ঠিকাদাৰৰ গাফিলতিৰ বাবেই নগাঁৱত যুৱকৰ মৃত্যু : উত্তপ্ত পৰিস্থিতি

নগাঁও,১৮ ছেপ্টেম্বৰ: মৰণফান্দত পৰিণত হৈছে নগাঁও চহৰৰ এখন নিৰ্মীয়মান দলং ৷ ঠিকাদাৰৰ চূড়ান্ত গাফিলতিৰ বাবেই কালি নিশা এগৰাকী যুৱকে মৃত্যুক সাৱটিবলগীয়া ঘটনা সংঘটিত হল নগাঁৱত । উল্লেখ্য, নগাঁও চহৰৰ মাজমজিয়াৰ আনন্দৰাম ঢেকিয়াল ফুকন দলঙৰ সমীপতে নতুনকৈ আন এখন দলংৰ নিৰ্মাণ কাৰ্য চলি আছে। কিন্তু দলং নিৰ্মানৰ ঠিকা লাভ কৰা প্ৰতিষ্ঠানটোৱ কোনো সতৰ্কতামূলক ব’ৰ্ড কিম্বা বেৰিকেড নলগোৱাকৈয়ে দলং নিৰ্মাণৰ বাবে খন্দা গাত উন্মুক্তভাৱে ৰাখি থৈছে। যাৰ ফলতেই কালি নিশা সংঘটিত হয় এক অঘটন ৷ দলং নিৰ্মাণৰ বাবে খান্দি থোৱা গাতটোত পৰি মৃত্যুক সাৱটি লবলগীয়া হয় ছমাদাৰ পট্ৰিৰ ৰণি সৰকাৰ নামৰ যুৱকজনে ৷ কোনো ধৰণৰ সাংকেতিক ব’ৰ্ড বা বেৰিকেড নলগোৱাৰ ফলত যোৱা নিশা ছামাদাৰ পট্টিৰ ৰণি সৰকাৰ নামৰ যুৱকজন বাইকসহ উন্মুক্ত গাতত পৰি মৃত্যুক সাৱটি লবলগীয়া হয় ৷ আজি পুৱাৰ ভাগতহে স্থানীয় লোকে বাইকসহ পানীত উপঙি থকা অৱস্থাত প্ৰত্যক্ষ কৰে যুৱকজনৰ মৃতদেহ ৷ ইপিনে যুৱকজনৰ মৃতদেহ উদ্ধাৰৰ পিছতেই এক উতপ্ত পৰিস্থিতিৰ সৃষ্টি হয়। ঠিকা লাভ কৰা প্ৰতিষ্ঠানটোৰ বিৰুদ্ধে সৰৱ হৈ পৰে স্থানীয় ৰাইজ। আনকি স্থানীয় ৰাইজে দলং নিৰ্মানকাৰী প্ৰতিষ্ঠান খনৰ বিৰুদ্ধে সাব্যস্ত কৰে প্ৰতিবাদ ৷ তাৰ পাচতেই এক উত্তপ্ত পৰিস্থিতিৰ সৃষ্টি হয় অঞ্চলটোত ৷ পৰৱৰ্তী সময়ত ঘটনাস্থলীত চক্ৰ বিষয়া আৰু আৰক্ষী উপস্থিত হয় পৰিস্থিতি নিয়ন্ত্ৰণ কৰিবলৈ সক্ষম হয় ৷ চক্ৰ বিষয়া আৰু আৰক্ষীয়ে ভুক্তভোগী পৰিয়ালক ক্ষতিপুৰণ দিয়াৰ লগতে অভিযুক্তৰ বিৰুদ্ধে শীঘ্ৰেই উচিত ব্যৱস্থা গ্ৰহণৰ প্ৰতিশ্ৰুতি প্ৰদান কৰে ৷