ইংলেণ্ড-ৱেষ্ট ইণ্ডিজৰ দ্বিতীয় টেষ্টত আইচিচিৰ নিয়ম ভাঙিলে ক্ৰিকেটাৰে : থু লগাই পলিচ কৰা বল ছেনিটাইজ কৰিলে আম্পায়াৰে

দৈনন্দিন বাৰ্তা ডেস্ক :

ক’ৰোনাৰ পৰৱৰ্তী ক্ৰিকেটত মাৰাত্মক ভাইৰাছটোৰ সংক্ৰমণৰ পৰা ৰক্ষা পাবলৈ আৰু ক্ৰিকেটাৰসকলৰ স্বাস্থ্য সুৰক্ষাৰ প্ৰতি লক্ষ্য ৰাখি আইচিচিয়ে বহু নিয়ম প্ৰৱৰ্তন কৰিছে ৷ যাৰ মাজত অন্যতম হ’ল বল পলিচ কৰোতে থু বা লেলাউটি ব্যৱহাৰ কৰা নহ’ব ৷ অৰ্থাৎ থু বা লেলাউটি ব্যৱহাৰত নিষেধাজ্ঞা জাৰি কৰিছে আইচিচিয়ে ৷ উল্লেখ্য যে ইংলেণ্ড-ৱেষ্ট ইণ্ডিজৰ মাজত হোৱা টেষ্ট ছিৰিজৰ যোগেৰে ক’ৰোনাৰ পাছত খেল আৰম্ভ হৈছে ৷ ইয়াৰে ছাউডাম্পটনত হোৱা প্ৰথম টেষ্টত কোনেও ভুলটো কৰা নাছিল ৷ কিন্তু মানচেষ্টাৰত হোৱা দ্বিতীয় টেষ্টত নিয়ম ভাঙিলে ইংলেণ্ডৰ এজন ক্ৰিকেটাৰে ৷ নিয়ম ভঙা ইংলেণ্ডৰ ক্ৰিকেটাৰজন হ’ল ডম ছিবলি ৷ মানচেষ্টাৰত হোৱা দ্বিতীয় টেষ্টৰ চতুৰ্থ দিনা ফিল্ডিং কৰাৰ সময়ত বলত থু লগালে ছিবলিয়ে ৷ লগে লগে দুয়োটা দিশত থকা আম্পায়াৰদ্বয়ৰ দৃষ্টি আকৰ্ষণ হয় ৷ আনহাতে নিজৰ দোষ স্বীকাৰ কৰে ছিবলিয়ে ৷ ইয়াৰ পাছত আম্পায়াৰে বলটো ছেনিটাইজ কৰি পুনৰ খেল আৰম্ভ কৰিবলৈ দিয়ে ৷ ইয়াৰ পৰা খেলত একো সমস্যাৰ সৃষ্টি নহ’ল ৷