টীয়কত গঢ়ি উঠা নিষিদ্ধ ড্ৰাগছ ব্যৱসায় তৎকালীনভাৱে উচ্ছেদ আৰু এই অবৈধ ব্যৱসায়ৰ লগত জড়িতসকলক গ্ৰেপ্তাৰ কৰাৰ দাবীৰে স্মাৰকপত্ৰ প্ৰদান কেইবাটাও সংগঠনৰ

মুদৈজান : অসমৰ অন্যান্য ঠাইৰ লগতে যোৰহাট জিলাৰ টীয়কতো এতিয়া সহজলভ্য হৈ পৰিছে নিষিদ্ধ ড্ৰাগছ। ইমানেই উঠি অহা যুৱ প্ৰজন্ম ড্ৰাগছৰ প্ৰতি আসক্তি বাঢ়ি গ’ল যে দেওবাৰে অত্যাধিক ড্ৰাগছ সেৱণ কৰাৰ ফলত মৃত্যুক সাৱটি ল’বলগীয়া হ’ল টীয়ক বামুণপুখুৰীৰ উৎপল বৰুৱা নামৰ এজন যুৱক। টীয়কত গঢ় লৈ উঠা নিষিদ্ধ ড্ৰাগছৰ ঘাটি আৰু এই অবৈধ ব্যৱসায়ৰ লগত জড়িত ব্যক্তিসকলক তৎকালীনভাৱে গ্ৰেপ্তাৰ কৰাৰ দাবীৰে কালি টীয়ক ৰাজহ চক্ৰ বিষয়াক আছু, যুৱ ছাত্ৰ পৰিষদ আৰু চুতীয়া ছাত্ৰ সন্থাৰ এটি দলে সাক্ষাৎ কৰি যোৰহাট জিলা উপায়ুক্ত আৰু আৰক্ষী অধীক্ষকলৈ স্মাৰকপত্ৰ প্ৰেৰণ কৰিছে। টীয়ক আঞ্চলিক ছাত্ৰ সন্থাৰ সভাপতি ৰন্টু ভূঞা, সাধাৰণ সম্পাদক প্ৰীতমজ্যোতি শইকীয়া, শিমলুগুৰি মৌজা আঞ্চলিক ছাত্ৰ সন্থাৰ সভাপতি দেৱব্ৰত শইকীয়া, ভা: সাধাৰণ সম্পাদক পবিত্ৰ বৰা, অসম জাতীয়তাবাদী যুৱ ছাত্ৰ পৰিষদৰ টীয়ক আঞ্চলিক সমিতিৰ সভাপতি হিমাংশু বৰুৱা, সাধাৰণ সম্পাদক প্ৰশান্ত দত্ত আৰু টীয়ক আঞ্চলিক চুতীয়া ছাত্ৰ সন্থাৰ সভাপতি পাৰ্থ প্ৰতিম চুতীয়া, সম্পাদক বিশ্বজিৎ বৰা স্বাক্ষৰিত পৃথক স্মাৰকপত্ৰ টীয়ক ৰাজহ চক্ৰ বিষয়াৰ জৰিয়তে প্ৰেৰণ কৰিছে। স্মাৰকপত্ৰখনিত উল্লেখ থকা অনুসৰি যোৱা ২১ জুলাইত টীয়ক আৰক্ষীয়ে আটক কৰি অনা ৫ জন ড্ৰাগছ আসক্ত যুৱকক কি কাৰণত উক্ত দিনাই ৰহস্যজনকভাৱে মুকলি কৰি দিলে সেয়াও ৰহস্যৰ আৱৰ্তত, তাৰ লগতে দেওবাৰে অত্যধিক ড্ৰাগছ আসক্তিৰ ফলত মৃত্যু হোৱা উৎপল বৰুৱাৰ লগত থকা আনকেইজন যুৱকক তৎকালীনভাৱে গ্ৰেপ্তাৰ কৰিবলৈ দাবী জনাইছে সংগঠনকেইটাই। আনহাতে এক বিবৃত্তিত সদৌ যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগে অতি ক্ষোভেৰে কয়, অত্যাধিক ড্ৰাগছ আসক্তিৰ ফলত দেওবাৰে মৃত্যু হোৱা উৎপল বৰুৱাৰ দৰে যাতে উঠি অহা নৱপ্ৰজন্ম ধ্বংসৰ গৰাহলৈ নাযায় এইক্ষেত্ৰত প্ৰশাসনে কঠোৰ ব্যৱস্থা গ্ৰহণ কৰাৰ প্ৰয়োজনীয়তা আছে। তাৰ লগতে টীয়ক আৰক্ষী থানাৰ ভাৰপ্ৰাপ্ত আৰক্ষী বিষয়াজনৰ নেতৃত্বত অবৈধ ব্যৱসায় চলি থকাৰ কথা ছাত্ৰ সন্থাই বাৰম্বাৰ জনাই অহাৰ পাছত এইটোৱেই আকৌ প্ৰমাণিত কৰিলে কিদৰে কমিচনৰ অংকত চলি থাকিব পাৰে ড্ৰাগছৰ দৰে অবৈধ ব্যৱসায়।