পূৰ্ণোদ্যমে পাঠদান চলিছে পূব নলবাৰীৰ খাতা কেন্দ্ৰত

0 1,517

নলবাৰী জিলা প্ৰাথমিক শিক্ষা বিষয়া সীমান্ত কুমাৰ ডেকা অাৰু পূব নলবাৰী প্ৰাথমিক শিক্ষাখণ্ডৰ বিষয়া ইনামূল মজিদৰ তৎপৰতাত ১নং খাতা মণ্ডল সমল কেন্দ্ৰৰ অন্তৰ্গত বিভিন্ন বিদ্যালয়ত পূৰ্ণোদ্যমে চলি আছে অনলাইন পাঠদান। সম্প্ৰতি ক’ভিড সৃষ্ট পৰিৱেশৰ বাবে বিদ্যালয় স্তৰত প্ৰত্যক্ষ পাঠদান বন্ধ হৈ থকা বাবে শিক্ষকসকলে ছাত্ৰ-ছাত্ৰীৰ ঘৰলৈ গৈ ফোন নম্বৰ সংগ্ৰহ কৰিছে আৰু শ্ৰেণী অনুসৰি হোৱাটছ্‌এপ গ্ৰুপ খুলি প্ৰথম সাময়িকী মূল্যায়নৰ বাবে নিৰ্ধাৰিত পাঠ্যাংশৰ পাঠদান প্ৰক্ৰিয়া পৰ্যায়ক্ৰমে চলাই আছে। এই প্ৰক্ৰিয়া সুচাৰুৰূপে সম্পন্ন কৰিবলৈ প্ৰযুক্তিগত দিশত বিশেষ ব্যুৎপত্তি থকা অাপেক্ষিকভাৱে নবীন শিক্ষকসকলক বিশেষ দায়িত্ব দিয়া বুলি ‘দৈনন্দিন বাৰ্তা’ক জানিবলৈ দিছে সমন্বয়ক সুভাষ বৰ্মনে। ক্ষুদ্ৰচেনিকুছি প্ৰাথমিক বিদ্যালয়ৰ সহঃ শিক্ষক দিগন্ত দাস আৰু প্ৰধান শিক্ষয়িত্ৰী যামিনী দাস, উত্তৰ পূব খাতা বিদ্যাপীঠ মধ্য ইংৰাজী বিদ্যালয়ৰ কবিতা দেৱী, ৰজনী কান্ত হালৈ আৰু সাগৰিকা ডেকা, প্ৰেম নাৰায়ণ প্ৰাথমিক বিদ্যালয়ৰ শিক্ষক দেবেন দাস, মিতালী চৌধুৰী, মন্তিমনি দে’, দিব্যজ্যোতি বালিকা মধ্য ইংৰাজী বিদ্যালয়ৰ শিক্ষক তথা বড়িগোগ-বনভাগ শিক্ষাখণ্ডৰ চি আৰ চি চি মহেশ কলিতা আৰু প্ৰধান শিক্ষক যাদৱ দাস, শংকৰদেৱ আদৰ্শ প্ৰাথমিক বিদ্যালয়ৰ প্ৰধান শিক্ষক প্ৰণব কুমাৰ মেধি, সহঃ শিক্ষক কালীন্দ্ৰ মেধি, খাতা-বনভাগ এম ই স্কুলৰ উপেন্দ্ৰ কুমাৰ গোস্বামী আৰু ৰানা দাস, দেউহৰি প্ৰাথমিক বিদ্যালয়ৰ প্ৰধান শিক্ষক দীনেশ চন্দ্ৰ দাস আৰু অজয় বৰ্মন, ৬৭৫ নং সাহপুৰ প্ৰাথমিক বিদ্যালয়ৰ সহঃ শিক্ষক দিলীপ কুমাৰ দাস, ক্ষুদ্ৰপিপলীয়া প্ৰাথমিক বিদ্যালয়ৰ প্ৰধান শিক্ষয়িত্ৰী ৰীনা বালা বৰ্মন, ৰূপজ্যোতি হাইস্কুলৰ প্ৰধান শিক্ষক পৰেশ নাথ শৰ্মা আৰু সহঃ শিক্ষয়িত্ৰী ৰেখা গোস্বামী আদিয়ে পাঠদান প্ৰক্ৰিয়া বিশেষভাৱে চলাই নিছে বুলি জানিব পৰা গৈছে। ছাত্ৰ-ছাত্ৰীৰ শিকন-ঘাটি নহ’বলৈকৈ শিক্ষকসকলক এই পাঠদানৰ বিশেষ পৰিকল্পনাৰে চলাই নিয়াটো সমল কেন্দ্ৰৰ তৰফৰ পৰা মণ্ডল সমল কেন্দ্ৰ সমন্বয়ক সুভাষ বৰ্মনে পৰ্যবেক্ষণ কৰি আছে বুলিও বিশ্বস্ত সূত্ৰে জানিব পৰা গৈছে। পাঠদান বন্ধৰ সময়ছোৱাত পুষ্টি বাগিছাৰ সংবৰ্ধন,পৰিচৰ্যা আৰু তদাৰকৰ বিশেষ ব্যৱস্থা ল’বলৈয়ো বিভাগীয়ভাৱে প্ৰধান শিক্ষকসকলক দায়িত্ব দিয়া হৈছে। এইক্ষেত্ৰত কোনো সমস্যাৰ উদ্ভৱ হ’লে জিলা আঁচনি বিষয়াসকলৰ পৰামৰ্শ ল’বলৈয়ো কোৱা হৈছে। শিক্ষাখণ্ডটোৰ সমন্বয়ক সুভাষ বৰ্মনৰ সহযোগিতাত আৰম্ভ হোৱা এই পাঠদান কাৰ্যক বিদ্যালয় পৰিচালনা সমিতিৰ বিষয়ববীয়া আৰু অভিভাৱকসকলে শলাগিছে।