হিন্দু ধৰ্মাৱলম্বী সকলৰ পবিত্ৰ অনুষ্ঠান মহালয়া উদযাপনৰ সময়তে বাংলাদেশত সংঘটিত হৈছে এক ভয়াৱহ দুৰ্ঘটনা। দেওবাৰে বাংলাদেশৰ পঞ্চগড়ৰ কাৰাটয়া নদীত এখন নাও ডুবি যোৱাৰ ফলত ২৪ গৰাকী লোকৰ মৃত্যু হোৱাৰ লগতে কেইবাগৰাকীও লোক সন্ধানহীন হৈছে।
বোদা উপজিলাৰ মাৰিয়া ইউনিয়ন পৰিষদৰ অন্তৰ্গত আউলিয়াৰ ঘাট অঞ্চলত এই দুৰ্ঘটনা সংঘটিত হয়। দুৰ্ঘটনাস্থলীৰ পৰা উদ্ধাৰ কৰা যাত্ৰী আৰু স্থানীয় লোকসকলৰ মতে, হিন্দু কেলেণ্ডাৰৰ এক পবিত্ৰ অনুষ্ঠান মহালয়া উপলক্ষে প্ৰাৰ্থনাৰ উদ্দেশ্যে স্থানীয় অঞ্চলসমূহৰ হিন্দু সম্প্ৰদায়ৰ লোকসকল আউলিয়া ঘাটৰ পৰা বধেশ্বৰ মন্দিৰ অভিমুখে যাত্ৰা কৰিছিল।
নাওখনত বহন ক্ষমতাতকৈ অধিক যাত্ৰী কঢ়িওৱাৰ ফলত কাৰাটোয়া নদীৰ মাজতে নাওখন ডুব যায়। দুৰ্ঘটনাত পতিত নাওখনৰ কেইবাগৰাকীও যাত্ৰীয়ে সাঁতুৰি পাৰলৈ উঠিবলৈ সক্ষম হয় যদিও বহু লোক এতিয়াও সন্ধানহীন হৈ আছে।
স্থানীয় বোদা আৰক্ষী থানাৰ ভাৰপ্ৰাপ্ত বিষয়াই উল্লেখ কৰা মতে সন্ধানহীন লোকসকলৰ উদ্ধাৰৰ বাবে উদ্ধাৰ অভিযান চলাই থকা হৈছে। ইতিমধ্যে উদ্ধাৰ কৰা একাংশ যাত্ৰীয়ে সন্ধানহীন লোকৰ সংখ্যা ৩০ গৰাকীতকৈও অধিক হ’ব বুলি সন্দেহ প্ৰকাশ কৰিছে।
ইতিমধ্যে দুৰ্ঘটনাস্থলীৰ পৰা ২৪ গৰাকী ব্যক্তিৰ মৃতদেহ উদ্ধাৰ কৰা হৈছে। দুৰ্ঘটনাটোৰ তদন্তৰ বাবে পাঁচ জনীয়া এটা তদন্ত দল গঠন কৰা হৈছে বুলি স্থানীয় আৰক্ষী বিষয়াগৰাকীয়ে উল্লেখ কৰে।