২৭ জুলাইত চূড়ান্ত পৰ্যায়ৰ পৰীক্ষা : ৰাছিয়াৰ পাছত আশাৰ বাণী শুনালে আমেৰিকাই ৷

0 1,132

দৈনন্দিন বাৰ্তা ডেস্ক :

ক’ৰোনা ভাইৰাছত প্ৰতিদিনে বহু লোক আক্ৰান্ত হোৱাৰ লগতে মৃত্যুমুখত পৰিছে৷ ইতিমধ্যে ৰাছিয়াৰ গামালেই ইনষ্টিটিউট অৱ এপিডেম’লজী এণ্ড মাইক্ৰবায়’লজীৰ পাছত আশাৰ বাণী শুনালে আমেৰিকাৰ গৱেষণা প্ৰতিষ্ঠান মডেৰ্ণাই৷ এই প্ৰতিষ্ঠানৰ দাবী, তেওঁলোকে প্ৰস্তুত কৰা ক’ৰোনা ভেকছিনৰ প্ৰথম পৰ্যায়ৰ পৰীক্ষা সফল হৈছে৷ অহা ২৭ জুলাইত এই ভেকছিনৰ চূড়ান্ত পৰ্যায়ৰ পৰীক্ষা হ’ব৷ এই পৰীক্ষা সফল হ’লেই তাক অনুমোদনৰ বাবে পঠিওৱা হ’ব৷ যোৱা ১৬ মাৰ্চত বিশ্বৰ প্ৰথম ক’ৰোনা ভাইৰাছৰ ভেকছিন মানৱ দেহত প্ৰয়োগ কৰে মডেৰ্ণাই৷ প্ৰথম পৰ্যায়ত মুঠ ৪৫ জন স্বেচ্ছাসেৱকক ভেকছিনৰ ডাবোল ডজ দিয়া হয়৷ মার্কিন প্ৰতিষ্ঠানটোৰ দাবী, প্ৰথম পৰ্যায়ৰ সেই পৰীক্ষা সফল হৈছে৷ সিসকলৰ শৰীৰত এই ভেকছিন প্ৰয়োগ কৰা হৈছে তেওঁলোকৰ ক’ৰোনা প্ৰতিৰোধ ক্ষমতা আগৰ তুলনাত বাঢ়িছে৷ যিসকলৰ ওপৰত পৰীক্ষা কৰা হৈছিল তেওঁলোকৰ কাৰোৰে শৰীৰত তেনে গুৰুতৰ পার্শ্বপ্রতিক্রিয়া হোৱা নাই৷ সামান্য মূৰৰ বিষ, বমিভাৱ, সিৰামুৰি আৰু বেয়া লগাৰ বাদে আন কোনো সমস্যা দেখা নাছিল৷ মডেৰ্ণাই জনাই যে প্ৰথম পৰ্যায়ৰ পৰীক্ষা আশানুৰূপ ফল পোৱাৰ পাছত অহা ২৭ জুলাইত ভেকছিনটোৰ চূড়ান্ত পৰ্যায়ৰ পৰীক্ষা আৰম্ভ হ’ব৷ সাধাৰণ পৰিৱেশত মানুহৰ শৰীৰত কিমান কাৰ্যকৰ সেয়া চাব৷ উল্লেখ্য যে আমেৰিকা চৰকাৰ এই প্ৰতিষ্ঠানটোৰ ভেকছিনক লৈ আশাবাদী৷ ইতিমধ্যে মডেৰ্ণাক বৃহৎ অংকৰ ধন দি সহায় কৰিছে ৷