ক’ৰোনা লৈ শাসকীয় পক্ষৰ ৰাজনীতি : গভীৰ উদ্বেগ প্ৰকাশ বিধায়িনী দলৰ দলপতি দেৱব্ৰত শইকীয়াৰ।

নাজিৰা : ৰাজ্যৰ শাসকীয় পক্ষই ৰাজনৈতিক হেঁচাৰ ফলত Indian Council For Medical Research (আই চি এম আৰ) ৰে ক’ভিড-১৯ ৰ ভেকচিন সঠিকভাৱে পৰীক্ষা নকৰাকৈ ১৫ আগষ্টৰ ভিতৰত বজাৰত মুকলি কৰি দিয়াৰ যো-জা চলোৱাক লৈ উদ্বেগ প্ৰকাশ কৰিছে অসম বিধান সভাৰ বিৰোধী দলপতি দেৱব্ৰত শইকীয়াই। এক প্ৰেছ বিজ্ঞপ্তি যোগে শইকীয়াই কয় যে ভাৰত বায়োটেক ইণ্টাৰনেছনেল লিমিটেড (BBIL) ৰ পৃষ্ঠাপোষকতাত ক’ভাকচিন নামেৰে কোভিডত-১৯ ৰ এটা ভেকচিন প্ৰস্তুত কৰাৰ প্ৰক্ৰিয়া যোৱা মে’ মাহৰ পৰা আৰম্ভ কৰা হৈছে। শেহতীয়াকৈ এই ভেকচিনটো প্ৰস্তুতিকৰণ প্ৰক্ৰিয়া অস্বাভাৱিকভাৱে ক্ষীপ্ৰ কৰাৰ প্ৰচেষ্টা কৰা হৈছে, যিটো সঠিক নহয়। গোটেই বিশ্বতে এতিয়া বিভিন্ন দেশত কোভিড প্ৰতিষেধক নিৰ্মাণ কৰাৰ বাবে গৱেশনা চলি আছে। ইউৰোপৰ এটা কোম্পানীয়ে এনে প্ৰতিষেধক অহা ছেপ্তেম্বৰত তৈয়াৰ হ’ব পাৰে বুলি ঘোষণা কৰিছে। চীন দেশটো ৫ টা প্ৰতিষেধক গৱেষণা চলি আছে আৰু এই বছৰৰ শেষৰ ফালে এটা বজাৰত ওলাব পাৰে বুলি জানিব পৰা গৈছে। ইতিপূৰ্বে পলিঅ’, ডিপথেৰিয়া, সৰু আই, ৰুবেলা আদি বিভিন্ন ৰোগৰ প্ৰতিষেধক বেজী ওলাইছে কিন্তু এইবিলাকৰ ক্ষেত্ৰত বহু বছৰ গৱেষণাৰ ফলত পোৱা গৈছে। আমেৰিকা যুক্তৰাষ্ট্ৰ চৰকাৰেও কৈছে যে একৰ পৰা ডেৰ বছৰৰ পিছতহে এটা কৰ’নাৰ প্ৰতিষেধক ওলাব পাৰে। শইকীয়াই কয় যে বিশেষজ্ঞৰ অনুসৰি যিকোনো ভেকচিন প্ৰস্তুত কৰোতে দুবছৰৰ পৰা পাচ বছৰ সময় লাগে। কোভিড-১৯ ৰ ক্ষেত্ৰত চীনকে ধৰি কোনো দেশে এই বছৰৰ শেষ ভাগৰ আগত ভেকচিন প্ৰস্তুত কৰিব পাৰিব বুলি দাবী কৰিব পৰা নাই। আই চি এম আৰৰ প্ৰাক্তন সঞ্চালক প্ৰধান এন কে গাংগুলীৰ উক্তি দি দেৱব্ৰত শইকীয়াই কয় যে ভাৰতত ক’ভিড-১৯ ভেকচিন প্ৰস্তুত কৰিবলৈ কমেও ১৮ মাহ সময় লাগিব। কাৰণ এটা ভেকচিন প্ৰস্তুত কৰোতো বহু প্ৰকাৰৰ সঠিক পৰীক্ষাৰ প্ৰয়োজন হয়। এই পৰীক্ষা প্ৰক্ৰিয়াৰ ভিতৰত নিগনি, বান্দৰ আদিৰ ওপৰত ভেকচিনটো পৰীক্ষা কৰাৰ উপৰিও মানুহৰ ওপৰত কমেও তিনিটা পৰ্যায়ৰ পৰীক্ষা কৰিব লাগিব। তেনেস্থলত মে’ মাহত প্ৰক্ৰিয়া আৰম্ভ কৰি আগষ্ট মাহৰ ভিতৰত যদি কোনো ভেকচিন প্ৰস্তুত কৰা যায় সেই ভেকচিন ক’ভিড-১৯ প্ৰতিৰোধত কিমান সফল হ’ব সেইটো সহজে অনুমেয়। বিৰোধী দলপতি দেৱব্ৰত শইকীয়াই লগতে কয় যে শাসকীয় দলে পৰিকল্পনা কৰা যেন লাগিছে যাতে ১৫ আগষ্টত যেতিয়া প্ৰধান মন্ত্ৰীয়ে দেশবাসীক সম্বোধন কৰিব তেতিয়া ভাৰতে ক’ভিড-১৯ ৰ ভেকচিন প্ৰস্তুত কৰিছে বুলি ঘোষণা কৰি বাঃ বাঃ ল’ব পাৰে। কিন্তু ভেকচিনটো ক্ৰিয়া তথা পাৰ্শ্বক্ৰিয়া ভালকৈ অনুধাৱন নকৰাকৈ ব্যৱহাৰৰ বাবে মুকলি কৰি দিলে হিতে বিপৰিত হোৱাটো নিশ্চিত। সেই হেতুকে অধিক সময় লাগিলেও সঠিক পৰীক্ষা প্ৰক্ৰিয়া অৱলম্বন নকৰাকৈ এই ভেকচিন ভাৰতৰ বজাৰত মুকলি কৰি দিয়াটো উচিত নহ’ব বুলি বিৰোধী দলপতি গৰাকীয়ে বিবৃতিটোত লগতে মত প্ৰকাশ কৰে।