টিংখাং
ডিব্ৰুগড় জিলাৰ ৰাজগড় কনিষ্ঠ মহাবিদ্যালয়ৰ চতুৰ্থবৰ্গৰ কৰ্মচাৰী তথা নভকতীয়া গাঁৱৰ নিবাসী অজিত মহন্তৰ (৪০)যোৱা নিশা প্ৰায় দুই বজাত নিজা বাসগৃগত মৃত্যু হয়। দীৰ্ঘদিনধৰি এক জটিল ৰোগত আক্ৰান্ত হোৱা বাবে কিছুদিনৰ পূৰ্বে অজিত মহন্তই ডিব্ৰুগড়ৰ এখন ব্যক্তিগত চিকিৎসালয়খনত চিকিৎসা গ্ৰহণ কৰিছিল। চিকিৎসালয়খনত চিকিৎসা গ্ৰহণ কৰি কিছু আৰোগ্য লাভ কৰাত চিকিৎসালয়খনৰ পৰা ছুটীলৈ ঘৰলৈ আহিছিল। নিশা হঠাতে গুৰুতৰভাৱে অসুস্থ হৈ পৰা পিছতে মৃত্যুক সাৱতি লোৱাৰ বাতৰিয়ে ৰাজগড়ত গভীৰ শোকৰ ছাঁ পেলাইছে। বেচৰকাৰী শিক্ষানুষ্ঠানখনত কৰ্মৰত অজিত মহন্তক চিকিৎসাৰ বাবে শিক্ষানুষ্ঠানখনৰ লগতে ৰাজগড় আঞ্চলিক ছাত্ৰ সন্থাই আৰ্থিক সাহায্য প্ৰদান কৰিছিল। তদুপৰি চিকিৎসাধীন অৱস্থাত অঞ্চলটোৰ বহুকেইগৰাকী ব্যক্তিয়ে স্বইচ্ছাই অজিত মহন্তক প্ৰয়োজনীয় তেজ দান কৰিছিল। উল্লেখ্য যে মহাবিদ্যালয়খনৰ প্ৰতিষ্ঠা কালৰে পৰা কৰ্মৰত অজিত মহন্তৰ মৃত্যুত মহাবিদ্যালয়খনৰ শিক্ষক কৰ্মচাৰী ছাত্ৰ-ছাত্ৰীৰ লগতে বিভিন্ন দল-সংগঠন ব্যক্তিয়ে গভীৰ শোক প্ৰকাশ কৰি শোকসন্তপ্ত পৰিয়ালবৰ্গলৈ সমবেদনা জ্ঞাপন কৰিছে। অজিত মহন্তৰ মৃত্যুৰ বাতৰিয়ে বৃহত্তৰ ৰাজগড় অঞ্চলত গভীৰ শোকৰ ছাঁ পৰা পৰিলক্ষিত হৈছে। তেওঁৰ নশ্বৰদেহ আজি পুৱাৰ ভাগতে নিজা বাসগৃহৰ পৰা কৰ্মস্থলী মহাবিদ্যালয়খনলৈ নিয়া হয়। মহাবিদ্যালয়খনলৈ নশ্বৰদেহ নিয়াৰ সময়ছোৱাত এক শোকাকুল পৰিৱেশৰ সৃষ্টি হয়। অজিত মহন্তৰ নশ্বৰদেহত মহাবিদ্যায়লখনৰ পৰিচালনা সমিতি সচিব প্ৰমোদ দত্ত, ৰাজগড় মহাবিদ্যালয়ৰ অধ্যক্ষঅম্বেশ্বৰ কোচ, কনিষ্ঠ মহাবিদ্যালয়ৰ অধ্যক্ষ মৃদুল দত্ত, জ্যেষ্ঠ প্ৰবক্তাদ্বয় দিলীপ বৰা, সঞ্জীৱ দত্ত, ব্ৰজ্য বৰশইকীয়াসহ কৰ্মচাৰী, ছাত্ৰ-ছাত্ৰীয়ে পুস্পাঞ্জলি অৰ্পন কৰি অন্তিম বিদায় জনায়। পিছত অনেক গুণমুগ্ধৰ উপস্থিতিত ৰাজগড়ৰৰ ৰাজহুৱা সংকাৰস্থলীত অজিত মহন্তৰ অন্ত্যেষ্টিক্ৰিয়া সম্পন্ন কৰা হয়। অজিত মহন্তই মৃত্যুৰ সময়ত পত্নী পুত্ৰ সহ বহু আত্মীয় স্বজনক ইহসংসাৰত এৰি থৈ যায়।