পানীত পৰি তিনি বছৰীয়া শিশুৰ মৃত্যু

উজনি-মাজুলী : উজনি মাজুলী জেংৰাইমুখ আৰক্ষী থানাৰ অন্তৰ্গত বৰপমুৱা গাঁৱৰ নিবাসী মনজ্যোতি দলেৰ একমাত্ৰ পুত্র হিমাংশু দলে নামৰ তিনি বছৰীয়া শিশুটি ২ আগষ্টৰ আবেলি পাঁচ বজাত পানীত পৰি আকস্মিক ভাৱে মৃত্যুক সাৱটি লয়। জনা মতে মনজ্যোতি দলেৰ ঘৰৰ সমীপত খেৰকটীয়া নৈৰ এটা সৰু সুঁতি আছে। এই সুঁতিটোৰ সৈতে সংলগ্ন হৈ থকা ওখ ভেটিত খেলি থকা অৱস্থাৰ পৰাই পানীত পৰি শিশুটিৰ সলিল সমাধি ঘটে। পানীত পৰি মৃত্যু হৈ ওপঙি থকাৰ পিছতহে স্হানীয় লোকে শিশুটিৰ মৃতদেহ প্ৰত্যক্ষ কৰাৰ পিছত ঘটনাটো পোহৰলৈ আহে। ইয়াৰ পিছত স্হানীয় জেংৰাইমুখ আৰক্ষী থানাত ঘটনাটো অৱগত কৰাৰ পিছত আৰক্ষীৰ লোক ঘটনাস্হলীত উপস্থিত হৈ শিশুটিৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰে।