লাকুৱা তৈলক্ষেত্ৰৰ পৰা ONGCৰ ৩ বিষয়া-কৰ্মচাৰীক অপহৰণ : আলফা স্বাধীনে অপহৰণ কৰাৰ সন্দেহ

নাজিৰা অ’ এন জি চি (অসম সম্পদ)ৰ মুখ্য কাৰ্যালয়ৰ অধীনস্ত তৈলক্ষেত্ৰৰ পৰা নিশা ONGCৰ ৩ বিষয়া-কৰ্মচাৰীক অপহৰণ । চৰাইদেউ জিলা অন্তৰ্গত লাকুৱা তৈলক্ষেত্ৰত নিশা কৰ্মৰত অৱস্থাত থকা নিগমৰ ৩ বিষয়া-কৰ্মচাৰী ক্ৰমে অলকেশ শইকীয়া, ৰিতুল শইকীয়া আৰু মোহিনী মোহন গগৈ’ক আলফা স্বাধীনে অপহৰণ কৰাৰ সন্দেহ কৰা হৈছে । জানিব পৰা মতে মাজনিশা ONGCৰ এম্বুলেঞ্চত অহা ৫/৬ জনীয়া অস্ত্ৰধাৰী দলে পুৱতি নিশা ৩ বিষয়াক অপহৰণ কৰি চুবুৰীয়া ৰাজ্য নাগালেণ্ডলৈ লৈ যোৱাৰ সন্দেহ কৰা হৈছে । আনহাতে ONGCৰ ৩ বিষয়া-কৰ্মচাৰীৰ মোহিনী মোহন গগৈ’ৰ ঘৰ শিৱসাগৰ জিলা ডিমৌৰ নিতাইপুখুৰী, ৰিতুল শইকীয়া’ৰ ঘৰ গোলাঘাট আৰু অলকেশ শইকীয়া’ৰ ঘৰ যোৰহাটত বুলি জানিব পৰা গৈছে । তদুপৰি ঘটনা সন্দৰ্ভত আলফা স্বাধীনে বৰ্তমানেও কোনো তথ্য সদৰী কৰা নাই ।