ভিৰ কৰা বজাৰ, ট্ৰেফিক জাম বা বৃহৎ অনুষ্ঠানৰ দৰে পৰিস্থিতিতো গ্ৰাহকসকলক অধিক নিৰৱচ্ছিন্ন নেটৱৰ্ক অভিজ্ঞতা প্ৰদান কৰাৰ লক্ষ্যৰে ভাৰতী এয়াৰটেলে মুকলি কৰিছে উন্নত ৫জি স্লাইচিং প্ৰযুক্তিৰে চালিত নতুন অফাৰ ‘এয়াৰটেল প্ৰাইয়ৰিটি পোষ্টপেইড’।
এয়াৰটেলৰ গ্ৰাহকসকললৈ ইমেইলযোগে প্ৰেৰণ কৰা এখন পত্ৰত ভাৰতী এয়াৰটেল ইণ্ডিয়াৰ এমডি তথা চিইঅ’ Shashwat Sharma-ই কয় যে গ্ৰাহকৰ প্ৰতিক্ৰিয়াৰ ভিত্তিতেই কোম্পানীটোৱে এই নতুন সেৱা আৰম্ভ কৰিছে।
তেওঁ কয়, “আপোনালোকৰ বহুতেই আমাক কৈছিল যে কেতিয়াবা ভিডিঅ’ কল কৰিবলৈ, ইমেইল ডাউনলোড কৰিবলৈ বা কোনো অনুষ্ঠানত ফটো আপলোড কৰিবলৈ অসুবিধাৰ সন্মুখীন হ’বলগীয়া হয়। এই সমস্যাৰ সমাধান বিচাৰিয়েই আমি এয়াৰটেল প্ৰাইয়ৰিটি পোষ্টপেইড মুকলি কৰিছো।”
শৰ্মাৰ মতে, এয়াৰটেলৰ শেহতীয়া ৫জি নেটৱৰ্ক উন্নীতকৰণ ‘স্লাইচিং’ প্ৰযুক্তিৰ জৰিয়তে ভিৰ কৰা অঞ্চলতো অধিক সামঞ্জস্যপূৰ্ণ আৰু উন্নত নেটৱৰ্ক অভিজ্ঞতা লাভ কৰিব গ্ৰাহকে। তেওঁ কয়, “এয়াৰটেল প্ৰাইয়ৰিটি পোষ্টপেইড বিশেষভাৱে ডিজাইন কৰা হৈছে যাতে ভিৰ কৰা অঞ্চলতো গ্ৰাহকে এক নিৰৱচ্ছিন্ন অভিজ্ঞতা লাভ কৰিব পাৰে। এইটো সম্ভৱ হৈছে আমাৰ ৫জি নেটৱৰ্কৰ শেহতীয়া উন্নীতকৰণ ‘স্লাইচিং’ৰ জৰিয়তে।”
কোম্পানীটোৱে জনোৱা মতে, ‘স্লাইচিং’ হৈছে এক উন্নত ৫জি সামৰ্থ্য, যি ইতিমধ্যে বিশ্বৰ বহু টেলিকম বজাৰত ব্যৱহৃত হৈছে। এতিয়া এই প্ৰযুক্তি ভাৰতৰ গ্ৰাহকসকলৰ বাবেও উপলব্ধ কৰা হৈছে।
এয়াৰটেলৰ দাবী অনুসৰি, এই নতুন ক্ষমতাই নেটৱৰ্ক অধিক শক্তিশালী কৰাৰ লগতে অতিৰিক্ত সক্ষমতা সৃষ্টি কৰে, যাৰ জৰিয়তে প্ৰাইয়ৰিটি পোষ্টপেইড গ্ৰাহকসকলক অধিক উন্নত সেৱা আগবঢ়াব পৰা যাব।
উল্লেখ্য যে, এই সুবিধা এয়াৰটেলৰ পোষ্টপেইড প্লেনসমূহত উপলব্ধ হ’ব। বৰ্তমানৰ পোষ্টপেইড গ্ৰাহকসকলেও স্বয়ংক্ৰিয়ভাৱে এই সুবিধাৰ লাভ পাব। কোম্পানীটোৱে লগতে জানিবলৈ দিয়ে যে শেহতীয়া চফটৱেৰ সংস্কৰণ চলোৱা সামঞ্জস্যপূৰ্ণ ৫জি ষ্টেণ্ডএল’ন সক্ষম স্মাৰ্টফোনত এই সেৱা অনুভৱ কৰিব পাৰিব গ্ৰাহকে।
