ক’ৰোনা ৰোগীক সুস্থ কৰিবলৈ প্রথম আয়ুর্বেদিক ঔষধ পতঞ্জলিৰ ।

দৈনন্দিন বাৰ্তাৰ ডেস্ক : ক’ৰোনা ভাইৰাছত আক্ৰান্তক আৰোগ্য কৰিবলৈ সমগ্ৰ পৃথিৱীত গৱেষণা অব্যাহত আছে৷ ইতিমধ্যে ভেকছিন আবিষ্কাৰৰ দাবী কৰিছে৷ এইবাৰ আয়ুৰ্বেদিক শাস্ত্ৰও লাগি গ’ল ঔষধ আবিষ্কাৰৰ কামত৷ যোগগুৰু ৰামদেৱৰ কোম্পানী পতঞ্জলিয়ে প্ৰস্তুত কৰিলে ক’ৰোনা প্ৰতিৰোধী ঔষধ৷ এই ঔষধে মাত্ৰ এসপ্তাহতে সম্পূৰ্ণ সুস্থ কৰি তুলে ক’ৰোনা ৰোগী৷ মঙলবাৰে ঔষধৰ কথা এনেদৰে দাবী কৰিলে এই কোম্পানীটোৱে৷ ইয়াৰ আগেয়ে ক’ৰোনা ৰোধত গো-মূত্র পান বা যোগাভ্যাসৰ কথা শুনিবলৈ পোৱা গৈছিল ৰামদেৱৰ মুখত৷ এতিয়া পতঞ্জলিৰ তৰফৰ পৰা জনোৱা হ”ল যে ক’ভিড-১৯ ৰোধত বিশ্বৰ প্ৰথম আয়ুর্বেদিক ঔষধ তৈয়াৰ কৰিলে৷ এই ঔষধে প্ৰতিষেধক হিচাপে কাম নকৰিলেও ক’ৰোনা আক্ৰান্তক সুস্থ কৰি তুলিব৷ ‘কৰোনীল আৰু শ্বাসৰি’ নামৰ এই ঔষধ ক’ভিড ৰোগীৰ ওপৰত পৰীক্ষা কৰি চোৱা হৈছে৷ এই ঔষধ প্ৰয়োগত সুস্থতাৰ পৰিমাণ ১০০ শতাংশ বুলি কোম্পানীটোৱে উল্লেখ কৰিছে৷ আজি হৰিদ্বাৰত সাংবাদিকৰ আগত ৰামদেৱে সমগ্ৰ বিশ্ব ন’ভেল ক’ৰোনা ভাইৰাছৰ ভেকছিন বা ঔষধৰ অপেক্ষাত আছে৷ তেওঁ অতি গৌৰৱে কয়, পতঞ্জলি ৰিচাৰ্চ চেণ্টাৰ আৰু এনআইএমএছৰ অক্লান্ত চেষ্টাত প্রথম আয়ুর্বেদিক ঔষধ আমি আনিছো৷ ইয়াক ইতিমধ্যে ক’ৰোনা ৰোগীৰ ওপৰত পৰীক্ষা কৰি চোৱা হৈছে৷ যাৰ প্ৰমাণ আমাৰ হাতত আছে৷ এই ঔষধত তিনি দিনৰ পৰা সাত দিনৰ ভিতৰত ১০০ শতাংশ সুস্থ হৈ উঠে ক’ৰোনা আক্ৰান্ত৷ পতঞ্জলিৰ চিইঅ’ আচার্য বালকৃষ্ণই কয়, ৫৪৫ টকাত ইয়াৰ এটা কিট পোৱা যাব৷ ইয়াৰ দ্বাৰা চলিব এমাহ৷ অহা সপ্তাহৰ মাজভাগত পতঞ্জলিৰ ষ্ট’ৰত এই কিট উপলব্ধ হ’ব৷ ঘৰতে বহি ঔষধ বিচাৰাৰ বাবে এটা এপ অনা হৈছে৷