Breaking

মৰাণত দিন দুপৰতে মহিলা হত্যা

0 2,233

ডিব্ৰুগড় জিলাৰ মৰাণত দিন দুপৰতে এগৰাকী মহিলাক হত্যা কৰি চোঁচৰাই নি চাহ বাগিচাৰ মাজত পেলাই থৈ যোৱা ঘটনাই তীব্ৰ চাঞ্চল্য সৃষ্টি কৰিছে । জানিব পৰা ঘটনা অনুসৰি, ডিব্ৰুগড় জিলাৰ মৰাণ আৰক্ষী থানাৰ অন্তৰ্গত মৰাণ চাহ বাগিচাৰ টিখৰাই ডিভিজনৰ ৮ নং চেকচনৰ মাজত অৰ্ধ উলংগ অৱস্থাত এগৰাকী মহিলাৰ মৃতদেহ উদ্ধাৰ হয় । মৃতদেহটো দিখাৰী নেপালী গাঁৱৰ মিথু কৰ্মকাৰৰ দ্বিতীয়া পত্নী পাৰ্বতী মূড়া (৩০) । ডেৰ বছৰীয়া সন্তানৰ মাতৃ পাৰ্বতী মূড়া মৰাণ চাহ বাগিচাৰ টিখৰাই ডিভিজনৰ স্থায়ী শ্ৰমিক আছিল বুলি জানিব পৰা গৈছে । ঘটনাস্থলীত মৰাণ আৰক্ষী থানাৰ ভাৰপ্ৰাপ্ত আৰক্ষী বিষয়া দীননাথ মিলি, মৰাণ আৰক্ষী চক্ৰৰ চক্ৰ পৰিদৰ্শক সিদ্ধেশ্বৰ বড়োসহ আৰক্ষী দল আৰু মৰাণ ৰাজহ চক্ৰৰ চক্ৰ বিষয়া ড° সংগীতা শৰ্মা উপস্থিত হৈ প্ৰাৰম্ভিক তদন্ত আৰম্ভ কৰে । আনহাতে মৃতদেহটো উদ্ধাৰ কৰি মৰনোত্তৰ পৰীক্ষাৰ বাবে যাৱতীয় ব্যৱস্থা গ্ৰহণ কৰে । উক্ত হত্যাকাণ্ড ঘটনাকলৈ অঞ্চলটোত তীব্ৰ চাঞ্চল্য সৃষ্টি হৈছে । কোনে কি কাৰণত মহিলা গৰাকীক হত্যা কৰিলে জানিব পৰা নাই। আৰক্ষীৰ তদন্তৰ অভিযান অব্যাহত ৰাখিছে।শীঘ্ৰেই আৰক্ষী জালত হত্যাকাৰী পৰিব বুলি আৰক্ষীয়ে অবগত কৰিছে।