মঙলদৈ অসামৰিক চিকিৎসালয়ৰ আছুতীয়া কক্ষত ভৰ্ত্তি প্ৰথমজন ক’ভিড আক্ৰান্ত ৰোগী

মঙলদৈ

মঙলদৈ অসামৰিক চিকিৎসালয়ৰ আছুতীয়া কক্ষত ভৰ্ত্তি কৰোৱা হ’ল প্ৰথমজন ক’ভিড আক্ৰান্ত ৰোগীক৷ জিলা স্বাস্থ্য বিভাগে এক প্ৰেছ বিজ্ঞপ্তিৰ জৰিয়তে এইকথা প্ৰকাশ কৰিছে। এই ব্যক্তিজন হ’ল খাৰুপেটীয়া খণ্ড প্ৰাথমিক স্বাস্থ্য কেন্দ্ৰৰ অন্তৰ্গত ১ নং আৰিমাৰীৰ আমিৰুল ইছলাম (১৭)। তেওঁৰ লগত পৰিয়ালৰ আন ৪ জন সদস্যকো মঙলদৈ অসামৰিক  চিকিৎসালয়লৈ আনি ক’ভিড “ছাছপেকটেড ৱাৰ্ড”ত ৰখা হৈছে৷ উল্লেখযোগ্য যে যোৱা ২২ মে’ ত ৫ জন সংগীসহ কলকাতাৰ পৰা আহি দৰঙত উপস্থিত হৈছিল আমিৰুল৷। তেওঁৰ লগত অহা এই ব্যক্তিসকলকো চিনাক্ত কৰি আছুতীয়া কক্ষত ৰখাৰ লগতে প্ৰয়োজনীয় পৰীক্ষা-নিৰীক্ষা কৰাৰ ব্যৱস্থা কৰিব জিলা প্ৰশাসন আৰু স্বাস্থ্য বিভাগে। ইয়াৰ উপৰি গাঁৱত থকা সময়ছোৱাত আমিৰুল যিসকললোকৰ সংস্পৰ্শলৈ আহিছিল তেওঁলোককো বিচাৰি উলিয়াবলৈ প্ৰয়োজনীয় পদক্ষেপ হাতত লোৱা হৈছে। ইফালে দৈনিক বহিঃৰাজ্যৰ পৰা দৰঙলৈ বিভিন্ন লোকৰ আগমণ ঘটিয়েই আছে। এই লোকসকলৰ যাৱতীয় স্বাস্থ্য পৰীক্ষা কৰোৱাই কোৱাৰাণ্টাইনত ৰখাৰ ব্যৱস্থা কৰিছে জিলা প্ৰশাসন আৰু স্বাস্থ্য বিভাগে। বহিঃৰাজ্যৰ পৰা আগমন ঘটা লোকৰ সংখ্যাৰ প্ৰতি লক্ষ্য ৰাখি আন কেইবাখনো শিক্ষানুষ্ঠান ক’ভিড কেয়াৰ চেণ্টাৰ হিচাপে গঢ়ি তুলিছে জিলা প্ৰশাসনে। নতুনকৈ গঢ়ি তোলা ক’ভিড কেয়াৰ চেণ্টাৰকেইটা হ’ল ছিপাঝাৰ বি, এড কলেজ, কেন্দ্ৰীয় বিদ্যালয়, মঙলদৈ, উত্তৰ মঙলদৈ উচ্চ মাধ্যমিক বিদ্যালয় আৰু খাৰুপেটীয়া মহাবিদ্যালয়।