দিন হাজিৰা কৰা লোকৰ ওপৰত বেলশৰ আৰক্ষীৰ বীৰত্ব প্ৰদৰ্শন। দিন হাজিৰা কৰি ৬ বজাৰ পিছত ঘৰলৈ আহি থকাৰ দোষত নিৰ্মম ভাৱে প্ৰহাৰ কৰি ফুটালে মুৰ

দৈনন্দিন বাৰ্তাৰ সেৱা/নলবাৰী : কিছুমান আৰক্ষীৰ অমানৱীয় কাণ্ডৰ বাবেই অসম আৰক্ষী সততে হয় ঘৃণাৰ পাত্ৰ । নলবাৰীত সংঘটিত আৰক্ষীৰ বৰ্বৰতাৰ বাবে পুনৰ নিন্দিত হল আৰক্ষী । গুৱাহাটী ভৰলুৰ পিছত এইবাৰ নলবাৰীত বেলশৰ আৰক্ষীৰ বৰ্বৰতা প্ৰদৰ্শন কৰাত পৰিলক্ষিত হৈছে । দিন হাজিৰা কৰি পৰিয়াল পোহ পাল দি থকা এজন ব্যক্তিৰ ওপৰত কৰিলে বেলশৰ আৰক্ষীয়ে বীৰত্ব প্ৰদান । বিগত সময়ত বেলশৰ বাটচৰত সংঘটিত হোৱা এগৰাকী যুৱতীৰ নৃশংস হত্যাকাণ্ডৰ হত্যাকাৰী বিগত তিনিমাহে চিনাক্ত কৰিব নোৱাৰা বেলশৰ আৰক্ষীয়ে দিন হাজিৰা কৰি খাঁটি খোৱা লোকৰ ওপৰত দেখুৱাই বীৰত্বৰ প্ৰদৰ্শন । দিন হাজিৰা কৰি পৰিয়াল পোহ পাল দি থকা নলবাৰীৰ খাৰশিঠাৰ যতীন দাসক নলবাৰী বেলশৰ থানাৰ অন্তৰ্গত বালিজাৰ-খাৰশিঠা সীমান্ত পথত আৰক্ষীয়ে নিৰ্মম ভাৱে প্ৰহাৰ কৰি মুৰ ফটাই দিয়ে । যাৰ ফলত দুৰ্ভগীয়া ব্যক্তিজনৰ মুৰ তেজেৰে ৰাঙলী হল । যতীন দাসৰ একমাত্ৰ দোষ আছিল যে তেখেত সন্ধিয়া ৬ বজাৰ পিছত দিন হাজিৰা কৰি ঘৰলৈ আহি আছিল । তেনে অৱস্থাত ৰাজপথতে তেখেতক আৰক্ষীয়ে লগ পাই কোনো সোধা-পোছা নকৰাকৈ আৰক্ষীয়ে কেৱল নিৰ্মম প্ৰহাৰ কৰিছে । গাড়ীৰ ভিতৰৰ পৰাই যতীন দাসক কৰিলে প্ৰহাৰ । এতিয়া প্ৰশ্ন হৈছে বেলশৰ আৰক্ষীৰ এই কাণ্ড কিমানদূৰ যুক্তিসংগত । ভুক্তভোগীয়ে আৰক্ষী সঞ্চালক প্ৰধান ভাস্কৰজ্যোতি মহন্তৰ হস্তক্ষেপ বিছাৰিছে ৷ দুৰ্ভাগ্যজনক বিষয় এই যে এতিয়াও আৰক্ষীৰ ফালৰ পৰা কোনো ধৰণৰ চিকিৎসাৰ ব্যৱস্থা নকৰিলে যতীন দাসৰ মুৰ ফাটি যোৱাৰ পিছত ও । এইয়াই নেকি জন হিতাৰ্থে জন সেৱাৰ্থে অসম আৰক্ষী । দুৰ্ভগীয়া ব্যক্তি জনে আৰক্ষী সঞ্চালক প্ৰধান ভাস্কৰ জ্যোতি মহন্তৰ ফালৰ কিমান সোণকালে ন্যায় পাব সেয়াই সময় অনুসৰি লক্ষণীয় হব ।