জাতিধ্বংসী “কা” বিৰোধী আন্দোলনত জড়িত অসমৰ ব্যক্তি, ছাত্র-ছাত্ৰীক গ্ৰেপ্তাৰ কৰি বি জে পি নেতৃত্বাধীন চৰকাৰে স্বৈৰাচাৰী শাসন চলাইছে : বিৰোধী দলপতি দেৱব্ৰত শইকীয়া

0 26

নাজিৰা

শেহতীয়াভাৱে ৰাজনৈতিক অভিসন্ধিৰে বি জে পি নেতৃত্বাধীন চৰকাৰখনে ‘কা’ বিৰোধী আন্দোলনত অংশগ্ৰহণ কৰাৰ বাবে বিভিন্ন দল-সংগঠনৰ লগত জড়িত ব্যক্তিসকলক তথা ছাত্ৰ-ছাত্ৰীকো গ্ৰেপ্তাৰ কৰি ক’ভিড-১৯ৰ পৰিপ্ৰেক্ষিতত হৈ থকা এক বিপৰ্যয়ৰ মাজতে ৰাজ্যৰ ৰাজনৈতিক বাতাবৰণ বিনষ্ট কৰাৰ লগতে সাংবিধানিক অধিকাৰ খৰ্ব কৰাৰ প্ৰয়াসত নামি পৰিছে। ইয়াৰে উদাহৰণস্বৰূপে পৰহি আদিবাসী সুৰক্ষা সমিতিৰ কেন্দ্ৰীয় সভাপতি বলদেৱ তেলীক তেওঁৰ ভাৰাঘৰৰ পৰা উঠাই গ্ৰেপ্তাৰ কৰিলে। আকৌ তাৰ দুদিনৰ আগত দিল্লীৰ জৱাহৰলাল নেহৰু বিশ্ববিদ্যালয়ৰ অসমীয়া ছাত্ৰী দেৱাংগনা কলিতা আৰু তেওঁৰ সহপাঠী এগৰাকীক দিল্লী পুলিচে গ্ৰেপ্তাৰ কৰিছিল। সেয়েহে অসমৰ মুখ্যমন্ত্ৰীৰ জ্ঞাতাৰ্থে বিৰোধী দলপতি কয়, “আপুনি নিজেই বিভিন্ন আন্দোলনৰ মাজেৰে পাৰ হৈ আজি মুখ্যমন্ত্ৰীৰ আসন পালে, তেনে ক্ষেত্ৰত গণতান্ত্ৰিকভাৱে চৰকাৰৰ ভুল নীতি আৰু জনবিৰোধী আইনৰ বিৰূদ্ধে মাত মতা লোকসকলক পুলিচ প্ৰশাসনৰ জৰিয়তে বল প্ৰয়োগ কৰি বাকৰুদ্ধ কৰিব বিচৰা কাৰ্যক গৰিহণা দিছোঁ আৰু এয়া দুৰ্ভাগ্যজনক”। বিৰোধী দলপতি গৰাকীয়ে  অসমৰ মুখ্যমন্ত্ৰীক সোঁৱৰাই দি কয় যে এনেকুৱাকৈ জনসাধাৰণৰ গণতান্ত্ৰিক অধিকাৰক মোহাৰি স্বৈৰাচাৰী শাসন চলাবলৈ চেষ্টা কৰি থাকিলে আগন্তুক সময়ত ৰাজপথত ইয়াৰ বিৰুদ্ধে ৰাইজ তথা দল আন্দোলন ওলাই আহিবলৈ বাধ্য হ’ব। বিৰোধী দলপতি দেৱব্ৰত শইকীয়াই মুখ্যমন্ত্ৰীক পুনৰ বলদেৱ তেলীক অতিশীঘ্ৰে মুকলাই দিয়াৰ লগতে ৰাজ্যত গণতান্ত্ৰিক পদ্ধতিৰে আইন অনুসৰি দোষীৰ বিৰুদ্ধে ব্যৱস্থা ল’ব লাগে, ৰাইজক ভয় দেখুৱাই ৰাইজৰ স্বাধীনতাক খৰ্ব কৰাৰ প্ৰয়াস নকৰিবৰ বাবে বিৰোধী দলপতি গৰাকীয়ে ৰাজ্য চৰকাৰ তথা মুখ্যমন্ত্ৰী সৰ্বানন্দ সোণোৱালক অনুৰোধ জনায়।