মণিপুৰত সন্ত্ৰাসবাদীৰে সংঘৰ্ষত শ্বহীদ ৩ অসম ৰাইফলৰ জোৱান : আহত ৫

দৈনন্দিন বাৰ্তা ডেস্ক : মণিপুৰত সন্ত্ৰাসবাদীৰ সৈতে হোৱা গুলীয়াগুলীত অসম ৰাইফলছৰ তিনিজন জোৱান শ্বহীদ হৈছে৷ আনহাতে এই ঘটনাত আহত হৈছে আন পাঁচজন জোৱান৷ বৃহস্পতিবাৰে পুৱা মণিপুৰৰ চান্দেল জিলাৰ ম্যানমাৰৰ সীমান্তত এই ঘটনা সংঘটিত হয়৷ স্থানীয় সূত্ৰই জনোৱা মতে গোপন সূত্ৰৰ খবৰৰ ভিত্তিত ম্যানমাৰ সীমান্তত মণিপুৰৰ চান্দেল জিলাৰ এঠাইত ৪ নং অসম ৰাইফলছৰ জোৱানে তালাচী অভিযান চলাই আছিল৷ হৰ্থাৎ সেই ঠাইত আইইডি বিস্ফোৰণ ঘটায় স্থানীয় উগ্ৰপন্থী সংগঠন পিপুলছ লিবাৰেছন আৰ্মিৰ সদস্যই৷ তাৰ পাছত অসম ৰাইফলৰ সেনাৰ ওপৰত ধাৰাসাৰ গুলীবৰ্ষণ কৰে৷ ফলত তিনিজন জোৱানৰ মৃত্যু হয়৷ লগতে আন চাৰিজন জোৱান আহত হয়৷ এই ঘটনাটো মণিপুৰৰ ৰাজধানী ইম্ফলৰ পৰা ১০০ কিলোমিটাৰ নিলগৰ চান্দেল জিলাত সংঘটিত হয়৷ আহতসকলক চিকিৎসালয়ত ভৰ্ত্তি কৰা হৈছে৷ অঞ্চলটোত তালাচী অভিযান ব্যাপক কৰা হৈছে৷