ৰাজ্যবাসীৰ বাবে সুখবৰ। নতুন বৰ্ষৰ পহিলা জানুৱাৰীৰ পৰা পুনৰ অসম সমবায় মৰাপাট কলৰ উৎপাদনৰ কাম আৰম্ভ হ’ব। প্ৰায় দুমাহ ধৰি মৰাপাট কলটো বন্ধ হৈ থকাৰ অন্তত অৱশেষত আহিল এই ভাল খবৰ । পৰিচালনা মণ্ডলীৰ সভাপতি তথা মন্ত্ৰী কেশৱ মহন্তই ঘোষণা কৰে এই কথা ।
উল্লেখযোগ্য যে যোৱা ১২ নৱেম্বৰ তাৰিখে মৰাপাট কল কৰ্তৃপক্ষ , ৰাজ্যৰ সমবায় বিভাগ আৰু বিত্ত বিভাগৰ উচ্চ পদস্থ বিষয়াৰে হোৱা আলোচনা মৰ্মে বৃত্ত মন্ত্ৰী হিমন্ত বিশ্ব শৰ্মাই কলটো পুনৰ সঞ্চালন কৰিবলৈ ১০ কোটি টকাৰ এক সাহায্য ঘোষণা কৰিছিল ।
পৰৱৰ্তী সময়ত যোৱা ১১ ডিচেম্বৰ তাৰিখে শিলঘাটত উপস্থিত হৈ কলটো উৎপাদন কাৰ্য অনতিপলমে আৰম্ভ হ’ব বুলি মত প্ৰকাশ কৰে মন্ত্ৰী কেশৱ মহন্তই।