ৰিয়া চক্ৰৱৰ্তীৰ মুম্বাইৰ ঘৰত এনচিবিৰ তালাচী

দৈনন্দিন বাৰ্তা ডেস্ক : ৰিয়া চক্ৰৱৰ্তীৰ মুম্বাইৰ ঘৰত শুকুৰবাৰে পুৱাই নাৰ্ক’টিক্স কণ্ট্ৰোল ব্যুৰ (এনচিবি)ৰ এটা দলে তালাচী অভিযান চলায় ৷ সুশান্ত সিং ৰাজপুতৰ মৃত্যু ৰহস্য মাদক দ্ৰব্যৰ তদন্ত কৰিবৰ বাবেই ৰিয়াৰ ঘৰত এনচিবিৰ বিষয়া গৈছিল ৷ সুশান্ত সিং ৰাজপুতৰ ঘৰৰ মেনেজাৰ ছেমুৱেল মিৰাণ্ডাৰ ঘৰতো একেদিনাই পুৱা এনচিবিৰ আন এটা দলে তালাচী অভিযান চলায় ৷ এই তালাচী অভিযানৰ পাচত ৰিয়াৰ ভাতৃ শৌভিক আৰু মিৰাণ্ডাক ঘৰৰ পৰা নিজৰ কাৰ্যালয়লৈ লৈ যায় তদন্তকাৰী বিষয়াসকলে৷ মাদক দ্ৰব্যৰ ক্ষেত্ৰত সবিশেষ জানিবলৈ তেওঁলোক দুয়োজনকে নিয়া হয় বুলি জনাইছে তদন্তকাৰী সংস্থাটোৱে ৷ এই তালাচীৰ সৈতে জড়িত এজন বিষয়াই কয়, এনবিচিৰ বিষয়া ৰিয়া চক্ৰৱৰ্তীৰ মুম্বাইৰ ঘৰলৈ গৈছিল ৷ আন এটা দল ছেমুৱেল মিৰাণ্ডাৰ ঘৰলৈ গৈছিল ৷ এই তালাচী আৰু তদন্তৰ পাচত শৌভিকৰ লেপটপ বাজেয়াপ্ত কৰা হৈছে৷ ৱাটছেপটৰ চাটত সুশান্তৰ মৃত্যু ৰহস্য মাদক দ্ৰব্য বিষয়টো আহিছিল ৷ তাৰ পাচতে তদন্ত আৰম্ভ কৰে নাৰ্ক’টিক্স কণ্ট্ৰোল ব্যুৰে ৷ ৰিয়া চক্ৰৱৰ্তীৰ ভাতৃ শৌভিকৰ সৈতে মদ বিক্ৰেতা জাইদ ভিলাত্ৰাৰ যোগাযোগৰ বিষয়টো জানিব পাৰে এনচিবিৰ বিষয়াই ৷ ইতিমধ্যে ভিলাত্ৰাক গ্ৰেপ্তাৰ কৰিছে এনচিবিয়ে ৷ এই ভিলাত্ৰা, মিৰাণ্ডা আৰু শৌভিক মদ সৰবৰাহ কৰিছিল বুলি জানিব পৰা গৈছে ৷ আনহাতে জেৰাৰ সময়ত এনচিবিক ভিলাত্ৰাই জনায়, বছিত পৰিহাৰৰ যোগেৰে তেওঁৰ সৈতে শৌভিক আৰু ছেমুৱেলৰ যোগাযোগ হৈছিল ৷ আনহাতে বছিতক আৰক্ষীয়ে গ্ৰেপ্তাৰ কৰে৷ ম’বাইল ফোনৰ বিভিন্ন চাটত মদ ব্যৱহাৰ, সৰবৰাহৰ বিষয়টো আহিছে ৷ ইয়াৰ পাচতে শৌভিক আৰু ছেমুৱেলক এনচিবিয়ে সন্দেহৰ তালিকাত লয় ৷