গান্ধীমণ্ডপৰ জৰাজীৰ্ণ পথে দুৰ্ভোগ ভোগাইছে পথচাৰীক ৷ পাহাৰৰ মাটিৰে ভৰি পৰিছে নলা, কুম্ভকৰ্ণৰ নিদ্ৰাত গুৱাহাটী পৌৰনিগম-গড়কাপ্তানি বিভাগ ৷

0 1,128

গুৱাহাটী : গুৱাহাটী মহানগৰীৰ উলুবাৰীস্হিত গান্ধী মণ্ডপ পথৰ জৰাজীৰ্ণ অৱস্হাই পথচাৰীক দুৰ্ভোগ ভোগাইছে ৷ জানিব পৰা মতে মহামানৱ মহাত্মা গান্ধীৰ প্ৰতিমূৰ্ত্তি থকা গান্ধীমণ্ডপৰ পথচোৱাত কেইবা ঠাইত প্ৰকাণ্ড গাঁতৰ সৃষ্টি হৈছে ৷ ইয়াৰ সমান্তৰালভাৱে পথচোৱাত থকা নলাসমূহ পাহাৰৰ মাটিৰে ভৰি পৰিছে ৷ বিগত কেইদিনমান বৰষুণ দিয়াৰ ফলত পাহাৰৰ মাটি খহি আহি নলাসমূহ পুতি পেলাইছে ৷ যাৰ বাবেই এজাক বৰষুণ দিলে পথচোৱাৰে নদী সদৃশ ঢাৰ বয় ৷ সেইবাবেই পথচোৱাৰ যথেষ্ট পৰিমাণৰ গাঁতৰ সৃষ্টি হৈছে ৷ এই ক্ষেত্ৰত পথচাৰী অহা যোৱাৰ ক্ষেত্ৰত দুৰ্ভোগ ভুগিবলগীয়া হৈছে ৷ ইপিনে চলিত সপ্তাহত কেইবাটাও ভূমিস্খলনৰ ঘটনা সংঘটিত হয় ৷ যাৰ ফলত পথচোৱাত শিল মাটিৰ দমৰে ভৰি আছে ৷ ইয়াৰ বাবেই গাড়ী মটৰ অহা-যোৱাৰ ক্ষেত্ৰত যথেষ্ট অসুবিধাৰ সন্মুখীন হৈছে৷ স্হানীয় ৰাইজে বিভাগীয় কৰ্তৃপক্ষক অৱগত কৰাৰ পিছতো কোনো ধৰণৰ পদক্ষেপ গ্ৰহণ নকৰাৰ অভিযোগ উত্থাপন হৈছে ৷ প্ৰাতঃভ্ৰমণ কৰিবলৈ অহা একাংশ লোকৰ অভিযোগ পথচোৱাৰে গাড়ী মটৰৰ লগতে খোজকাঢ়ি যাব নোৱৰা অৱস্থা হৈছে ৷ তৎস্বত্বেও গড়কাপ্তানি বিভাগৰ লগতে গুৱাহাটী পৌৰনিগম কুম্ভকৰ্ণৰ নিদ্ৰাত মগ্ন বুলি একাংশ পথচাৰীয়ে অৱগত কৰে৷ স্থানীয় ৰাইজে উক্ত পথচোৱাৰ পুননিৰ্মাণৰ লগতে নলাসমূহ পৰিস্কাৰ কৰিবলৈ বিভাগীয় কৰ্তৃপক্ষক দাবী জনায় ৷