ওৰাং আৰক্ষীৰ জালত পৰিল দুই দুধৰ্ষ চোৰ।

ওৰাং :  কেইৱাটাওঁ চুৰিকাণ্ডৰ সৈতে জড়িত দুই দুধৰ্ষ চোৰ আজি ওৰাং আৰক্ষীৰ জালত পৰে। আৰক্ষী থানাখনৰ ভাৰপ্ৰাপ্ত আৰক্ষী বিষয়া দীপক দাসৰ নেতৃত্বত যোৱা আৰক্ষীৰ দল এটাই প্ৰায় ৩ ঘণ্টা জুৰি চলা এক স্বাস ৰুদ্ধকৰ অভিযানত আটক কৰিবলৈ সক্ষম হয় দুই দুধৰ্ষ চোৰক। অভিযানকাৰী দলটোৰ হাতৰ পৰা পলাবলৈ ল‌ওঁতে আৰক্ষীয়ে কেইৱা কিল’মিটাৰ দূৰ বোকা-পানীৰ মাজেৰে দৌৰী মৈমনসিং গাঁৱত আটক কৰিবলৈ সক্ষম হয়। আৰক্ষীৰ জালত পৰা চোৰ দুগৰাকী ২ নম্বৰ ওদালগুৰি জংগলগাঁৱৰ কাজিমুদ্দিন শেইখ (২৫) আৰু হাৰিজুদ্দিন(২৭) বুলি আৰক্ষীয়ে জানিবলৈ দিছে। উল্লেখ্য যে ধৃত চোৰ দুজনৰ বিৰুদ্ধে পূৰ্ৱেও কেইৱাখনো থানাত গোচৰ ৰুজু হৈ আছে। জানিব পৰা মতে এবাৰ শিলবড়ী আৰক্ষী থানাত আটক হৈছিল যদিও আৰক্ষীৰ চকুত ধূলি দি পলায়ন কৰিছিল কাজীমুদ্দিন শেইখ নামৰ ধৃত চোৰজনে। ওৰাং আৰক্ষী থানাৰ ৫৯/২০, ৬০/২০, ৬১/২০ নম্বৰত ৰুজু হোৱা গোচৰৰ ভিত্তিত চোৰ দুজনক গ্ৰেপ্তাৰ কৰি আৰক্ষীয়ে সোধা পোছা অব্যাহত ৰাখিছে।