাক সোৱৰাই দিবলৈ প্ৰয়োজন আছে এটি সজাগ সংবাদ মাধ্যমৰ৷ জনসাধাৰণৰ কণ্ঠ হিচাপে, বাকস্বাধীনতাক সুৰক্ষিত কৰিবলৈ সংবাদ মাধ্যমে সদায়েই এটি গুৰুদায়িত্ব পালন কৰি আহিছে৷ এই দায়িত্ব এতিয়া আৰু বাঢ়িছে বিশেষকৈ সামাজিক মাধ্যমৰ যুগত৷ সামাজিক মাধ্যমৰ প্ৰত্যক্ষ কৰা সামাজিক মূল্যবোধ অৱক্ষয়ৰ এই পৰিস্থিতিত আমাৰ পৰম্পৰাগত সংবাদ মাধ্যমে যুঁজ দিব লাগিব৷
আমাৰ সমাজৰ যিসকল প্ৰবাদ প্ৰতিম পুৰুষে সামাজিক, সাংস্কৃতিক বা আধ্যাত্মিক ক্ষেত্ৰত উল্লেখযোগ্য বৰঙনি আগবঢ়াই দি থৈ যোৱা বাক্যবিলাকক গুৰু বাণী হিচাপে আমি গ্ৰহণ কৰিব লাগিব।
জ্যোতিপ্ৰসাদ আগৰৱালাই তাহানিতে কৈ গৈছিল “বিশ্ববিজয়ী ন-জোৱান”৷ আমিও আমাৰ অসমীয়া সমাজখনক বিশ্ব শ্ৰেষ্ঠ হিচাপে গঢ়ি তুলিব লাগিব। পৃথিৱীৰ যিকোনো প্ৰান্তত গ’লেও আমি আমাৰ শ্ৰেষ্ঠত্ব প্ৰতিপন্ন কৰিব পাৰিবই লাগিব।”
সোণোৱাল ডাঙৰীয়াই কয় যে বিজ্ঞান আৰু প্ৰযুক্তিৰ প্ৰভাৱ এতিয়া সকলো ক্ষেত্ৰতে বিদ্যমান কিন্তু ইয়াৰ যাতে ঋণাত্মক প্ৰভাৱ নপৰি কেৱল ধনাত্মক প্ৰভাৱ হে পৰে সেয়া আমি লক্ষ্য ৰাখিব লাগিব।আমি আমাৰ সমাজ ব্যৱস্থাত মানৱতা আৰু প্ৰযুক্তিৰ সামঞ্জস্যতা ৰাখিব লাগিব কিয়নো মানৱতাক বিসৰ্জন দি কেতিয়াও সমাজৰ উন্নতি সাধন কৰিব পৰা নাযায়।আমি আমাৰ অৰ্থনীতি উন্নত কৰিব লাগিব কিন্তু বায়ুমণ্ডল বা পৰিবেশ বিনষ্ট কৰি অৰ্থনৈতিক উন্নয়ন কেতিয়াও কাম্য নহয়। প্ৰকৃতি সুন্দৰ হৈ থাকিলেহে আমিও সু স্বাস্থ্যবান হৈ থাকিব পাৰিম৷ যদি প্ৰকৃতিয়ে ৰুগীয়া হৈ থাকিব আমি প্ৰাণীজগত নিৰোগী হৈ থাকিব নোৱাৰিম, তাহানিতে পৰম্পৰাগত যিটো চিকিৎসা পদ্ধতি সেইটো প্ৰকৃতিৰ পৰাই লাভ কৰা আমি চিকিৎসা পদ্ধতি যাৰ সদায় প্ৰয়োজনবোধ আছে।
সোণোৱালে লগতে কয় যে তাহানিতে লাচিত বৰফুকন ডাঙৰীয়াই যেনেকৈ সকলো ক্ষেত্ৰতে নিজৰ পাৰদৰ্শিতা দেখুৱাইছিল ঠিক তেনেকৈ আজি একবিংশ শতিকাত আমাৰ ছাত্ৰ – ছাত্ৰী সকলে সকলো ক্ষেত্ৰতে পাৰদৰ্শিতা প্ৰদৰ্শন কৰিব লাগিব কিয়নো এতিয়া প্ৰতিযোগিতাৰ যুগ আৰু সেয়েহে কেৱল এটা ক্ষেত্ৰত নহয় সকলো ক্ষেত্ৰতে পাৰ্গতালি প্ৰদৰ্শন কৰিব লাগিব।
তেওঁ শেষত কয় যে সংবাদ মাধ্যমে যেতিয়া সমালোচনা কৰে মই সদায় ভাল পাওঁ আৰু প্ৰশংসাক সদায় ভয় কৰোঁ- কিয়নো প্ৰশংসাত নিশ্চয়তা নাই কিন্তু সমালোচনাত আন্তৰিকতা থাকে৷ সেয়েহে সংবাদ মাধ্যমে বাঘৰ দৰে আমাৰ ওপৰত দৃষ্টি নিক্ষেপ কৰি থাকিলেহে আমাৰ দৰে ৰাজনৈতিক ব্যক্তিসকলৰ মেৰুদণ্ড সদায় পোন হৈ থাকিব।
সদৌ অসম মটক যুৱ-ছাত্ৰ পৰিষদ, গুৱাহাটী মহানগৰ সমিতি আৰু গুৱাহাটী ভলীবল ক’চিং চেন্টাৰৰ সহযোগত ৰাষ্ট্ৰীয় পৰ্যায়ৰ দিবা-নৈশ ভলীবল প্ৰতিযোগিতাখনি আজিৰে পৰা দুদিনীয়া কাৰ্যসূচীৰে গুৱাহাটীৰ জৰ্জ খেলপথাৰত অনুষ্ঠিত কৰা হয়। ১৩ আৰু ১৪ ডিচেম্বৰত মহানগৰীৰ জৰ্জ ফিল্ড দুদিনীয়া কাৰ্যসূচীৰে অনুষ্ঠিত কৰা হৈছে এই প্ৰতিযোগিতা।
প্ৰথম দিনৰ কাৰ্যসূচীত সদৌ অসম মটক যুৱ-ছাত্ৰ পৰিষদৰ মুখ্য উপদেষ্টা সত্য গোঁহায়ে খেলপথাৰ উদ্বোধন কৰাৰ লগতে প্ৰতিযোগিতাখনিৰ শুভাৰম্ভ কৰে অসম পৰিবহন নিগমৰ উপাধ্যক্ষ প্ৰণৱজ্যোতি লহকৰে। পতাকা উত্তোলন কৰে সদৌ অসম মটক যুৱ ছাত্ৰ পৰিষদৰ সভাপতি উদয় শংকৰ মহনে আৰু স্মৃতি তৰ্পক হিচাপে উপস্থিত থাকে সদৌ অসম মটক যুৱ ছাত্ৰ পৰিষদৰ সাধাৰণ সম্পাদক উজ্জ্বল বৰুৱা।
প্ৰথম দিনৰ কাৰ্যসূচীত বিশিষ্ট অতিথি হিচাপে উপস্থিত থাকে অসম অলিম্পিক সন্থাৰ সহকাৰী সাধাৰণ সম্পাদক দাদুমণি বৰা, অসম হেণ্ডবল সন্থাৰ সাধাৰণ সম্পাদক অমল নাৰায়ণ পাটোৱাৰী, লেখক-সাংবাদিক কমল কুমাৰ, বিশিষ্ট সমাজসেৱক কল্যাণ জ্যোতি গগৈ আৰু কমল কুমাৰ দাস। দেওবাৰে অনুষ্ঠিত হ’বলগীয়া দ্বিতীয় দিনাৰ কাৰ্যসূচীত চুড়ান্ত প্ৰতিযোগিতাৰ উদ্বোধক হিচাপে কেবিনেট মন্ত্ৰী পীযুষ হাজৰিকাৰ লগতে মুকলি সভা আৰু ক্ৰীড়ালোচনীৰ উন্মোচক হিচাপে জ্যেষ্ঠ সাংবাদিক ৰাজদীপ বাইলং বৰুৱা উন্মোচক হিচাপে উপস্থিত থাকিব বুলি উদ্যোক্তাসকলে জানিবলৈ দিয়ে।
বহু প্ৰতীক্ষাৰ অন্তত বিশেষ তদন্তকাৰী দল (SIT)য়ে ১২ ডিচেম্বৰত জুবিন গাৰ্গ হত্যাকাণ্ডৰ চাৰ্জশ্বীট আদালতত দাখিল কৰে। এই চাৰ্জশ্বীটত মুঠ ৭ জনক অভিযুক্ত কৰা হৈছে আৰু অভিযুক্তসকলৰ বিৰুদ্ধে ভাৰতীয় ন্যায় সংহিতা (BNS)ৰ বিভিন্ন গুৰুত্বপূৰ্ণ ধাৰা সংযোজন কৰা হৈছে। ইয়াৰ ভিতৰত আটাইতকৈ গুৰুত্বপূৰ্ণ ধাৰা হ’ল BNS 103 আৰু BNS 105।
SITৰ মতে, অভিযুক্ত শ্যামকানু মহন্ত, সিদ্ধাৰ্থ শৰ্মা, শেখৰ গোস্বামী আৰু অমৃতপ্ৰভা মহন্তৰ বিৰুদ্ধে BNS 105 ধাৰাৰ অধীনত হত্যাৰ গোচৰ ৰুজু কৰা হৈছে। আনহাতে সন্দীপন গাৰ্গৰ বিৰুদ্ধে BNS 105 ধাৰাৰ অধীনত অনিচ্ছাকৃত হত্যাৰ (culpable homicide) অভিযোগ উত্থাপন কৰা হৈছে। লগতে জুবিন গাৰ্গৰ দুই পিএছঅ’ নন্দেশ্বৰ বৰা আৰু পৰেশ বৈশ্যৰ বিৰুদ্ধে BNS 316 ধাৰাৰ অধীনত অপৰাধমূলক আস্থা ভংগৰ গোচৰ ৰুজু কৰা হৈছে।
ভাৰতীয় ন্যায় সংহিতাৰ (BNS) ১০৫ নং ধাৰা অনিচ্ছাকৃত হত্যাৰ সৈতে জড়িত। পূৰ্বে এই ধৰণৰ অপৰাধ ভাৰতীয় দণ্ডবিধি (IPC)ৰ ৩০৪ নং ধাৰাৰ অধীনত বিবেচিত হৈছিল। কিন্তু নতুন আইন BNS কাৰ্যকৰী হোৱাৰ পাছত এই অপৰাধক ১০৫ ধাৰাৰ অধীনত অন্তৰ্ভুক্ত কৰা হৈছে।
এই ধাৰা তেতিয়া প্ৰযোজ্য হয়, যেতিয়া কোনো ব্যক্তিয়ে হত্যা কৰাৰ উদ্দেশ্য নাথাকিলেও এনে কোনো কাম কৰে, যাৰ ফলত আন এজন ব্যক্তিৰ মৃত্যু হয়। অৰ্থাৎ অভিযুক্তই জানিছিল যে তেওঁৰ কামৰ ফলত মৃত্যুৰ সম্ভাৱনা আছে, কিন্তু হত্যাৰ স্পষ্ট উদ্দেশ্য নাছিল।
BNS 105 ধাৰাৰ অধীনত অপৰাধক গুৰুতৰ আৰু সাধাৰণতে জামিনবিহীন (non-bailable) অপৰাধ হিচাপে গণ্য কৰা হয়। সেয়েহে এই ধাৰাত গ্ৰেপ্তাৰ হোৱা ব্যক্তিয়ে সাধাৰণতে জামিন লাভ নকৰে। অৱশ্যে বিশেষ পৰিস্থিতিত আদালতে জামিন বিষয়টো বিবেচনা কৰিব পাৰে।
(লেখাটো বিভিন্ন দিশৰ পৰা তথ্য সংগ্ৰহ কৰি লেখা গৈছে। গতিকে এই ক্ষেত্ৰত অধিবক্তাৰ পৰামৰ্শ গ্ৰহণ কৰা ভাল।)
তেজপুৰত আৰক্ষীয়ে পাকিস্তানৰ সৈতে জড়িত চোৰাংচোৱা সংস্থাৰ সৈতে যোগাযোগ ৰখাৰ অভিযোগত ভাৰতীয় বায়ু সেনাৰ এজন অৱসৰপ্ৰাপ্ত বিষয়াক আটক কৰা ঘটনাই অঞ্চলটোত চাঞ্চল্যৰ সৃষ্টি কৰিছে। আটক কৰা ব্যক্তি গৰাকী তেজপুৰ পতিয়া চুবুৰীৰ নিবাসী কুলেন্দ্ৰ শৰ্মা বুলি চিনাক্ত কৰা হৈছে।
আৰক্ষীৰ সূত্ৰ অনুসৰি, কুলেন্দ্ৰ শৰ্মাৰ বিৰুদ্ধে সন্দেহজনক যোগাযোগৰ অভিযোগত গোচৰ ৰুজু কৰি তদন্তৰ অংশ হিচাপে তেওঁক আটক কৰা হৈছে। বৰ্তমান আৰক্ষীয়ে বিষয়টোক লৈ গভীৰভাৱে তদন্ত অব্যাহত ৰাখিছে।
উল্লেখযোগ্য যে, কুলেন্দ্ৰ শৰ্মা ভাৰতীয় বায়ু সেনা বাহিনীৰ এজন অৱসৰপ্ৰাপ্ত বিষয়া আছিল। ৰাষ্ট্ৰীয় নিৰাপত্তাৰ সৈতে জড়িত গুৰুত্বপূৰ্ণ বিষয় হোৱাৰ বাবে আৰক্ষী আৰু সংশ্লিষ্ট নিৰাপত্তা সংস্থাসমূহে ঘটনাটো গুৰুত্বসহকাৰে লৈ তদন্ত আগবঢ়াইছে।
এই ঘটনাক লৈ তেজপুৰ তথা সমগ্ৰ অঞ্চলজুৰি তীব্ৰ প্ৰতিক্ৰিয়া দেখা গৈছে। আৰক্ষীৰ তদন্ত সম্পূৰ্ণ হোৱাৰ পাছত অধিক তথ্য পোহৰলৈ আহিব বুলি জানিব পৰা গৈছে।
