নলবাৰীত বহু দিন ধৰি সন্ত্ৰাস চলোৱা ২ মোবাইল চোৰ আটক

নলবাৰী

লকডাউনৰ বাবে এফালে ৰাইজ গৃহবন্দী। নিতৌ জীয়াই থকাৰ বাবে কৰিবলগা হৈছে সংগ্ৰাম। তাৰ মাজতে চিলনী চোৰৰ আতংকত সন্ত্ৰাসিত হৈ পৰিছে নলবাৰীৰ ৰাইজ। এনে সন্ত্ৰাস চলাই চিলনী চোৰৰ বিৰুদ্ধে নলবাৰী আৰক্ষীয়ে এক বৃহৎ সাফল্য লাভ কৰে। অৱশেষত শুকুৰবাৰে নলবাৰী আৰক্ষীৰ জালত পৰে দুই চিলনী চোৰ। নলবাৰী সদৰ থানাৰ টাউন ডাৰোগা বিশ্বজিৎ দুৱৰীৰ নেতৃত্বত যোৱা আৰক্ষীৰ অভিযানকাৰী দলৰ জালত পৰা এই চোৰ দুটা হৈছে জিলাখনৰ বেলশৰ থানাৰ অন্তৰ্গত জোৱাৰ্দ্দি গাঁৱৰ  হৰজিৎ বৈশ্য আৰু কৈঠালকুছিৰ চম্পক হালৈ। নলবাৰী আৰক্ষীয়ে এক গোপন সূত্ৰৰ পম খেদি নলবাৰী চহৰৰ জিলিঙনি চ’কৰ পৰা হৰজিৎ বৈশ্য নামৰ চোৰটোক আটক কৰাৰ পিছত হৰজিতৰ স্বীকাৰোক্তিৰ ভিত্তিত আনটো চোৰ চম্পকক আটক কৰিবলৈ সক্ষম হয়। লকডাউনৰ সময়ত নলবাৰী চহৰৰ মাজমজিয়াত প্ৰায় ৭ টাকৈ স্থানৰ পৰা  চিলনী চোৰে থপিয়াই নিছিল মহিলাৰ বেগ আৰু ম’বাইল ফোন৷ ইয়াৰ পিছতেই নলবাৰী আৰক্ষীৰ এই চিলনী চোৰকলৈ মুৰৰ কামোৰণী হৈ পৰে। এই ঘটনা সন্দৰ্ভত নলবাৰী আৰক্ষী থানাত কে’বাখনো এজাহাৰ দাখিল কৰা হৈছে। অৱশেষত আৰক্ষীয়ে গোচৰ ৰুজু কৰি চিলনী চোৰৰ বিৰুদ্ধে অভিযান চলাই চোৰ দুটাক আটক কৰাৰ লগতে চোৰ দুটাৰ পৰা আঠটা চুৰি ম’বাইলফোন জব্দ কৰিবলৈ সক্ষম হয়। আৰক্ষীয়ে চোৰ দুটাৰ বিৰুদ্ধে ভাৰতীয় দণ্ডবিধি আইনৰ ৩৯২ ধাৰা ২৪৭/২০ আৰৰু এনএলবিত ২৫৮/২০ নংত নলবাৰী জিলাত সন্ত্ৰাস চলাই অহা এই চোৰ দুটাৰ বিৰুদ্ধে গোচৰ ৰুজু কৰি নলবাৰী আদালতত হাজিৰ কৰা হয়৷