নাজিৰাত জাতীয়-সংগঠনে ল’লে আৰক্ষীৰ ভূমিকা : ৩৪ টা গৰুৰ ভিতৰত ১২ টা গৰুৰ নথি-পত্ৰ উদ্ধাৰ

গেলেকী : নাজিৰাত আৰক্ষী প্ৰশাসনৰ চৰকাৰী দায়িত্বৰ প্ৰতি থকা চৰম অৱহেলাৰ বাবেই জাতীয়-সংগঠনে ৰাজপথত বাহন ধৰি আৰক্ষীৰ ভূমিকা লোৱাটো নুই কৰিব নোৱাৰি। প্ৰাপ্ত তথ্য ৰাইজৰ অভিযোগ অনুসৰি ২২ ছেপ্তেম্বৰৰ দিনা আবেলি পৰত নাহৰকটীয়াৰ পৰা খাৰুপেটীয়ালৈ তিনিখন ডি আই গাড়ীত ৩৪ টাকৈ গৰু নি থকা অৱস্থাত টাই আহোম যুৱ পৰিষদ, টাইপা নাজিৰা আঞ্চলিক সমিতিয়ে ৰাজপথত বাহন ৰখায়। লগতে সংগঠনটোৱে ৰাজপথত বাহন ধৰি তিনিখন গাড়ীত থকা গৰু সমূহ চোৰাংভাৱে নিয়া বুলি দাবী তোলে। সমান্তৰালভাৱে নাজিৰা আদৰ্শ আৰক্ষী থানাত উক্ত গৰু সমূহ গটাই দিয়া হয়। আৰক্ষীৰ প্ৰাথমিক তদন্তত প্ৰায় ১২ টা গৰুৰ চালান পোৱা গৈছে। যদিও বাকীকেইটা গৰুৰ কোনো ক্ৰয় কৰাৰ একো প্ৰমাণ পোৱা হোৱা নাই। সম্প্ৰতি গৰু কেইটা কঢ়িয়াই অনা ব্যক্তি কেইজনৰ নাম ক্ৰমে নুৰ আলী, ৰহমত উল্লাহ, চফিকুল ইচলাম, আজিবুল হক আৰু আছিক আলী। উল্লেখ্য যে ৰাজ্যত আইন, আইনৰ সেৱাৰ্থে আৰক্ষী প্ৰশাসন থকাৰ স্বত্বেও ৰাজপথত জাতীয়-সংগঠনে বাহন ৰখোৱাটো কোনো কাৰণতেই যুক্তি সংগত হ’ব নোৱাৰে। এনে ধৰণৰ কৰ্ম কাণ্ডই অদুৰ ভৱিষ্যতে তেখেত লোকক বিপদগামী কৰাৰ ৰাইজ তথা সচেতন মহলে মতপোষণ কৰিছে। আনহাতে অনাগত দিনত শিৱসাগৰ জিলা আৰক্ষী অধীক্ষক অমিতাভ চিনহা, নাজিৰা মহকুমা আৰক্ষী বিষয়াই গৰু চোৰাং চক্ৰৰ বিৰুদ্ধে কেনে ধৰণৰ পদক্ষেপ হাতত লয়। সেইটো নাজিৰাবাসী ৰাইজৰ বাবে লক্ষ্যণীয় হৈ উঠিব।