ৰাষ্ট্ৰীয় বাৰ্তা
অভিনেতা সুশান্ত সিং ৰাজপুটে দেওবাৰে আত্মহত্যা কৰা ঘটনাই সমগ্ৰ দেশতে চাঞ্চল্যৰ সৃষ্টি কৰিছে৷ তেওঁ নিজৰ ঘৰতে চিপ লৈ আত্মহত্যা কৰে৷ কিয় এই অভিনেতাজনে আত্মহত্যা কৰিলে সেই কথা জানিব পৰা নাই৷ এই বলীউডৰ অভিনেতাজনে ৩৪ বছৰ বয়সতে পৃথিৱীৰ পৰা বিদায় ল’লে৷ দেওবাৰে পুৱা তেওঁৰ বান্দ্ৰাৰ ঘৰতে উলমি থকা অৱস্থাত উদ্ধাৰ কৰা হয়৷ ইয়াৰ পাছতে আৰক্ষীক খবৰ দিয়ে৷ উল্লেখ্য যে এই ঘটনাৰ পাঁচদিন আগেয়ে তেওঁৰ প্ৰাক্তন ব্যক্তিগত সহকাৰী নিজৰ ঘৰৰ বাৰাণ্ডাৰ পৰা জাপ মাৰি আত্মহত্যা কৰিছিল৷ এই দুয়োটা ঘটনাক লৈ কিবা সম্পৰ্ক আছে বুলি আলোচনা হৈছে৷ প্ৰাপ্ত তথ্য মতে কিছুদিন ধৰি তেওঁ মানসিক অৱসাদত ভূগিছিল৷ তাৰ বাবে তেওঁৰ চিকিৎসা চলিছিল৷ তেওঁ বন্ধুৰ সৈতে যোগাযোগ বন্ধ কৰি দিছিল৷ দেওবাৰে পুৱা বন্ধু বান্ধৱ ঘৰলৈ আহি তেওঁৰ দৰ্জা ভাঙি উলমি থকা অৱস্থাত উদ্ধাৰ কৰে৷ ১৯৮৬ চনত তেওঁৰ জন্ম হয় পাটনাত৷ ২০০৮ চনত তেওঁক প্ৰথম টেলিভিছনত দেখিবলৈ পোৱা যায়৷ তাৰ পাছত ২০১৩ চনত ‘কাই পো চে’ নামৰ ছবিৰ জৰিয়তে বলীউডত প্ৰৱেশ কৰে৷ ইয়াৰ পিছত ‘ছিছোৰে’ ‘ডিটেকটিভ বোমকেছ বক্সি’ ‘ৰবতা’ আদি ছবিত অভিনয় কৰি সকলোৰে দৃষ্টি আকৰ্ষণ কৰে৷ তেওঁৰ মৃত্যুত বলীউডৰ তাৰকাসকলে টুইট কৰি শোক প্ৰকাশ কৰিছে৷ ইপিনে শেষ ইনষ্টাগ্ৰাম প’ষ্টত তেওঁ নিজৰ মাতৃৰ সম্পৰ্কে লিখিছিল৷ মাক আৰু নিজৰ ছবি ইনষ্টাগ্ৰামত দি লিখিছিল, চকু পানী শুকাই গৈছে মা৷ সুশান্তৰ মৃত্যুৰ লগত তেওঁৰ মৃত মাতৃৰ সৈতে অভিনয়ৰ ব্যক্তিগত সম্পৰ্কৰ কোনো যোগাযোগ আছে নেকি তাক চাইছে আৰক্ষীয়ে৷ কাৰণ ২০০২ চনত মাতৃৰ মৃত্যুৰ পাছত তেওঁ মানসিকভাৱে অতি আঘাত পাইছিল৷ মাকৰ সৈতে সুশান্তৰ মানসিক যোগাযোগ আছিল অতি ঘনিষ্ঠ বুলি তদন্তকাৰী বিষয়াসকলে জানিব পাৰিছে৷ সুশান্তৰ কোনো ছুইছাইড ন’ট আৰক্ষীয়ে পোৱা নাই৷ প্ৰাথমিক তদন্তত আত্মহত্যা বুলি আৰক্ষীয়ে নিশ্চিত কৰিছে৷