টীয়কত পিতা-পুত্ৰৰ অভিনৱ সজাগতা, চাইকেল চলাওক সুস্থ থাকক

0 274

ভগামুখ : সময় বাগৰাৰ লগে লগে আধুনিক সমাজখনৰ পৰা হেৰাই যাব ধৰিলে পিতা-পুত্ৰৰ বন্ধুত্বপূৰ্ণ সম্বন্ধ৷ সন্তান আৰু অভিভাৱকৰ এই ব্যৱধানৰ বাবেই সমাজত কৈশোৰ তথা যুৱ সমাজৰ মাজত দিনে দিনে বাঢ়িছে ড্ৰাগছ মাদক দ্ৰব্যৰ প্ৰচলন৷ এনে সময়তে টীয়কৰ পিতাই পুতাই খ্যাত সমাজকৰ্মী তথা ব্যৱসায়ী চন্দন বৰা আৰু তেওঁৰ সুযোগ্য সন্তান নীলিম চন্দন বৰা, এই দুই পিতা-পুত্ৰৰ আকৰ্ষণীয় বন্ধুত্ব আৰু কাৰ্যকলাপে সকলোৰে দৃষ্টি আকৰ্ষণ কৰিছে৷ ক’ভিড-১৯ মহামাৰীৰ বাবে সমগ্ৰ ভাৰতবৰ্ষতে ঘোষণা কৰা লকডাউনে সকলোৰে বাবে অফুৰন্ত সময় উপহাৰ দিলে৷ এক উচ্চ মনৰ চিন্তাৰে প্ৰতিদিনে পুৱা চাৰি বজাৰ পৰা দুয়ো চাইকেলেৰে আৰম্ভ কৰে এই যাত্ৰা৷ কেতিয়াবা বানে গৰকা জাজীঁমুখ, কেতিয়াবা ঐতিহাসিক চিন্তামণিগড়, কেতিয়াবা কেতিয়াবা বুৰঞ্জী প্ৰসিদ্ধ ৰংঘৰ, তলাতলঘৰ, লাচিত মৈদাম, কেতিয়াবা আধ্যাত্মিক স্থান ঢেকীয়াখোৱা বৰনামঘৰ, কলীয়াপানীস্থিত আউনীআটী সত্ৰ আৰু এই যাত্ৰা পাইগৈ। কেতিয়াবা অপূৰ্ব প্ৰাকৃতিক সৌন্দৰ্যৰে ভৰপুৰ আমগুৰি হৈ নাগালেণ্ড সীমান্ত৷ উদেশ্য এক সজগতা সৃষ্টি কৰা আৰু হেজাৰজনক পুনৰ চাইকেল চলাবলৈ উৎসাহিত কৰা৷ কাৰণ পিতাই পুতাইৰ কথা হ’ল চাইকেল চলালে সুস্বাস্থ্য লাভ কৰিব পাৰি, বায়ু প্ৰদুষণৰ পৰিমাণ কমাব পাৰি৷ ইয়াৰ লগতে তেওঁলোক জড়িত স্বেচ্ছাসেৱী অনুস্থান ৰেঙণি এটি আশাৰ সহযোগত গছত গজাল মাৰিলে গছজোপাই কষ্ট পাই, বিভিন্ন স্থানত গছপুলি বিতৰণৰ দ্বাৰা গছ থাকিলেহে মানুহ থাকিব তাৰ সজাগতা সৃষ্টি কৰিছে৷ চন্দন বড়াৰ মতে যদি এশ গৰাকী ব্যক্তিকো এই চাইকেল চলোৱাৰ প্ৰতি আকৰ্ষিত কৰিব পাৰে তেওঁলোক সফল হৈছে বুলি ভাবিব৷ ইতিমধ্যে তেওঁলোকৰ এই যাত্ৰাৰ সহযোগী হৈছে টীয়ক অঞ্চলৰ কেইবাগৰাকীও যুৱকৰ লগতে দিহা সম্ৰাট কমলা গগৈ৷