৫ বছৰত প্ৰধানমন্ত্ৰী নৰেন্দ্ৰ মোডীৰ বিদেশ ভ্ৰমণৰ নামত খৰচ ৫১৭ কোটি ৮২ লাখ টকা

অনলাইন বাৰ্তা : ঘনে ঘনে বিদেশ ভ্ৰমণ কৰে প্ৰধানমন্ত্ৰী নৰেন্দ্ৰ মোডীয়ে৷ ইয়াকে লৈ বিৰোধী শিবিৰে বিভিন্ন সময়ত কটাক্ষ কৰি আহিছে ৷ এই সংক্ৰান্তত মঙলবাৰে ৰাজ্যসভাত এক প্ৰশ্নৰ উত্তৰত ৰাজ্যিক বিদেশ মন্ত্ৰী ভি মুৰুলীধৰণে জনায় যে ২০১৫ চনৰ পৰা যোৱা ৫ বছৰত ৫৮ খন দেশ ভ্ৰমণ কৰাৰ বাবে প্ৰধানমন্ত্ৰীৰ হৈ ৫১৭ কোটি ৮২ লাখ টকা কেন্দ্ৰই খৰচ কৰিছে ৷ ইয়াৰ পাচতে এই বিষয়লৈ প্ৰশ্ন উত্থাপন হোৱা আৰম্ভ কৰিছে ৷ এই তথ্যত বিৰোধীয়ে নৰেন্দ্ৰ মোডীক আক্ৰমণৰ নতুন অস্ত্ৰ তুলি লয় ৷ ৰাজ্যসভাৰ এক লিখিত প্ৰশ্নৰ উত্তৰত মন্ত্ৰী মুৰলীধৰণে কয়, ২০১৫ চনৰ মাৰ্চৰ পৰা ২০১৯ চনৰ নৱেম্বৰ পৰ্যন্ত মুঠ ৫৮ খন দেশ ভ্ৰমণ কৰিছে প্ৰধানমন্ত্ৰী নৰেন্দ্ৰ মোডীয়ে ৷ ইয়াৰ ফলত মুঠ খৰচ হৈছে ৫১৭ কোটি ৮২ লাখ টকা ৷ এই সময়ৰ মাজত বিশ্বৰ বিভিন্ন দেশৰ সৈতে ভাৰতৰ নানা বিষয়ক চুক্তি হৈছে বুলি উল্লেখ কৰি তেওঁ লগতে কয়, প্ৰধানমন্ত্ৰীৰ বিদেশ ভ্ৰমণৰ ফলত বিভিন্ন দেশৰ সৈতে ব্যৱসায়িক সম্পৰ্ক বৃদ্ধি পোৱাৰ লগে লগে ভাৰতত বিদেশী বিনিয়োগৰ পৰিমাণ বাঢ়িছে ৷ বিভিন্ন দেশৰ সৈতে তথ্যপ্রযুক্তি, মেধা, মহাকাশ আৰু প্ৰতিৰক্ষা সংক্ৰান্তীয় বিষয়ত যৌথ উদ্যোগত বহু কাম আৰম্ভ হৈছে ৷ দ্বিপাক্ষিক সম্পর্ক দৃঢ় হোৱাৰ উপৰি আঞ্চলিক আৰু বিশ্বৰ বিভিন্ন বিষয়ত ভাৰতৰ মনোভাৱৰ বিষয়ে বাৰ্তা পাইছে আন দেশবোৰে ৷ ফলত ভাৰতৰ উন্নয়ন সংক্ৰান্তীয় বিষয়ত দেশৰ নাগৰিকে অর্থনৈতিক অৱস্থা আৰু স্বাচ্ছন্দ্যৰ ক্ষেত্ৰত কিছু হ’লেও পৰিৱৰ্তন আহিছে ৷ উল্লেখ্য যে যোৱা মাৰ্চ মাহত লোকসভাত এই বিষয়ে পৰিসংখ্যা দিছিল মন্ত্ৰী মুৰলীধৰণে ৷ তাত উল্লেখ কৰিছিল যে মোডীৰ বিদেশ ভ্ৰমণৰ বাবে ২০১৫-১৬ চনত ১২১ কোটি ৮৫ লাখ টকা, ২০১৬-১৭ চনত ৭৮ কোটি ৫২ লাখ টকা, ২০১৭-১৮ চনত ৯৯ কোটি ৯০ লাখ টকা, ২০১৮-১৯ চনত ১০০ কোটি ২ লাখ টকা আৰু ২০১৯-২০ চনত ৪৬ কোটি ২৩ টকা খৰচ হৈছে ৷