CAA বিৰোধী শক্তিবোৰ একগোট হ’বনে ?

0 1,021

দৈনন্দিন বাৰ্তা ডেস্ক : নাগৰিকত্ব সংশোধনী বিল বা আইনৰ বিৰুদ্ধে অসমত আৰম্ভ হোৱা প্ৰৱল প্ৰতিবাদী কাৰ্যসূচীৰ কথা অসমৰ জনতাই বোধহয় পাহৰা নাই৷ কোনো সংগঠনৰ বেনাৰ নোলোৱাকৈ মূলত ছাত্ৰসমাজে আৰম্ভ কৰা এই আন্দোলনত অসমৰ প্ৰায় সৰ্বস্তৰৰ লোকে অংশগ্ৰহণ কৰিছিল৷ অসমৰ বিভিন্ন দল-সংগঠন, শিল্পী, শিক্ষক, বুদ্বিজীৱিয়ে অংশ লোৱা প্ৰতিবাদী কাৰ্যসূচী সমূহ দেখি ৰজাঘৰ একপ্ৰকাৰ গণবিচিন্ন হোৱাৰ ভয়ত কম্পমান হৈছিল৷ আমাৰ দৰে সাধাৰণ মানুহবোৰৰ ভাৱ হৈছিল জনতাৰ ইচ্ছাৰ বিপৰীতে যোৱা শাসকীয় চৰকাৰখনক যেন এইবাৰ অতি সহজে ওফৰাই পেলাব৷ কিন্তু দিন যোৱাৰ লগে লগে কৰ’না মহামাৰীৰ বাবেই হওক বা অন্য কোনো কাৰনতে হওঁক দল-সংগঠনবোৰৰ মাজত সমন্বয় গঢ়ি তোলাৰ বাবে কোনোৱে যেন আগভাগ নোলোৱা হ’ল৷ সকলোৱে এক উমৈহতীয়া ৰাজনৈতিক মঞ্চ গঢ়ি জনবিৰোধী চৰকাৰখনক এশিকনি দিয়াৰ পৰিৱেশ আজি ধূসৰ হৈ পৰিল৷ নিৰ্বাচনত জয় লাভ কৰি চৰকাৰ গঠন কৰিব পাৰিলেই ’কা’ বাতিল কৰিব পাৰিব তেনে নহয়৷ দিল্লীৰ নিৰ্দেশত উঠা-বহা কৰা চৰকাৰবোৰে ইচ্ছা কৰিয়েই ৰাইজৰ ওপৰত যিকোনো আইন জাপি দিলে অসমৰ জনতা চুপ হৈ বহি নাথাকে – এই কথা প্ৰমাণ কৰি অসমীয়াৰ স্বাভীমানক জীয়াই ৰখাৰ এই সুৱৰ্ণ সুযোগটো যাতে হাতৰ পৰা হেৰাই নাযায় তাৰ বাবে ’কা’ বিৰোধী আন্দোলনত জড়িত প্ৰতিটো দল সংগঠনৰ নেতৃত্বই সতৰ্ক হোৱা দৰকাৰ৷ ৰাইজে সকলো নজৰ কৰি আছে৷