২ নবেম্বৰৰ পৰা পুনৰ খোলা হ’ব ৰাজ্যৰ শিক্ষানুষ্ঠান

ডিজিটেল ডেস্কঃ জনতা ভৱনত শিক্ষামন্ত্ৰী হিমন্ত বিশ্ব শৰ্মাৰ সংবাদমেল সম্বোধন। সংবাদমেলত শিক্ষামন্ত্ৰী গৰাকীয়ে বহু গুৰুত্বপূৰ্ণ ঘোষণা কৰে। অহা ২ নবেম্বৰৰ পৰা অসমতত খোলা হ’ব শিক্ষানুষ্ঠানসমূহ। ষষ্ঠ শ্ৰেণীৰ পৰা ক্লাছ আৰম্ভ হ’ব তাৰ পৰিবৰ্তে পঞ্চম শ্ৰেণীলৈকে বন্ধ থাকিব পাঠদান৷ এটা শ্ৰেণীত ২০ বা ২৫ জনৰ অধিক ছাত্ৰ-ছাত্ৰী থাকিব নোৱাৰিব, যদিহে অৱশ্যে ডাঙৰ হলত ক্লাছ কৰে তেন্তে ছাত্ৰ-ছাত্ৰীৰ সংখ্যা বৃদ্ধি কৰিব পাৰিব। শ্ৰেণীসমূহৰ বাবে বাৰ নিৰ্দিষ্ট কৰি দিয়া হৈছে৷ আণ্ডাৰ গ্ৰেজুৱেটৰ প্রথম ষান্মাসিকৰ ছাত্ৰ-ছাত্ৰীৰ বাবে সোমবাৰ আৰু বৃহস্পতিবাৰ., তৃতীয় ষান্মাসিকৰ ছাত্ৰ-ছাত্ৰী মঙলবাৰ, বুধবাৰ, শুকুৰবাৰ আৰু পঞ্চম ষান্মাসিকৰ মঙলবাৰ, বুধবাৰ, শুকুৰবাৰ আৰু শনিবাৰে ক্লাছ কৰিব লাগিব৷ পুৱা ৮.৩০ বজাৰ পৰা বিদ্যালয়সমূহ খোলা হ’ব লগতে ৫০ শতাংশকৈ পুৱা আৰু বিয়লি দুটা ভাগত ভাগ কৰি প্ৰথম ভাগত ৮.৩০ বজাৰ পৰা ১২.৩০ বজালৈ এটা শ্ৰেণী আৰু দ্বিতীয় ভাগত ১.৩০ৰ পৰা ৪.৩০ বজালৈ শ্ৰেণী হ’ব। কেৱল অষ্টম মান, দশম মান আৰু দ্বাদশ শ্ৰেণীৰহে পৰীক্ষা বৰ্ডে অনুষ্ঠিত কৰাৰ বিপৰিতে বাকীবোৰ শ্ৰেণীৰ চূড়ান্ত পৰীক্ষা অনুষ্ঠিত নহ’ব। আগৰ দৰেই স্বাভাৱিকভাৱে পলিটেকনিক আৰু অভিযান্ত্ৰিক শিক্ষানুষ্ঠানসমূহো ২ নবেম্বৰৰ পৰা খোলা হ’ব।