অযোধ্যাত কটকটীয়া নিৰাপত্তা ব্যৱস্থা

দৈনন্দিন বাৰ্তা ডেস্ক : ৰাম জন্মভূমিত ৰাম মন্দিৰৰ ভূমি পূজাৰ বাবে এদিনৰ আগৰে পৰা অযোধ্যাত নিৰাপত্তা ব্যৱস্থা কটকটীয়া কৰা হৈছে৷ অহা ৫ আগষ্টত আয়োজিত ভূমি পূজা অনুষ্ঠানৰ বাবে এই পবিত্ৰ মহানগৰীখনত এছপিজিয়ে নিৰাপত্তা ব্যৱস্থা হাতত লৈছে৷ উল্লেখ্য যে মহানগৰৰ বাহিৰলৈ যোৱা স্থানীয় লোকক পৰিচয়পত্ৰ দিয়া হৈছে৷ আনহাতে ৫ আগষ্টলৈকে ৰাজ্যখনত বাহিৰৰ লোকক প্ৰৱেশৰ অনুমতি দিয়া নাই৷ এই মন্দিৰ নগৰখনত বেৰিকেড স্থাপন কৰা হৈছে৷ উত্তৰ প্ৰদেশৰ মুখ্যমন্ত্ৰী যোগী আদিত্যনাথে কয় যে বুধবাৰে ভূমি পূজালৈ কেৱল নিমন্ত্ৰিত অতিথিহে যাব পাৰিব৷ ইতিমধ্যে অযোধ্যাত পূজা অনুষ্ঠান আৰম্ভ হৈছে৷ পৌৰাণিক পৰম্পৰা মতে হনুমানগৰহিত ভগৱান হনুমানৰ নিছান পূজা আৰম্ভ হৈছে৷ এই পূজা পুৱা ৯ বজাৰ পৰা আৰম্ভ হয়৷ ইয়াৰ পাছতে পাঁচ ঘণ্টাৰ বাবে ৰাম অৰ্চনা৷ উল্লেখ্য যে ৰাম চৰণ পূজা মন্দিৰৰ ভিতৰত হ’ব৷ বিশ্বাস মতে ৰাম চৰণ পূজাৰে ভগৱান ৰাম সন্তুষ্ট হয় ৷