CMO ASSAM । ২৮ ফেব্ৰুৱাৰীৰ পৰা আৰম্ভ হোৱা ভাৰতীয় জনতা পাৰ্টিৰ ‘জন আশীৰ্বাদ যাত্ৰা’ অসমজুৰি এক বৃহৎ জনআন্দোলনৰ ৰূপ লোৱা দেখা গৈছে। ৰাজ্যজুৰি আগবাঢ়ি থকা এই যাত্ৰাই ব্যাপক জনসমৰ্থন লাভ কৰাৰ লগতে জনতাৰ আস্থা, আশা আৰু আকাংক্ষাৰ শক্তিশালী প্ৰকাশ হিচাপে পৰিগণিত হৈছে।
শোণিতপুৰ জিলাৰ ঐতিহাসিক ঢেকীয়াজুলিৰ পৰা আৰম্ভ হোৱা এই যাত্ৰাত মুখ্যমন্ত্ৰী ড° হিমন্ত বিশ্ব শৰ্মাই অংশ লৈ বিভিন্ন ঠাইত বিপুল জনসমাগমৰ মাজত ৰোড শ্ব’ আৰু জনসভা অনুষ্ঠিত কৰিছে। যাত্ৰাৰ সময়ত “আহিছে আহিছে হিমন্ত আহিছে” আৰু “অসমৰ সুৰক্ষা, বিকাশৰ প্ৰতিজ্ঞা” ধ্বনিৰে বহু ঠাই মুখৰিত হৈ পৰিছে।
৮খন জিলাৰ ২৩টা বিধানসভা সমষ্টি অতিক্ৰম
এতিয়ালৈকে যাত্ৰাই ৮খন জিলাৰ ২৩টা বিধানসভা সমষ্টি অতিক্ৰম কৰাৰ লগতে প্ৰায় ৬২৫ কিলোমিটাৰ পথ অতিক্ৰম কৰিছে। এই সময়ছোৱাত মুঠ ৭৫৪টা কাৰ্যসূচী অনুষ্ঠিত হৈছে আৰু মুখ্যমন্ত্ৰীয়ে ৬৪খন বৃহৎ জনসভাত ভাষণ প্ৰদান কৰিছে। লগতে ২১জন বিধায়ক আৰু ৬জন সাংসদে এই যাত্ৰাত অংশগ্ৰহণ কৰিছে।
৬ দিনতেই ১০ লাখৰো অধিক জনতাৰ অংশগ্ৰহণ
মাত্র ৬ দিনৰ ভিতৰতে এই যাত্ৰাত ১০ লাখৰো অধিক লোকৰ অংশগ্ৰহণ ঘটিছে। গাঁও, নগৰ আৰু চহৰৰ পৰা অহা সাধাৰণ মানুহে স্বতঃস্ফূৰ্তভাৱে যাত্ৰাত যোগদান কৰি উন্নয়ন, সু-শাসন আৰু দৃঢ় নেতৃত্বৰ প্ৰতি নিজৰ সমৰ্থন প্ৰকাশ কৰিছে।
যুৱশক্তি আৰু নাৰীশক্তিৰ ব্যাপক উৎসাহ
যাত্ৰাৰ সময়ত বিভিন্ন ঠাইত বহু আবেগঘন দৃশ্য দেখা গৈছে। মুখ্যমন্ত্ৰীক এবাৰ দেখা পোৱাৰ আশাত বহু লোক ঘণ্টাৰ পিছত ঘণ্টা অপেক্ষা কৰিছে। শিশুৰ পৰা যুৱপ্ৰজন্ম আৰু নাৰীশক্তিলৈকে সকলোৱে উল্লাসেৰে “মামা” বুলি মাতি তেওঁক অভ্যৰ্থনা জনোৱা দেখা গৈছে। বহু আই-মাতৃয়ে মুখ্যমন্ত্ৰীক আশীৰ্বাদো জনাইছে।
মুখ্যমন্ত্ৰীয়ে এই সময়ছোৱাত শিশু, যুৱক-যুৱতী, জ্যেষ্ঠ নাগৰিক আৰু বিশেষভাৱে সক্ষম লোকসকলৰ সৈতে কথা-বতৰা পাতি চৰকাৰ আৰু জনতাৰ মাজৰ বিশ্বাসৰ সম্পৰ্ক অধিক দৃঢ় কৰাৰ ওপৰত গুৰুত্ব আৰোপ কৰিছে। লগতে অসমৰ সুৰক্ষা নিশ্চিত কৰা আৰু অনুপ্ৰৱেশকাৰীৰ বিৰুদ্ধে কঠোৰ ব্যৱস্থা গ্ৰহণৰ সংকল্পও পুনৰ দোহাৰিছে।
উন্নয়নমূলক দৃষ্টিভংগীৰ প্ৰতি জনতাৰ সমৰ্থন
প্ৰধানমন্ত্রী নৰেন্দ্ৰ মোদীৰ নেতৃত্বত “সবকা সাথ, সবকা বিকাশ, সবকা বিশ্বাস, সবকা প্রয়াস” দৃষ্টিভংগীৰ আধাৰত অসমে আন্তঃগাঁথনি, স্বাস্থ্য, শিক্ষা আৰু যোগাযোগ ক্ষেত্ৰত উল্লেখযোগ্য অগ্ৰগতি লাভ কৰিছে বুলি বিজেপিৰ পক্ষৰ পৰা কোৱা হৈছে।
এইমছ গুৱাহাটী, নতুন চিকিৎসা মহাবিদ্যালয়, আই আই এম আদি শিক্ষা আৰু স্বাস্থ্য প্ৰতিষ্ঠানৰ স্থাপন-সম্প্ৰসাৰণৰ লগতে ৰাষ্ট্ৰীয় ঘাইপথ নিৰ্মাণে ৰাজ্যৰ উন্নয়নৰ গতি ত্বৰান্বিত কৰিছে।
জনকল্যাণমূলক আঁচনিয়ে আনিছে ইতিবাচক পৰিৱৰ্তন
অৰুণোদয় আৰু নিযুত মইনা আদি জনকল্যাণমূলক আঁচনিয়ে বিশেষকৈ নাৰীসকলক আৰ্থিকভাৱে সবল কৰাৰ লগতে কন্যা শিক্ষাকো উৎসাহিত কৰিছে। যাত্ৰাৰ সময়ত বহু হিতাধিকাৰীয়ে মুখ্যমন্ত্ৰীক সাক্ষাৎ কৰি এই আঁচনিসমূহে তেওঁলোকৰ জীৱনত কেনেধৰণৰ ইতিবাচক পৰিৱৰ্তন আনিছে সেয়া ব্যক্ত কৰা দেখা গৈছে।
বিজেপিৰ মতে, ‘জন আশীৰ্বাদ যাত্ৰা’লৈ এই বিপুল সঁহাৰিয়ে স্পষ্ট কৰি দিছে যে অসমবাসীয়ে উন্নয়ন আৰু অগ্ৰগতিৰ পথত আগবাঢ়িবলৈ প্রধানমন্ত্রী নৰেন্দ্ৰ মোদী আৰু মুখ্যমন্ত্রী ড° হিমন্ত বিশ্ব শৰ্মাৰ নেতৃত্বৰ ওপৰত নিজৰ আস্থা অব্যাহত ৰাখিছে।
