প্ৰচণ্ড মুষলধাৰ বৰষুণ আৰু তাৰ ফলত সৃষ্টি হোৱা কৃত্ৰিম বানৰ বাবে এক জৰুৰী পৰিস্থিতিৰ সৃষ্টি হৈছে Guwahati মহানগৰীত। এই প্ৰতিকূল অৱস্থাৰ প্ৰতি লক্ষ্য ৰাখি Kamrup Metropolitan District Administration-এ দেওবাৰে নিশাই জাৰি কৰিছে এক গুৰুত্বপূৰ্ণ নিৰ্দেশনা।
নিৰ্দেশনা অনুসৰি, Guwahati Municipal Corporation-ৰ অন্তৰ্গত সকলো চৰকাৰী আৰু বেচৰকাৰী শিক্ষা প্ৰতিষ্ঠান সোমবাৰে (২০ এপ্ৰিল) বন্ধ থাকিব। এই সিদ্ধান্ত গ্ৰহণ কৰে জিলা আয়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ অধ্যক্ষই
দেওবাৰে সন্ধিয়াৰ পৰা অবিৰতভাৱে হোৱা বৰষুণে গুৱাহাটী মহানগৰীক প্ৰায় জলা-মগ্ন কৰি পেলাইছে। মহানগৰীৰ হাতীগাঁও, ৰুক্মিণীগাঁও, অনিল নগৰ, নবীন নগৰ, গণেশগুৰি, ছয়মাইল, অম্বিকাগিৰি নগৰ, জুৰোড, কাহিলীপাৰা আৰু জটিয়া আদি অঞ্চলত পানীৰ স্তৰ একাঁঠুৰ পৰা একঁকাল পৰ্যন্ত উঠি গৈছে। ইয়াৰ ফলত বহু ৰাজপথ আৰু উপ-পথত তীব্ৰ যান-জঁটৰ সৃষ্টি হৈ সাধাৰণ জনজীৱন ব্যাহত হৈছে।
ইয়াৰ মাজতেই মালিগাঁও অঞ্চলত সংঘটিত হৈছে এক মৰ্মান্তিক ঘটনা। কৃত্ৰিম বানৰ মাজতে এটি মেনহলত পৰি সন্ধানহীন হৈ পৰিছে এগৰাকী মহিলা। প্ৰাথমিক তথ্য অনুসৰি, ধাৰাপুৰৰ পায়েল নাথ নামৰ মহিলাগৰাকী নলাত উটি যোৱাৰ সন্দেহ কৰা হৈছে। বৰ্তমানে SDRF-এ উদ্ধাৰ অভিযান অব্যাহত ৰাখিছে।
উল্লেখযোগ্য যে, বৰ্তমানো মহানগৰীত অবিৰতভাৱে বৰষুণ চলি আছে। জনসাধাৰণৰ সুৰক্ষাৰ প্ৰতি লক্ষ্য ৰাখি জিলা প্ৰশাসনে জৰুৰী হেল্পলাইন নম্বৰ মুকলি কৰিছে। যিকোনো জৰুৰী অৱস্থাত ৯৩৫৬৫৪২৯৩১৪ নম্বৰত WhatsApp বা ১০৭৭ নম্বৰত ফোনযোগে সহায় বিচাৰিবলৈ আহ্বান জনোৱা হৈছে।
প্ৰশাসনে সকলো নাগৰিকক সাৱধান আৰু সতৰ্ক হৈ থাকিবলৈ লগতে অতি প্ৰয়োজন নোহোৱাকৈ ঘৰ পৰা বাহিৰ নহ’বলৈ আহ্বান জনাইছে।
