মধ্য প্ৰাচ্যত বাজি উঠিল যুদ্ধৰ দামামা৷ আমেৰিকা আৰু ইজৰাইলে যৌথভাৱে আক্ৰমণ চলালে ইৰাণৰ ওপৰত৷ ৰাজধানী চহৰ তেহৰাণত বিস্ফোৰণৰ খবৰ পোৱা গৈছে ৷ ইৰাণ আৰু আমেৰিকাৰ মাজত কেইবা সপ্তাহ ধৰি উত্তেজনা অব্যাহত থকাৰ পিছত শনিবাৰে এই আক্ৰমণৰ সূত্ৰপাত ঘটে৷ আমেৰিকাৰ এজন বিষয়াই কৈছে যে ইৰাণৰ বিৰুদ্ধে ইজৰাইলৰ আক্ৰমণত আমেৰিকা যুক্তৰাষ্ট্ৰই সহযোগ কৰিছে৷ সংবাদ মাধ্যমৰ মতে শীৰ্ষ নেতা আয়াতুল্লাহ আলী খমেইনীৰ কাৰ্যালয়ৰ সমীপতে এই আক্ৰমণ হোৱাৰ লগে লগে চহৰখনৰ বিভিন্ন স্থান ধোঁৱাই আৱৰি ধৰিছে৷ লক্ষণীয়ভাৱে আক্ৰমণৰ সময়ত নেতাগৰাকী নিজৰ কাৰ্যালয়তে আছিল নে নাই সেয়া স্পষ্ট হোৱা নাই৷ জানিব পৰা মতে আমেৰিকাৰ সৈতে উত্তেজনা বৃদ্ধি পোৱাৰ পিছত তেওঁক বহুদিন ধৰি ৰাজহুৱা অনুষ্ঠানত দেখা পোৱা নাই৷ কিন্তু ইৰাণক পাৰমাণৱিক কাৰ্যসূচীক লৈ চুক্তিবদ্ধ হ’বলৈ হেঁচা প্ৰয়োগ কৰাৰ চেষ্টা অব্যাহত ৰখা আমেৰিকাই এই অঞ্চলত যুদ্ধ বিমান আৰু যুদ্ধ জাহাজৰ এক বিশাল বহৰ সক্ৰিয় কৰি ৰখাৰ সময়তে এই আক্ৰমণ সংঘটিত হৈছে৷
ইৰাণৰ ৰাজধানীত একাধিক বিস্ফোৰণৰ খবৰ পোৱা গৈছে৷ অৱশ্যে আক্ৰমণৰ ফলত নিহত বা আহত লোকৰ তথ্য এতিয়ালৈ দুয়োপক্ষই ৰাজহুৱা কৰা নাই৷ ইজৰাইলৰ প্ৰতিৰক্ষা মন্ত্ৰী ইজৰাইল কাটজে এই আক্ৰমণক ভাবুকি আঁতৰোৱাৰ প্ৰয়াস বুলি কৈছে৷ কিন্তু তেওঁ বিতং তথ্য প্ৰকাশ কৰা নাই৷ তেহৰাণত একাংশ নাগৰিকে বিস্ফোৰণৰ শব্দ শুনাৰ কথা স্বীকাৰ কৰিছে৷ পিছত ইৰাণৰ চৰকাৰী টেলিভিছনেও এই বিস্ফোৰণ সন্দৰ্ভত বাতৰি প্ৰকাশ কৰিছে৷ ইফালে ইজৰাইলৰ আক্ৰমণৰ লগে লগে ইৰাণে নিজৰ বায়ু পথ বন্ধ কৰি দিছে৷ তেহৰাণত বিস্ফোৰণৰ খবৰ পোৱাৰ লগে লগে পাইলটসকলকো সতৰ্ক কৰি দিয়া হৈছে ৷ একেদৰে ইৰাণে এই আক্ৰমণৰ প্ৰত্যুত্তৰ দিব বুলি আশংকা কৰি সমগ্ৰ ইজৰাইলত যুদ্ধৰ ছাইৰেণ বাজি উঠিছে৷ ইজৰাইলৰ সেনাই কয় যে তেওঁলোকে ক্ষেপণাস্ত্ৰ নিক্ষেপ কৰাৰ সম্ভাৱনাৰ প্ৰতি লক্ষ্য ৰাখি জনসাধাৰণক সতৰ্ক কৰি দিছে৷ ইজৰাইল সেনাই সকলো নাগৰিককে সুৰক্ষিত স্থানত আশ্ৰয় লোৱাৰ পৰামৰ্শ দিছে ৷ এক্সৰ এটা পোষ্টত ইজৰাইল সেনাই কয়, ‘যোৱা কেইমিনিটমানৰ ভিতৰত সমগ্ৰ ইজৰাইলতে ছাইৰেণ বজোৱা হৈছে, সুৰক্ষিত স্থানত থাকিবলৈ আগতীয়া নিৰ্দেশনাৰ জৰিয়তে সতৰ্ক কৰি দিয়া হৈছে ৷ ক্ষেপণাস্ত্ৰ নিক্ষেপ কৰাৰ সম্ভাৱনাৰ বাবে জনসাধাৰণক সতৰ্ক কৰি দিয়া হৈছে৷’ ইজৰাইলে সম্ভাব্য যুদ্ধৰ আশংকাত জৰুৰীকালীন অৱস্থা ঘোষণা কৰিছে৷
অত্যাৱশ্যকীয় সেৱাৰ বাহিৰে শৈক্ষিক প্ৰতিষ্ঠান, জনসমাৱেশ, কাৰ্যালয় আদি বন্ধৰ ঘোষণা কৰিছে ৷ এক নিৰ্দেশনাত কোৱা হৈছে, ‘পৰিস্থিতি মূল্যায়নৰ অন্তত সিদ্ধান্ত লোৱা হৈছে যে আজি [শনিবাৰ] জ্জ্ব বজাৰ পৰা হোম ফ্ৰণ্ট কমাণ্ড গাইড লাইনত তাৎক্ষণিক পৰিৱৰ্তন কৰা হৈছে৷ এই পৰিৱৰ্তনৰ অংশ হিচাপে দেশৰ সকলো অঞ্চলতে কেৱল অত্যাৱশ্যকীয় সেৱা ৱৰ্তী থকাৰ সিদ্ধান্ত লোৱা হৈছে৷’ নিৰ্দেশনাসমূহৰ ভিতৰত আছে– অত্যাৱশ্যকীয় খণ্ডৰ বাহিৰে শৈক্ষিক প্ৰতিষ্ঠান, সমাৱেশ আৰু চৰকাৰী কাৰ্যালয় আদি বন্ধ থাকিব৷ জনসাধাৰণে চৰকাৰী হোম ফ্ৰণ্ট কমাণ্ড চেনেলত প্ৰকাশিত নিৰ্দেশনা মানি চলিব লাগিব৷ ৰাষ্ট্ৰীয় জৰুৰীকালীন পৰ্টেল আৰু হোম ফ্ৰণ্ট কমাণ্ড এপত সম্পূৰ্ণ গাইডলাইন আপডেট কৰা হ’ব বুলিও কোৱা হৈছে ৷ ইপিনে ইৰাণৰ এখন বালিকা বিদ্যালয়ত আমেৰিকা-ইজৰাইলে বোমাবৰ্ষণ কৰাত ৪০গৰাকীৰো অধিক ছাত্ৰী নিহত হৈছে৷ ইপিনে তেল আভিভত থকা ভাৰতীয় দূতাবাসে ইজৰাইলত বাস কৰা প্ৰবাসী ভাৰতীয়সকলক সতৰ্ক হৈ থাকিবলৈ কোৱাৰ লগতে ইজৰাইল কতৃৰ্পক্ষই জাৰি কৰা সতৰ্কতামূলক নিৰ্দেশনাৱলী মানি চলিবলৈ আহ্বান জনাইছে৷ ভাৰতীয় দূতাবাসে জাৰি কৰা এক বিজ্ঞপ্তিত এই কথা কোৱা হৈছে৷
