কঠিয়াতলীত অৰ্ধউলংগ মহিলাৰ মৃতদেহ উদ্ধাৰ । মানসিকভাৱে বিকাৰগ্ৰস্ত মহিলাৰ মৃতদেহ উদ্ধাৰক লৈ চাঞ্চল্য ।
নগাঁও :
কঠিয়াতলি বজাৰৰ মাজমজিয়াত আজি পূৱাভাগত এগৰাকী মানসিকভাৱে বিকাৰগ্ৰস্ত মহিলাৰ মৃতদেহ উদ্ধাৰক লৈ তীব্ৰ চাঞ্চল্যৰ সৃষ্টি হয়। বজাৰখনৰ মাজত থকা এটি জিৰণিচৰাত অৰ্ধউলংগ অৱস্থাত এটি মৃতদেহ উদ্ধাৰৰ পিছতে ব্যাপক প্ৰতিক্ৰিয়াৰ সৃষ্টি হয়। জানিব পৰা মতে আজি পুৱা স্থানীয় ব্যৱসায়ী সকলে বজাৰ মুকলি কৰিবলৈ আহি জিৰণিচ’ৰাত মহিলাগৰাকীৰ মৃতদেহ প্ৰত্যক্ষ কৰি লগে লগে আৰক্ষীক খবৰ দিয়ে। পিছত ঘটনাস্হলীত আৰক্ষী উপস্থিত হয় অৰ্ধউলংগ মৃতদেহটি উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে। উল্লেখযোগ্য যে দীৰ্ঘদিন ধৰি কঠিয়াতলি চহৰ অঞ্চলত ঘূৰি ফুৰা মানসিকভাৱে বিকাৰগ্ৰস্ত মহিলাগৰাকীৰ মৃতদেহ উদ্ধাৰৰ সময়ত দেহৰ কাপোৰ খোলা অৱস্থাত দেখা গৈছিল। সেয়ে স্থানীয় লোকে কোনো দুষ্ট চক্ৰই অপকৰ্ম কৰি মহিলাগৰাকীক হত্যা কৰাৰো সন্দেহ প্ৰকাশ কৰিছে। বৰ্তমান নগাঁও আৰক্ষীয়ে মহিলাগৰাকীৰ মৃত্যু সন্দৰ্ভত অনুসন্ধান আৰম্ভ কৰিছে।