পাইলট আক্ৰান্ত ক’ৰোনাত : মাজ আকাশৰ পৰা ঘুৰি আহিল মস্কো অভিমুখী বিমান ।
দৈনন্দিন বাৰ্তাৰ নিজা সেৱা :
ককপিটত ক’ৰোনা ভাইৰাছ ৷ পাইলটৰ শৰীৰত পোৱা গ’ল মাৰাত্মক ক’ভিড-১৯ বীজাণু ৷ ফলত আজি মাজ আকাশৰ পৰাই ঘুৰাই আনিবলৈ বাধ্য হ’ল এয়াৰ ইণ্ডিয়াৰ দিল্লীৰ পৰা মস্কো অভিমুখী বিমান ৷ দিনৰ ১২.৩০ বজাত দিল্লী বিমান বন্দৰত অবতৰণ কৰে এয়াৰবাছ এ-৩২০ নিঅ’ ৷ আনহাতে নিয়ম মানি চালকসকলক কোৱাৰেণ্টাইন কৰা হৈছে ৷ মাজ আকাশত কিদৰে পাইলট ক’ৰনাত আক্ৰান্ত হোৱাৰ খবৰ পোৱা গ’ল, এই প্ৰশ্নৰ উত্তৰত বিমান প্ৰতিষ্ঠানটোৱে জনাইছে যে প্ৰি-ফ্লাইট টেষ্ট ৰেকৰ্ড বা বিমান৷যাত্ৰা আৰম্ভ কৰাৰ আগেয়ে ক’ৰনা পজিটিভ পালেও ভুলবশতঃ নিগেটিভ বুলি দিয়ে গ্ৰাউণ্ড দলক ৷ ফলত নিয়মমাফিক উৰণ আৰম্ভ কৰে চালকে ৷ কৰ্মীৰ এনে গাফিলতিত প্ৰশ্নৰ সন্মুখীন হৈছে বিমান প্ৰতিষ্ঠানটো ৷ তাৰ মাজতে স্বস্তিৰ বিষয় যে বিমানত কোনো যাত্ৰী নাছিল ৷ ৰাছিয়াৰ মস্কোৰ পৰা সেই বিমানত আবদ্ধ ভাৰতীয় নাগৰিকক আনিবলৈ গৈছিল বিমানখন ৷ ইতিমধ্যে আন এখন বিমান পঠোৱাৰ ব্যৱস্থা কৰে এয়াৰ ইণ্ডিয়াই ৷