গুৱাহাটীৰ পৰা অহা লোকসকলক স্বাৱ পৰীক্ষাৰ বাবে আহ্বান নাজিৰা মহকুমা প্ৰশাসনৰ।

নাজিৰা : কিছুদিনৰ পৰা গুৱাহাটী ক’ভিদ-১৯ৰ অভিকেন্দ্ৰ হিচাবে চিনাক্ত হৈছে আৰু গুৱাহাটীৰ বহুলোক এই ৰোগত আক্ৰান্ত হৈছে বুলি ধৰা পৰিছে। ক’ভিদ-১৯ ৰ সংক্ৰমণ ৰোধ কৰাৰ লগতে নাজিৰা মহকুমাটিক সুৰক্ষিত কৰাৰ স্বাৰ্থত গুৱাহাটীৰ পৰা নাজিৰালৈ অহা লোকসকলৰ স্ব-ইচ্ছাই স্বাব পৰীক্ষা কৰাটো অতিকে প্ৰয়োজনীয়। গতিকে এই সময়ত গুৱাহাটীৰ পৰা যিসকল লোক নাজিৰালৈ আহিছে তেখেতসকলক স্ব-ইচ্ছাৰে অনতিপলে গড়গাওঁ মহাবিদ্যালয়ত স্থাপন কৰা স্বাস্থ্য বিভাগৰ “স্বাব সংগ্ৰহ কেন্দ্ৰ”ত নিজৰ স্বাব পৰীক্ষাৰ বাবে দিবলৈ নাজিৰা মহকুমা প্ৰশাসনৰ তৰফৰ পৰা অনুৰোধ জনাইছে। লগতে এই স্বাব পৰীক্ষাৰ ফলাফল লাভ নকৰা পৰ্যন্ত নিজৰ লগতে পৰিয়ালৰ সদস্যসকলক গৃহ পৃথকীকৰণ হৈ থাকিব বাবে প্ৰশাসনৰ তৰফৰ পৰা পুনৰবাৰ অনুৰোধ জনাই নাজিৰা মহকুমাৰ ভাৰপ্ৰাপ্ত মহকুমাধিপতি তথা অতিৰিক্ত উপায়ুক্ত সম্প্ৰীতি গোস্বামীয়ে এই ক্ষেত্ৰত নাজিৰাবাসীৰ যোগাত্মক সঁহাৰিয়ে প্ৰশাসনক ক’ভিদ-১৯ মহামাৰীৰ বিৰুদ্ধে যুঁজখনক সফল কৰি তোলাত অৰিহনা যোগাব বুলি আশা প্ৰকাশ কৰে।