প্ৰজাপিতা ব্ৰহ্মকুমাৰী ঈশ্বৰীয় বিশ্ববিদ্যালয়ে সমাজৰ বিভিন্ন ক্ষেত্ৰলৈ অৱদান আগবঢ়োৱা ব্যক্তিসকলক গুৱাহাটীত বিশেষ সন্মান আৰু সম্বৰ্ধনা জ্ঞাপন কৰে । গুৱাহাটীৰ মাছখোৱাৰ প্রাগজ্যোতি সাংস্কৃতিক প্ৰকল্পত শুকুৰবাৰে নিশা প্ৰজাপিতা ব্ৰহ্মকুমাৰী ঈশ্বৰীয় বিশ্ববিদ্যালয়ৰ উদ্যোগত বিশ্ব মানৱতা দিৱস(world humanitarian day) পালন কৰা হয়। জন্মাষ্টমীৰ লগত সংগতি ৰাখি অনুষ্ঠিত হোৱা অনুষ্ঠানটিত মুখ্য অতিথি হিচাপে উপস্থিত থাকে প্ৰজাপিতা ব্ৰহ্মকুমাৰী ঈশ্বৰীয় বিশ্ববিদ্যালয়ৰ চণ্ডীগড় শাখাৰ ভাৰপ্ৰাপ্ত বেহেন – বি. কে. অনিতা। বি.কে. অনিতাই মানৱ জীৱনৰ দর্শন আৰু মানৱতাবোধৰ ওপৰত ভাষণ প্ৰদান কৰে। অনুষ্ঠানত বিশিষ্ট ব্যক্তি হিচাপে উপস্থিত থাকে পদ্মশ্ৰী উপাধিৰে সন্মানিত বিশিষ্ট সমাজকৰ্মী যাদৱ পায়েং আৰু বিৰুবালা ৰাভাৰ লগতে পলাশবাৰী বিধানসভা সমষ্টিৰ বিধায়ক হেমাংগ ঠাকুৰীয়া।
সমাজৰ বিভিন্ন ক্ষেত্ৰলৈ সেৱা তথা অৱদান আগবঢ়োৱা ব্যক্তিসকলক এখনি মানপত্ৰ, ট্ৰফি, গামোচা, স্বল, গছৰ পুলি আৰু খাদ্যৰ টোপোলাৰে সম্বৰ্ধনা জ্ঞাপন কৰা হয়। অনুষ্ঠানত সমৃদ্ধিৰ সভাপতি তথা সাংবাদিক ভাস্বতী শৰ্মা, বিশিষ্ট সাংবাদিক হাইদৰ হুচেইন, চিকিৎসক ডঃ প্ৰসন্ন মল্ল বুজৰবৰুৱা, লায়নচ ক্লাৱৰ দলজিৎ সিং, সূৰ্য্য বৰদলৈ, নয়নমণি চোধুৰী, বিভিন্ন এন জি অ’ৰ বিষয়ববীয়াকে ধৰি বিভিন্ন ক্ষেত্ৰলৈ সেৱা আগবঢ়োৱা ব্যক্তিসকলক সন্মান জনোৱা হয়।
সমাজকৰ্মী তথা সাংবাদিক ভাস্বতী শৰ্মাই এই সন্মান লাভ কৰে।উল্লেখযোগ্য যে, ভাস্বতী শৰ্মাই বিগত ১০বছৰ ধৰি সমাজৰ বিভিন্ন ক্ষেত্ৰলৈ সেৱা আগবঢ়াই আহিছে। মহিলা সৱলীকৰণৰ বাবে বিভিন্ন সজাগতামূলক কাৰ্য্যসূচী গ্ৰহণ কৰাৰ উপৰিও ৰাজ্যৰ বিভিন্ন ঠাইত বিনামূলীয়া চিকিৎসা শিবিৰৰ আয়োজন কৰি, কৰ’না মহামাৰীৰ সময়চোৱাত সহস্ৰাধিক দৰিদ্ৰ লোকক খাদ্যৰ যোগান ধৰিছে। উলুবাৰীত ৰাস মহোৎসৱ অনুষ্ঠিত কৰাৰ লগতে অম্বুবাচীৰ সময়চোৱাত ২৪ঘণ্টা বিশুদ্ধ খোৱাপানী যোগান ধৰাৰ বাবে ইতিমধ্যে বহুবাৰ অসম চৰকাৰৰ দ্বাৰা সন্মানিত হৈছে।অনুষ্ঠানত চৈতন্য ৰাধা-কৃষ্ণ উপস্থাপন কৰাৰ লগতে ভগৱান শ্ৰী কৃষ্ণৰ জীৱনৰ আধাৰত বহুকেইটা নৃত্য পৰিৱেশন কৰে কণ-কণ শিক্ষাৰ্থীয়ে।অনুষ্ঠানত ৰাজ্যৰ প্ৰায় ১৩০গৰাকী সমাজকৰ্মীক সম্বৰ্ধনা জনোৱা হয়।
