Breaking

ছ’ছাইটি অৱ ফিটেল মেডিচিনৰ নৰ্থ ইষ্ট চেপ্টাৰৰ বাঘিনী প্ৰসূতা সচেতনতা বৃদ্ধিৰ উপলক্ষে ” বিশ্ব প্ৰি এক্লেমচিয়া দিৱস” পালন

0 18

গৰ্ভাৱস্থাত মহিলাসকলে সন্মুখীন হোৱা জটিল সমস্যা ” প্ৰিএক্লেমছিয়া” সম্পৰ্কে ৰাইজৰ মাজত সজাগতা সৃষ্টিৰ বাবে প্ৰতি বছৰে ২২ মে’ ত পালন কৰা হয় “বিশ্ব প্ৰিএক্লেমছিয়া দিৱস” । এনে সমস্যাই গা কৰি উঠিলে গৰ্ভৱতী মহিলাগৰাকীৰ ৰক্তচাপ বৃদ্ধি হোৱাৰ লগতে আন অংগ – প্ৰত্যংগৰ ক্ষতি সাধন কৰে। আনকি এনে সমস্যাই গা কৰি উঠাৰ ফলত বিশ্বত প্ৰতি মিনিটত বহুতো গৰ্ভৱতী মহিলাৰ মৃত্যু পৰ্যন্ত হয়। এনে জটিল সমস্যাৰ পৰা হাত সাৰিবলৈ সোনকালে পৰীক্ষা কৰি ৰোগ নিৰ্ণয় কৰাৰ লগতে এই সম্পৰ্কে প্ৰতিৰোধৰ ব্যৱস্থা গ্ৰহণ সম্পৰ্কে অৱগত কৰোৱাৰ উদ্দেশ্যে এই দিৱসৰ আয়োজন কৰি অহা হৈছে । তাৰেই পৰিপ্ৰেক্ষিতত ছ’ছাইটি অৱ ফিটেল মেডিচিনৰ নৰ্থ ইষ্ট চেপ্টাৰে কাইলৈ এই দিৱস পালন কৰিব ওলাইছে। নৰ্থ ইষ্ট চেপ্টাৰৰ সভাপতি ডা: অপূৰ্ব কুমাৰ ভট্টাচাৰ্য আৰু ডাঃ জিনা বৰদলৈয়ে এক প্ৰেছ বিজ্ঞপ্তি যোগে কয় যে এই দিৱসৰ জৰিয়তে গৰ্ভধাৰণ কৰিবৰ বাবে প্ৰস্তুত মহিলা, স্বাস্থ্যকৰ্মী আৰু ৰাইজক এই ৰোগৰ পৰা হ’ব পৰা শংকা আৰু কোনবোৰ কাৰণৰ বাবে এই ৰোগ হ’ব পাৰে সেইবিষয়ে সচেতনতা বৃদ্ধি কৰাই এই দিৱসৰ অন্যতম উদ্দেশ্য বুলি উল্লেখ কৰিছে । এনে সচেতনতা আৰু সজাগতা সৃষ্টিৰে গৰ্ভধাৰণৰ পূৰ্বে নিশ্চিত কৰা, প্ৰাৰম্ভিক পৰ্যায়তে পৰীক্ষা কৰা আৰু এনে পৰিস্থিতিৰ পৰা হাত সাৰিবলৈ পদক্ষেপ গ্ৰহণ কৰিবলৈ চেষ্টা কৰা হৈছে।


বিশ্বৰ ৫-৮% গৰ্ভৱতী মহিলাই প্ৰিএক্লেমছিয়াত আক্ৰান্ত হয়। এই ৰোগত প্ৰসূতি আৰু নৱজাতকৰ জটিলতা আৰু মৃত্যুৰ অন্যতম কাৰণ হিচাপে চিহ্নিত হৈছে। গৰ্ভধাৰণৰ ২০ সপ্তাহ পিছত হঠাতে এনে সমস্যাই গা কৰি উঠিব পাৰে। যদিহে উপযুক্ত চিকিৎসা কৰা নহয় তেতিয়াহ’লে মাতৃ আৰু সন্তানৰ বাবে বিপদ হ’ব পাৰে। এই ৰোগে গা কৰি উঠিলে ৰক্তচাপ বৃদ্ধি হোৱাৰ লগতে প্রশ্ৰাৱৰ লগত প্ৰ’টিন ,প্ৰচন্ড মুৰৰ বিষ , দৃষ্টি শক্তি সলনি হয় আৰু পেটৰ ওপৰৰ ফালে বিষ হোৱা আদি লক্ষণে দেখা দিয়ে। যদিহে এনে সমস্যাই দেখা দিয়ে তেন্তে পলম নকৰি চিকিৎসকৰ পৰামৰ্শ লোৱাৰ লগতে স্বাস্থ্যকৰ্মীৰ সৈতে যোগাযোগ ৰক্ষা কৰিব লাগে। ‘ বিশ্ব প্ৰিএক্লেমছিয়া দিৱস ‘ উপলক্ষে ছ’ছাইটি অৱ ফিটেল মেডিচিনৰ নৰ্থ ইষ্ট চেপ্টাৰে স্বাস্থ্য বৃত্তিৰে জড়িত সকলোৰে লগতে সমাজৰ প্ৰতি গৰাকী লোককে এই সম্পৰ্কে হোৱা শেহতীয়া গৱেষণা আৰু চিকিৎসাৰ ক্ষেত্ৰত হোৱা আধুনিক চিকিৎসা সম্পৰ্কে সম্যক জ্ঞান আহৰণ কৰিবলৈ কৈছে। ইয়াৰ লগতে প্ৰসূতি মাতৃৰ স্বাস্থ্য সেৱা নিশ্চিত কৰা তেওঁলোকে যাতে উপযুক্ত যতন লাভ কৰিব পাৰে তাৰবাবে গুৰুত্ব আৰোপ কৰিবলৈ আঁচনি প্ৰস্তুত কৰা সকলক ছ’চাইটিয়ে এই দিৱসৰ জৰিয়তে আহ্বান জনাইছে।

Leave A Reply