আদানী বিতৰ্কক লৈ মুখ মেলিছে কেন্দ্ৰীয় গৃহমন্ত্ৰী অমিত শ্বাহে। মঙলবাৰে সংবাদ সংস্থা এএনআইৰ সৈতে হোৱা এক সাক্ষাৎকাৰত শ্বাহে কয় যে বিজেপিৰ লুকুৱাবলগীয়া একো নাই আৰু ভয় কৰিবলগীয়া একো নাই। এই বিতৰ্কত বিৰোধীয়ে মোডী চৰকাৰক লক্ষ্য কৰি লৈছে। দেশৰ গৃহমন্ত্ৰীয়ে তেওঁক উত্তৰ দিওঁতে এই মন্তব্য কৰে।
আদানী গোটৰ বিৰুদ্ধে আৰ্থিক প্ৰৱঞ্চনা আৰু শ্বেয়াৰৰ মূল্য বৃদ্ধিৰ বাবে হেতালি খেলাৰ অভিযোগ উত্থাপন হৈছে। আমেৰিকাৰ বিনিয়োগ গৱেষণা সংস্থা দ্য হিণ্ডেনবাৰ্গ ৰিচাৰ্চৰ প্ৰতিবেদন ৰাজহুৱা স্থানত ওলোৱাৰ লগে লগে দেশত হুলস্থুলৰ সৃষ্টি হয়। উদ্যোগপতি গৌতম আদানীৰ সৈতে প্ৰধানমন্ত্ৰী নৰেন্দ্ৰ মোডীৰ “সুসম্পৰ্ক”ক কংগ্ৰেছকে ধৰি বিৰোধীয়ে ব্যৱহাৰ কৰিছে।
আদানীৰ সৈতে মোডীৰ কি সম্পৰ্ক? এই সন্দৰ্ভত ৰাহুল গান্ধীয়ে প্ৰশ্ন উত্থাপন কৰিছে।