চলিত ফিফা বিশ্বকাপত কালি লিঅ’নেল মেছিৰ শক্তিশালী আৰ্জেণ্টিনাৰ বিৰুদ্ধে ২-১ গ’লত অনাকাংক্ষিত জয়ৰ পাছত, এই জয়ৰ আনন্দত উপভোগৰ বাবে আজি চৌদি আৰৱত ঘষণা কৰা হৈছে ৰাষ্ট্ৰীয় বন্ধ। আজি দেশখনৰ সকলো চৰকাৰী-বেচৰকাৰী কৰ্মচাৰীয়ে ছুটী পাব বুলি ঘোষণা কৰিছে চৌদিৰ ৰজা ছলমানে। এই আনন্দ উপভোগৰ বাবে আজি চৌদিৰ বিদ্যালয়সমূহো বন্ধ থাকিব।
ৰয়েল ক’ৰ্টৰ উপদেষ্টা তথা চৌদি আৰৱৰ সাধাৰণ মনোৰঞ্জন কৰ্তৃপক্ষৰ মুৰব্বী তুৰ্কী আল শ্বেইখে টুইটাৰযোগে ঘোষণা কৰে যে আজি চহৰখনৰ প্ৰধান থিম পাৰ্ক আৰু মনোৰঞ্জন কেন্দ্ৰসমূহত প্ৰৱেশ মাচুল ৰেহাই দিয়া হ’ব।
উল্লেখ্য যে, কালি ডোহাৰ লুছাইল ষ্টেডিয়ামত আৰ্জেন্টিনাক ২-১ গলৰ ব্যৱধানত পৰাস্ত কৰি চমক সৃষ্টি কৰিছিল চৌদি আৰৱে। বিশ্বকাপৰ হট ফেভাৰিট তাৰকাসমৃদ্ধ আৰ্জেন্টিনাক পৰাস্ত কৰি সমগ্ৰ বিশ্বক হতবাক কৰি তুলিছিল দলটোৱে।
খেলৰ মাত্ৰ দহ মিনিটতে লিঅ’নেল মেছিয়ে পেনাল্টি কাৰ্যকৰী কৰি আৰ্জেন্টিনাক প্ৰথমেই অগ্ৰগতি প্ৰদান কৰিলেও খেলৰ ৪৮ আৰু ৫৩ মিনিটত চৌদিৰ দুই তাৰকা ক্ৰমে ছালেহ আল শ্বেহৰী আৰু চালেম আল ডাউছাৰীৰ দৰ্শনীয় গলেৰে চলিত বিশ্বকাপৰ প্ৰথমটো অঘটন ঘটায়।
মেচখনৰ চূড়ান্ত হুইচেল বজোৱাৰ পিছতে চৌদিৰ ৰাজধানী ৰিয়াদৰ লগতে দেশৰ সমগ্ৰ প্ৰান্ততে এই জয় উদযাপন বাবে জনসাধাৰণে ৰাজপথত ভিৰ কৰে।