২১ মে’ৰ দিনা আহমেদাবাদৰ ক্ৰিকেট ষ্টেডিয়ামত বলীউডৰ ছুপাৰষ্টাৰ শ্বাহৰুখ খানে নিজৰ আই পি এল দল কলকাতা নাইট ৰাইডাৰ্ছক উৎসাহিত কৰি আছিল, সেই সময়ত তাপমাত্ৰা প্ৰায় ৪৫ ডিগ্ৰী চেলছিয়াছ আছিল আৰু তাৰ পিছত এছ আৰ কে ডিহাইড্ৰেচন আৰু গৰমৰ সন্মুখীন হৈছিল। ষ্ট্ৰোক হোৱাৰ পিছত তেওঁ চিকিৎসালয়ত ভৰ্তি হ’বলগীয়া হয়। পানীৰ অভাৱত তেজৰ পৰিমাণ কমি যায়। তেজ ডাঠ হোৱাৰ বাবে হৃদযন্ত্ৰ আৰু ধমনীত অতিৰিক্ত চাপ পৰে। এনে অৱস্থাত ঘাম কম হয় আৰু শৰীৰ ঠাণ্ডা হ’ব নোৱাৰে। ইয়াৰ ফলত হিট ষ্ট্ৰ’ক আৰু ডিহাইড্ৰেচন হয়।
এই ৰোগৰ পৰা কেনেকৈ হাত সাৰিব-
আমাৰ শৰীৰৰ বেছিভাগ অংশ পানীৰে গঠিত, যদি শৰীৰত পানীৰ অভাৱ হয় তেন্তে স্বাস্থ্যৰ বাবে বেয়া, ইয়াৰ পৰা হাত সাৰিবলৈ আপুনি দিনটো পৰ্যাপ্ত পৰিমাণৰ পানী খাব লাগিব। ইয়াৰ উপৰিও নাৰিকল পানী, নেমু পানী আৰু সকলো ধৰণৰ সতেজ ফলৰ ৰস খাব পাৰে।
গৰমত ঘৰতে থাকিবলৈ চেষ্টা কৰক আৰু অতি প্ৰয়োজনীয় সময়তহে ঘৰৰ পৰা ওলাই যাব লাগে। বাহিৰলৈ ওলাই যাওঁতে প্ৰত্যক্ষ সূৰ্যৰ পোহৰ পৰিহাৰ কৰিব লাগে। কপাহী আৰু ঢিলা কাপোৰ পিন্ধিব লাগে। সদায় লগত পানীৰ বটল এটা ৰাখিব লাগে।
দিনত আপোনাৰ গাড়ীৰ ভিতৰখন জুইৰ দৰে গৰম হৈ পৰে, এনে পৰিস্থিতিত গাড়ীৰ ভিতৰত বহিবলৈ প্ৰায় ১০ মিনিট আগতে এচি অন কৰি তাৰ পিছত চলাব লাগে। গন্তব্যস্থান পোৱাৰ কেইমিনিটমান আগতে এচি বন্ধ কৰক, যাতে আপুনি বাহিৰৰ উষ্ণতাৰ লগত মিলিব পাৰে।
ডিহাইড্ৰেচনৰ পৰা হাত সাৰিবলৈ ইয়াৰ লগত জড়িত লক্ষণসমূহ আগতীয়াকৈ চিনি পোৱাটো গুৰুত্বপূৰ্ণ। যদি আপোনাৰ প্ৰস্ৰাৱ হালধীয়া হৈছে, আপোনাৰ মুখ আৰু ডিঙি শুকাই গৈছে, আপোনাৰ মূৰৰ বিষ, মূৰ ঘূৰোৱা, উশাহ লোৱাত অসুবিধা, জ্বৰ, নিম্ন ৰক্তচাপ আৰু হৃদস্পন্দন বৃদ্ধিৰ দৰে সমস্যা আছে, তেতিয়া তৎক্ষণাত পানী খাব লাগে আৰু প্ৰয়োজন হ’লে চিকিৎসকৰ লগত যোগাযোগ কৰিব লাগে।