জুইৰ লেলিহান শিখাৰ মাজত মুখ্যমন্ত্ৰীৰ অভয়দান অৰ্থহীন ! বাঘজান কাণ্ডৰ প্ৰশ্ৰয় দিয়া প্ৰতিজন অপৰাধীক কৰায়ত্ব কৰাৰ দাবী ।

নাজিৰা

যোৱা ২৭ মে’তেই তেল গেছৰ উদ্গীৰণ ঘটি সমগ্ৰ বাঘজান গাঁও আৰু ডিব্ৰু-ছৈখোৱাৰ সৈতে সংলগ্ন মাগুৰী মটাপুং বিল আৰু কলীয়াপানীলৈ কঢ়িয়াই অনা অশনি সংকেতক জনসাধৰণৰ পৰা লুকুৱাই ৰখাৰ প্ৰচেষ্টা চলি ৰোৱাৰ সন্দেহ ঘনীভূত হৈছে । তেল গেছ নিগৰ্মণৰ এনে ভয়াবহ দৃশ্যকো বাৰদিন পৰ্য্যন্ত নিৰ্বিঘ্নে চলি থাকিবলৈ এৰি দি অৱশেষত ছিংগাপুৰৰ দক্ষ লোকক নিয়ন্ত্ৰণৰ ভাৰ দিয়ালৈকে জনসাধৰণৰ মাজত ইয়াক অতি সাধাৰণ ঘটনা বুলিয়েই বিশ্বাস জন্মাবলৈ কৰ্তৃপক্ষ সমূহে অপপ্ৰয়াস চলোৱা  সচেতন লোকৰ চকুত পৰিছিল । এফালৰপৰা বিলৰ পানী, নদীৰ পানী কেৱল খাৰুৱা তেলৰ তৰপ আৰু গোন্ধে বিষাক্ত কৰি পেলোৱা  অৱস্থাত কৰ্তৃপক্ষ সমূহে স্থানীয় জনসাধাৰণৰ পদূলিত থিয় হোৱাৰ সাহস হেৰুৱাই পেলোৱাই নহয় মানুহক এবটল খোৱা পানীৰ যোগাৰ ধৰাতো সদিচ্ছা  প্ৰকাশ নকৰিলে । বাঘজানৰ কোনো কোনো অংশলৈ ক্ষুদ্ৰ ধনৰ টোপোলা আগবঢ়োৱাৰ প্ৰতিশ্ৰুতি অইল ইণ্ডিয়া কৰ্তৃপক্ষই ঘোষণা কৰিলেও মূৰকত চূড়ান্ত বৈষম্যৰ অভিযোগ পোৱা গৈছিল কাষৰীয়া ৰাইজৰপৰা । আটাইতকৈ চূড়ান্ত মইমতালি প্ৰদৰ্শন কৰি অসমৰ জাতীয় সম্পদৰ অংশ হৈ ৰোৱা  বি আৰ ফাইভ তেলখাদৰ কাষৰীয়া মাগুৰী মটাপুং বিল খনিৰ প্ৰতি বিপদ চমু চাপি অহা স্বত্বেও গা-নলৰালে অইল ইণ্ডিয়া, তিনিচুকীয়া জিলা প্ৰশাসন আৰু ৰাইজে নিৰ্বাচনত জয়ী কৰাই পঠোৱা জন প্ৰতিনিধি সকলে.।      অইল ইণ্ডিয়া কৰ্তৃপক্ষ, তিনিচুকীয়া জিলা প্ৰশাসনক কোনো সঠিক নিৰ্দেশনা দিয়াত বিফল মুখ্যমন্ত্ৰী সৰ্বানন্দ সোণোৱালে জুইৰ গ্ৰাসৰ পৰা প্ৰাণ ৰক্ষা কৰি ঘৰবাৰী এৰি থৈ নিৰাপদ স্থান বিচাৰি যোৱা পৰিস্থিতিত ৰাইজক অভয়দান কৰা মুখ্যমন্ত্ৰীৰ কাৰ্য্যক সমালোচনা কৰিছে চি পি আইৰ ৰাষ্ট্ৰীয় পৰিষদৰ সদস্য কনক গগৈয়ে । যোৱা ১৪ টা দিনত জুইৰ লেলিহান শিখাৰ সম্ভাৱনাক লৈ ৰাইজে ঘৰবাৰী এৰি দূৰণিলৈ আঁতৰি যোৱাৰ আতংকৰ সময়ত মুখ্যমন্ত্ৰীয়ে এই ঘটনাক ক্ষুদ্ৰ দুৰ্ঘটনা বুলিয়েই ধৰি লৈছিল কিয় ? ১৪ দিনৰ তেল আৰু গেছৰ কণাৰ বৰষুণ মূৰ পাতি লৈ প্ৰতিজোপা গছ – বিৰিখৰ পাতত পানীৰ জলা – বান্ধি ক্ৰমাৎ খেৰ বৰণীয়া হ’বলৈ ধৰাৰ দৃশ্য দেখি কিয় সাৰ নেপালে মুখ্যমন্ত্ৰীৰ প্ৰদূষণ নিয়ন্ত্ৰণ বিভাগে ? অসমৰ জৈৱ বৈচিত্ৰ্যক মৰ্য্যদা দিবলৈ পাহৰি অইল ইণ্ডিয়াই এনে ভূ-লুণ্ঠনৰ অধিকাৰ কেনেকৈ পালে বুলি প্ৰশ্ন কৰি কনক গগৈয়ে প্ৰতিটো বিষয়ৰ তন্ন তন্ন অনুসন্ধান কৰাৰ দাবীত ৰাইজক সজাগ হ’ বলৈ আহ্বান জনায়  । উল্লেখযোগ্য যে যোৱা ৭ জুনত বাঘজানৰ পৰিস্থিতি অধ্যয়ন আৰু ৰাইজৰ সৈতে মত বিনিময় কৰিছিল কনক গগৈয়ে ।