সংশোধিত শ্ৰমিক আইনক তীব্ৰ বিৰোধিতা : এ চি এম এছৰ ২২ মে’ৰ ধৰ্ণা কাৰ্যসূচীলৈ পূৰ্ণ সমৰ্থন অসম চাহ জনগোষ্ঠী জলহা যুৱ-ছাত্র পৰিষদৰ

নাজিৰা

ক’ৰোনা ভাইৰাছক প্ৰতিৰোধ কৰাৰ স্বাৰ্থত দেশত অব্যাহত আছে লকডাউন। ইয়াৰ মাজতে অসম চৰকাৰে যোৱা ৮ মে’ত মন্ত্ৰী পৰিষদৰ সভাত সংশোধিত শ্ৰম আইন মতে শ্ৰমিকৰ কাম কৰাৰ সময় ৮ ঘণ্টাৰ পৰা ১২ ঘণ্টালৈ বৃদ্ধি কৰা কাৰ্যক তীব্ৰ বিৰোধিতা কৰিছে অসম চাহ জনগোষ্ঠী জলহা যুৱ-ছাত্ৰ পৰিষদে। এক প্ৰেছ বিবৃতিত সংগঠনটোৰ সভাপতি ইউনুছ হুছেইন আৰু সাধাৰণ সম্পাদক জিতু আহমেদে কয় যে এই সংশোধিত শ্ৰমিক আইনে আন্তঃৰাষ্ট্ৰীয় শ্ৰমিক আইনক উপলুঙা কৰাৰ লগতে হাড়ভগা শ্ৰম কৰা শ্ৰমিকৰ অধিকাৰ খৰ্ব কৰিব আৰু মালিক গোষ্ঠীক শ্ৰমিক অধিক শোষণ কৰাৰ সুবিধাহে দিব । অসম চৰকাৰে ২ (এম ), ৫১, ৫২, ৫৩, ৫৪, ৫৫ আৰু ৫৬ ধাৰা সংশোধন কৰি কৰ্মৰ সময় পূৰ্বৰ ৮ ঘণ্টা সলনি ১২ ঘণ্টালৈ বৃদ্ধি কৰি শ্ৰমিক পৰিপন্থী নীতি অৱলম্বন কৰা কাৰ্যক কেতিয়াও গ্ৰহণযোগ্য হ’ব নোৱাৰে বুলি ক্ষোভ প্ৰকাশ কৰে নেতাদ্বয়ে। আনহাতে লকডাউনৰ মাজতে সামাজিক দূৰত্ব বজাই ৰাখি সংশোধিত শ্ৰমিক আইনৰ লগতে শ্ৰম আইন সন্দৰ্ভত সকলো ধাৰা সংশোধনৰ বাবে চৰকাৰে লোৱা সিদ্ধান্ত তৎকালে বাতিল কৰাৰ দাবীত অসম চাহ মজদুৰ সংঘই অহা ২২ মে’ত ব্ৰহ্মপুত্ৰ উপত্যাকাৰ সকলো চাহ বাগিচাত গ্ৰহণ কৰা ধৰ্ণা কাৰ্যসূচীত পূৰ্ণ সমৰ্থণ আছে বুলি জনাই সংগঠনটোৰ সভাপতি ইউনুছ হুছেইন আৰু সাধাৰণ সম্পাদক জিতু আহমেদে৷