পশ্চিম এছিয়াত চলি থকা যুদ্ধ পৰিস্থিতিৰ ফলত ভাৰতৰ অৰ্থনীতি আৰু বৈদেশিক মুদ্ৰাৰ ভাণ্ডাৰৰ ওপৰত চাপ বৃদ্ধি পোৱাক লৈ উদ্বেগ প্ৰকাশ কৰিছে ভাৰতৰ প্ৰধানমন্ত্ৰী Narendra Modiয়ে। দেওবাৰে তেলেংগানাৰ ছেকেন্দ্ৰাবাদত অনুষ্ঠিত এখন জনসভাত ভাষণ প্ৰদান কৰি দেশবাসীক পেট্ৰ’ল-ডিজেলৰ ব্যৱহাৰ হ্ৰাস কৰাৰ লগতে পুনৰ ‘ৱৰ্ক ফ্ৰম হোম’ ব্যৱস্থা গ্ৰহণ কৰিবলৈ আহ্বান জনায় প্ৰধানমন্ত্ৰীগৰাকীয়ে।
ক’ৰোনা মহামাৰীৰ সময়ৰ কথা সোঁৱৰাই দি মোদীয়ে কয় যে সেই সময়ত দেশজুৰি অনলাইন মিটিং, ভিডিও কনফাৰেন্স আৰু ঘৰৰ পৰা কাম কৰাৰ ব্যৱস্থা সফলভাৱে চলিছিল। সেই অভ্যাস পুনৰ আৰম্ভ কৰিলে দেশৰ বহু উপকাৰ হ’ব বুলি মন্তব্য কৰে তেওঁ।
প্ৰধানমন্ত্ৰীয়ে কয়, “আমি ক’ৰোনাৰ সময়ত ৱৰ্ক ফ্ৰম হোম কৰিছিলোঁ। অনলাইন মিটিং, ভিডিও কনফাৰেন্স কৰিছিলোঁ। সেইবোৰ আমাৰ অভ্যাসত পৰিণত হৈছিল। এতিয়া সেই ব্যৱস্থাসমূহ পুনৰ আৰম্ভ কৰিলে দেশৰ উপকাৰ হ’ব। ৱৰ্ক ফ্ৰম হোম, অনলাইন কনফাৰেন্স আৰু ভাৰ্চুৱেল মিটিংসমূহক পুনৰ গুৰুত্ব দিব লাগিব।”
ইয়াৰ লগতে পশ্চিম এছিয়াৰ অস্থিৰ পৰিস্থিতিৰ ফলত খাৰুৱা তেলৰ মূল্য বৃদ্ধি আৰু বৈদেশিক মুদ্ৰাৰ ওপৰত চাপৰ কথাও উল্লেখ কৰে মোদীয়ে। তেওঁ দেশবাসীক অপ্রয়োজনীয়ভাৱে পেট্ৰ’ল-ডিজেল ব্যৱহাৰ নকৰিবলৈ আহ্বান জনাই কয় যে ই দেশৰ বৈদেশিক মুদ্ৰা সংৰক্ষণত সহায়ক হ’ব।
প্ৰধানমন্ত্ৰীৰ এই মন্তব্যৰ পিছতে দেশজুৰি পুনৰ ‘ৱৰ্ক ফ্ৰম হোম’ ব্যৱস্থা আৰম্ভ হ’ব নেকি, সেই লৈ ব্যাপক চৰ্চা আৰম্ভ হৈছে।
