বিহালীৰ শিক্ষাবিদ ত্ৰিলোক ভৰালীৰ পৰলোকপ্ৰাপ্তি

বিহালীৰ মাজগাওঁ নিবাসী শিক্ষাবিদ ত্ৰিলোক ভৰালীৰ (৮৯) আজি বিয়লি প্ৰায় ৩ বজাত বাৰ্ধক্যজনিত কাৰণত পৰলোকপ্ৰাপ্তি ঘটে। প্ৰাপ্ত তথ্য অনুসৰি, শিক্ষাবিদ ত্ৰিলোক ভৰালীয়ে বিহালীৰ ডেকাপথাৰত শিক্ষাৰ পোহৰ বিলাবলৈ নিজা প্ৰচেষ্টাৰে ১৯৫৫ চনত ডেকাপথাৰ এল পি স্কুল প্ৰতিষ্ঠা কৰি বিদ্যালয়ৰ প্ৰতিষ্ঠাপক প্ৰধান শিক্ষক হিচাপে কৰ্মজীৱনৰ পাতনি মেলে। পৰৱৰ্তী সময়ত বিহালীৰ বিভিন্ন অঞ্চলত শিক্ষকতা কৰি ১৯৯৩ চনত চিলাহৰণ প্ৰাথমিক বিদ্যালয়ৰ পৰা অৱসৰ গ্ৰহণ কৰে। তাৰোপৰি তেখেত বিভিন্ন সামাজিক কামত আগৰণুৱা আছিল। তেখেত গৃহ অঞ্চলটোত ধৰ্মীয় কামত গতিশীলতা আনিছিল। মাজগাৱৰ হৰিমন্দিৰ পৰিচালনা সমিতিৰ দীৰ্ঘদিন ধৰি সভাপতি আৰু সম্পাদক হিচাপে দায়িত্ব পালন কৰিছিল। তাৰ পূৰ্বে প্ৰগতি ক্লাবৰ সক্ৰিয় সদস্য আছিল। অঞ্চলটোৰ বৰ্ষীয়াণ লোকজনৰ মৃত্যুত হৰিমন্দিৰ পৰিচালনা সমিতি,কাত্যায়নী অধ্যয়ন গোষ্ঠী,মাজগাওঁ ভানু ৰংগমঞ্চৰ পৰিচালনা সমিতি,গাংমৌথান চৰকাৰী বালিকা মজলীয়া বিদ্যালয়,হাতীবন্ধা মজলীয়া বিদ্যালয়,বিহালী উচ্চতৰ মাধ্যমিক বিদ্যালয়কে ধৰি অঞ্চলটোৰ বিভিন্ন অনুষ্ঠান প্ৰতিষ্ঠানে শোক প্ৰকাশ কৰাৰ লগতে শোক সন্তপ্ত পৰিয়ালক সমবেদনা জ্ঞাপন কৰে। অগনন গুণমুগ্ধৰ উপস্থিতিত আজি সন্ধ্যা বৰগাং নদীৰ পাৰত পৰম্পৰাগত ৰীতি-নীতিৰে তেখেতৰ অন্তেষ্টিক্ৰিয়া সমাপন কৰা হয়। ইফালে মৃত্যুৰ সময়ত তেখেতে পত্নী, এগৰাকী পুত্ৰ, দুগৰাকী কন্যা, বোৱাৰী,জোৱাই,নাতি নাতিনী আৰু পৰিনাতিক ইহসংসাৰত এৰি থৈ যায়।